Lam Ruchingej Rey ra Win Kristu Rikash

1. Ruchingej ik ratwinkishinay kal Yehova?

YEHOVA watwinkishin kal ruchingej ruwamp nakash ra mwom wa chikupu. Antu amwing akwet ruchingej ra kushakam mwiur chikupu mud yitang ya mu spiritu yakading kufang. (1 Kor. 15:50, 53) Pakwez antu avud akwet ruchingej ra kushakam chikupu pa divu mu musangar, nich mijimbu yiwanyidina. (Kuj. 21:3, 4) Twikala ni ruchingej ra kutambul mwom wa chikupu mwiur ap pa divu, ruchingej retu rid ra usey nakash.

2. Ruchingej retu rimedin pa yom ik, ni mulong wak tukutwisha kulond mwamu?

² Dizu “ruchingej,” kukwatijan ni mutapu udisadidinau mu Bibil, tukutwish kudirumburil mud “kuchingel anch yom yiwamp yikusadik.” Ruchingej retu mulong wa machuku ma kurutu rid rakin, mulong ridiokil kud Yehova. (Rom 15:13) Twij yom yakanay kal, ni twij anch ukat kuwanyishang chisu chawonsu yom yikatay kukan. (Kuch. 23:19) Tukwet kashinsh nakash anch Yehova ukwet impu ni dikand dia kuwanyish chom chin chawonsu chakanay kal anch ukusal. Chawiy, ruchingej retu rimedinap pa yom tukatina ap pa yom tutongina kwetu; pakwez rimedin pa uman ni uyakin.

3. Yom ik tukumana mu mutu wa mulong winou? (Kuseng 27:14)

³ Tatukwetu wa mwiur utukatin kamu nakash, ni ukatin anch tumuchingejin. (Tang Kuseng 27:14.) Anch ruchingej retu mudiay Yehova rikal rikash, chikutuswapel kujijamen yikokujol ni kuchingel machuku ma kurutu nich kutakaman ni musangar. El tumanany mutapu ukata kutuking ruchingej retu. Pakwez kurutu kwa kusal mwamu, tumanany bil chakusambish mutapu udia ruchingej mud nkal ni chiful. Kupwa, tukuman mutapu tukutwisha kukasikesh ruchingej retu.

RUCHINGEJ RETU RID MUD NKAL

4. Mutapu ik udia ruchingej mud nkal? (Hebereu 6:19)

⁴ Mu mukand wend wayifundinay in Hebereu, kambuy Paul wafanikesha ruchingej nich nkal. (Tang Hebereu 6:19.) Yisu yivud, Paul wendanganang pa turung, chawiy wading wij nawamp anch nkal amusadinang mulong wa kukangesh waat kuperik. Dichuku dimwing, wading mu waat chisu chatuta rinkind mukash. Pa chisu chinicha, wamana mutapu ayabul wadjibulau ankal mu mem mulong wa kukangesh waat kwibul ku mayal. (Mid. 27:29, 39-41) Mud mukata nkal kujamish waat, ruchingej retu rikat kutukwash kujamish ni kulik kuperik kulemp ni Yehova anch twarish ni yikokujol yikash. Ruchingej retu rikat kutukwash kulik kuzazat anch twarish ni milong yikash, mulong twij anch chisu cha chisambu chezin kurutu oku. Vurik anch Yesu watubabesha anch akutuzengol. (Yoh. 15:20) Chawiy, kutongijokin pa kushilamu kwa Nzamb anch ukutufut kurutu oku kukutukwash kudandaken kumusadin.

5. Mutapu ik ruchingej ramwinkisha Yesu usu ap anch wading wij anch ukufa?

⁵ Man mutapu ruchingej ramukwasha Yesu kushal ushinshamena ap anch wading wij anch ukufa rufu risansena. Pa dichuku dia Pentekot wa muvu wa 33 C.C., kambuy Pita wajimbula uprofet udia mu buku wa Kuseng urumburila kulik kuzazat ni kashinsh kafanyinay kwikal nich Yesu anch: “Nikez kiswedish nawamp mulong wa ruchingej ram; mulong ey kiukez kanlikap mwi ndond ya afu. Ey kiukez kitiyap kashalapol wey utumbila kuvundil mwi nzay. . . . Ey ukez kwinsangarish nakash pinikushakama ni yeyey pamwing.” (Mid. 2:25-28; Kus. 16:8-11) Ap anch Yesu wading wij anch wading ufanyidin kufa, wading ukwet kashinsh kakash anch Nzamb ukumuvumbul ni anch wafanyina kusanger kand kwikal mu umwing ni Tatukwend wa mwiur.—Heb. 12:2, 3.

6. Yom ik yalonday mukadivar umwing piur pa ruchingej?

⁶ Ruchingej retu ra win Kristu rayikwashin kal akadivar nau anambaz netu avud kujijaman. Shinshikin chilakej cha Leonard Chinn, mukadivar ushinshamena wading ushicha mu Angleter. Pa chirung cha Njit ja Kusambish ja pa Mangand Mawonsu, amukasa mulong walika kwandam mu usalay. Amuteka mu rukan mu angond aad, kupwa amusadisha ku usu midimu yikash mu chisu kanang. Wafunda anch: “Yom yanshikena yankwasha kuman patok anch tukwet kuswir kwa ruchingej rikash mulong wa kujijaman. Tukwet chilakej cha Yesu, atwimbuy, ni aprofet, kuwejaku kushilamu kuwamp nakash tutanina mu Bibil. Yawonsu yiney yikat kutwinkish ruchingej rikash piur pa machuku ma kurutu ni kutwinkish usu wa kujijaman.” Ruchingej rading mud nkal kud Leonard, ni rikutwish kand kwikal mwamu kud etu.

7. Mutapu ik ukata yikokujol kukasikesh ruchingej retu? (Rom 5:3-5; Jakobu 1:12)

⁷ Ruchingej retu rikat kukasikan kupwa kwa kujijamen yikokujol ni kujingunin anch tukwet ukwash ni dilau dia Yehova. (Tang Rom 5:3-5; Jakobu 1:12.) Katat tukwet ruchingej rikash kusutamu chisu twitiya kapamp ka kusambish rusangu ruwamp. Satan ukatin anch tujiy mu yakamish, pakwez nich ukwash wa Yehova tukutwish kuyijijamen yawonsu.

RUCHINGEJ RETU RID MUD CHIFUL CHA UTAD

8. Mutapu ik udia ruchingej mud chiful? (1 Tesalonik 5:8)

⁸ Bibil ufanakeshin kand ruchingej retu nich chiful. (Tang 1 Tesalonik 5:8.) Isalay ukat kudjal chiful mulong wa kuking mutu wend ku yom ya ubaj yikutwishau akankuny nend kumwas. Piur pa njit ja mu spiritu, tufanyidin kuchidij manangu metu ku kurishikish kwa Satan. Ukat kututil yisu yawonsu mipit ni kutubachik kukudish yitongijok yikutwisha kwijondish manangu metu. Mud mutapu ukata chiful kuking mutu wa disalay, ruchingej retu rikat kuking manangu metu chakwel tudandamen kushal ashinshamena kud Yehova.

9. Yibudikin ik yikatau kwikal nich antu akad ruchingej?

⁹ Ruchingej retu ra mwom wa chikupu rikutwish kutukwash kusal yom nich manangu ni kukwat mipak yiwamp. Ku mutambu ukwau, anch ruchingej retu raziy ni twalikidil yitongijok yiyimp kukul mu manangu metu, tukutwish kuvuramen ruchingej retu ra mwom wa chikupu. Shinshikin chilakej cha in Kristu amwing ading ashicha mu Korint wa pasak. Ashadisha ritiy rau mu kushilamu kwa usey kwa Nzamb—ruchingej ra divumbuk. (1 Kor. 15:12) Paul walonda anch antu inay akad ruchingej ashich kwau mulong wa kusangaresh mwom yau ya katat. (1 Kor. 15:32) Nlel antu avud akad ruchingej mu kushilamu kwa Nzamb atongin anch mwom wawiy kwau winou, ni akat kusal yawonsu yikutwishau mulong wa kwisangaresh. Pakwez etu tushalijadin ni antu inay, mulong tukwet ruchingej mu kushilamu kwa Nzamb piur pa machuku ma kurutu. Ruchingej retu rikat kusal mud chiful cha chifanakesh chikata kuking yitongijok yetu ni kutukwash kwipuk mashakamin makutwisha kuyipish urund wetu ni Yehova.—1 Kor. 15:33, 34.

10. Mutapu ik ukutwisha ruchingej kutuking pantaliken ni yitongijok yiyimp?

¹⁰ Ruchingej retu rikutwish kutukwash kwipuk kutong anch kwikil chom tukusala chikutwisha kumusangaresh Yehova. Chilakej, antu amwing akutwish kutong anch: ‘Nikutwishap ap pakemp kwikal pakach pa antu akutambula mwom wa chikupu. Nidiap kamu kwam muntu muwamp. Nikutwishap ap pakemp kushakam kukwatijan ni mbil ja Nzamb.’ Vurik anch Elifaz, murund wa makasu weza kumwongoj Job, wasadina niyend yitongijok ya mutapu winou. Elifaz walonda anch: “Ov, muntu udi chom ik ing ikala wa zwang?” Kupwa walonda piur pa Nzamb anch: “Ap atumbila, Nzamb kayichingejinap kwend, ni maur kimishitwilap ku mes kwend.” (Job 15:14, 15) Makasu mayimp mud ik! Vurik anch Satan ndiy ukatina anch utonga mwamu. Wij anch ang wasambish kutong mwamu, ukusambish kushadish ruchingej rey. Chawiy, komb ipuk makasu minam, ni shinshikin pa kushilamu kwa Yehova. Kangal widjidjek anch Yehova ukatin anch wikal ni mwom wa chikupu, ni anch ukukukwash kuwanyish rutong riner.—1 Tim. 2:3, 4.

LAM RUCHINGEJ REY RIKASH

11. Mulong wak tufanyidina kushimpish muchim patuchingedina anch ruchingej retu riwanyin?

¹¹ Chiswapelingap chisu chawonsu kulam ruchingej rikash. Tufanyidin kushimpish muchim patuchingedina anch Yehova awanyish kushilamu kwend. Yehova ud wa chikupu, chawiy chisu tumena etu anch chilepin nakash, chid kwau chiswimp ku mes mend. (2 Pita 3:8, 9) Ukusal yom yawonsu yakanay kal mu mutapu upandakena kuwap, pakwez kakuyisalap pa chisu tuchingejidina etu. Yom ik yikutukwasha kulam ruchingej retu rikash patumuchingedina Nzamb anch awanyish kushilamu kwend?—Jak. 5:7, 8.

12. Kukwitijan ni Hebereu 11:1, 6, ruchingej rikwatijadin mutapu ik ni ritiy?

¹² Tukulam ruchingej retu rikash anch twashal piswimp ni Yehova, mulong ndiy ukuwanyisha ruchingej retu. Chawiy, Bibil utukasikeshin anch mulong wa kwikal ni ruchingej, chitin kwikal ni ritiy anch Yehova udiaku, ni anch ndiy “ukata kufutan kuwap kud antu awonsu akata kumusurab.” (Tang Hebereu 11:1, 6.) Anch twikal nich kashinsh anch Yehova udiaku kamu chakin, tukwikal nich kashinsh kakash anch ukuwanyish yawonsu yakanay kal. El tumanany manans ma ukwash makutwisha kutukwash kukasikesh urund wetu ni Yehova ni kulam ruchingej retu rikash.

13. Mutapu ik tukutwisha kumusejin Nzamb piswimp?

¹³ Mulembila Yehova, ni tang Dizu diend. Ap anch tukutwishap kumuman Yehova, tukutwish kumusejin piswimp. Tukutwish kwambamb nend mu malembil, nich kashinsh anch ukututesh. (Jer. 29:11, 12) Tukutwish kumutesh Nzamb kusutin kutang Dizu diend ni kutongijokin pa yom tutangina. Anch watang piur pa mutapu Yehova wayibanginay antu ading amushinshamedina pasak, ruchingej retu rikukasikan kamu kupandakan. Yom yawonsu yafundau mu Dizu dia Nzamb ‘ayifunda mulong wa kutufundish nich etu, chakwel ku kujijaman kwetu ni ku rongoj ra Mifund tutwisha kwikal nich ruchingej.’—Rom 15:4.

14. Mulong wak chid cha usey kutongijokin piur pa yom yayisadinay Yehova antu akwau?

¹⁴ Tongijokin piur pa mutapu wawanyishay Yehova kushilamu kwend. Shinshikin yom yasalay Nzamb kud Aburaham ni Sara. Ading apamin kal nakash ni kadingap ni mutapu wa kuval. Pakwez, Nzamb wayishilamu anch akuval mwan. (Dis. 18:10) Mutapu ik wiyovay Aburaham? Bibil ulondin anch: “Witiyija nich ruchingej, . . . [anch ukwikal] ngakiril wa michid yivud.” (Rom 4:18) Ap anch Aburaham kadingap kija mutapu ukuwanyina kushilamu kwa Nzamb, wading nich kashinsh anch Yehova ukuwanyish kamu kushilamu kwend. Yom yachingejay ikundj winou yawanyina kamu chakin. (Rom 4:19-21) Rusangu riner ritufundishin anch tufanyidin chisu chawonsu kumuchingejin Yehova anch ukuwanyish kushilamu kwend, ap anch etu an a antu twaman anch yikasiken kusadik.

15. Mulong wak tufanyidina kutongijokin piur pa yom yatusadidinau kal kud Nzamb?

¹⁵ Shinshikin yom yakusadidinau kal kud Yehova. Tong piur pa mutapu watanidinamu kal mu kushilamu kwa Nzamb kudia mu Dizu diend. Chilakej, Yesu wakana anch Yehova ukukuwanyishin yom ya usey mu mwom. (Mat. 6:32, 33) Yesu wakukana kand anch ukukwinkish spiritu utumbila anch wamwit. (Luka 11:13) Yehova ukat kuwanyish kushilamu kwinoku. Pamwing ukutwish kutongijokin piur pa kushilamu kukwau kwakuwanyishidinay kal ey pakampwil. Chilakej, ukushidinamu kukulikishin, kukukasikesh, ni kukudish mu spiritu. (Mat. 6:14; 24:45; 2 Kor. 1:3) Anch watongijokin piur pa yom yakusadidinay kal Nzamb, ukukasikesh ritiy rey piur pa yom yikaninay kukusadin mu machuku ma kurutu.

SANGER MU RUCHINGEJ

16. Mulong wak ruchingej retu chid chipan cha usey nakash?

¹⁶ Ruchingej retu ra mwom wa chikupu chid chipan cha usey nakash chitwinkishinay Nzamb. Tuchingedin machuku ma kurutu mawamp nakash, ni tukutwish kwikal nich kashinsh anch makuwanyin. Ruchingej riner rikat kutukwash mud nkal, rikat kutukwash kujamish chakwel tutwish kujijamen yikokujol, kuzengol kukash, ni ap anch tukimbin kufa. Rid mud chiful chikata kuchidij manangu metu chakwel twipuk yom yiyimp ni tusala yom yiwamp. Ruchingej retu rimedina pa Bibil rikat kutusejish piswimp ni Nzamb ni kutukwash kuman mutapu utukatinay nakash. Tukat kutaninamu nakash anch twadandamen kulam ruchingej retu rikash.

17. Mulong wak ruchingej retu rikutwish kutuletin musangar?

¹⁷ Paul wakasikeshana mu mukand wend wayifundinay in Rom anch “sangarany mulong wa ruchingej ren.” (Rom 12:12) Paul wafanyina kusangar mulong wading nich kashinsh anch ang washal ushinshamena, ukutambul mwom wa chikupu mwiur. Chawiy, niyetu tufanyidin kusanger mu ruchingej retu mulong tukwet kashinsh anch Yehova ukuwanyish kushilamu kwend kwawonsu. Mud kamu mwafunday nfund a kuseng anch “wayuk muntu . . . ukata kumuchingej [Yehova] Nzamb wend, . . . ndiy ukata kuwanyish kushilamu kwend kwawonsu.”—Kus. 146:5, 6.