In Isarel a Pasak Arishang Njit—Chad Mulong Wak Etu Tukurishangap?

MUKURUMP wa amasalay mwin Nazi waswejena chisak cha Atuman a Yehova pa chisu cha Njit ja Kaad ja pa Mangand Mawonsu anch: “Ang umwing pakach pen walik kurish ni Frans ap Angleter, en awonsu ukufany!” Ap anch chisak cha amasalay a mu Alemany Nazi [atazukangau anch SS] ading ni mat ayimenang kal piswimp, kwikil mukadivar ap umwing witiya kujip chijil cha Nzamb. Kwinoku kwading kutakaman kukash mud ik! Chilakej chinech chimekeshin patok chitongijok chikwetingau Atuman a Yehova awonsu: Tukatap kurish njit mu mangand minam. Ap anch atuzengol ni kutulej anch akimbin kutujip, tukatap kwitiy kwiyandjik mwi njit ja mangand.

1. ANTU AWONSU A NZAMB ADING A MUCHID UMWING

Pasak, Yehova wakumangeja antwend awonsu kwikal muchid umwing—muchid wa Isarel. Wayitazuka in Isarel anch udiany “amam pakach pa antu awonsu.” (Kub. 19:5) Nzamb wayinkisha kand ngand yafanyinau kushakam. Chawiy, Nzamb payilejangay in Isarel kurish njit ni michid yikwau, kayirishikishangap ap kuyijip ambay nau amwifukwilang Yehova.a

Nlel, in kumwifukwil Yehova adiokil “ku mangand mawonsu, ni ku michid yawonsu, ni ku antu awonsu, ni ku jindim jawonsu.” (Kuj. 7:9) Anch atushalapol a Nzamb iyandjik mwi njit nlel, akutwish kuyirishikish—ap kand kuyijip—ambay nau.

2. YEHOVA NDIY WAYILEJANG IN ISAREL KUYA KWI NJIT

Pasak, Yehova ndiy wakwatang mupak piur pa mayingishin ni chisu chafanyinangau in Isarel kurish njit. Chilakej, Nzamb wayileja in Isarel kurish mulong wa kuwanyish dirumburish diend pad in Kanan kukwatijan ni yisal yau yiyimp ya kwifukwil akish, masandj makash, ni kupesh an pa kasu. Yehova wayileja in Isarel kuyijip antu asalang yom yiney yiyimp mwi Ngand ya Kushilamu, chakwel kangal in Isarel ibwand ku yaku yiyimp yiney. (Lev. 18:24, 25) Kupwa kwa in Isarel kwandam mwi Ngand ya Kushilamu, yisu yimwing Nzamb wayinkisha mbil ya kurish njit mulong wa kuchidij muchid wa Isarel pantaliken ni akankuny nau. (2 Sam. 5:17-25) Pakwez, Yehova kandikal ayitiyijangap in Isarel kwikwatin ayinau mupak wa kurish njit. Chisu chasalangau mwamu, yisu yivud yibudikin yading ching yiyimp.—Kuch. 14:41-45; 2 Jsng. 35:20-24.

Nlel, Yehova kayinkishinap antu mbil ja kurish njit. Jingand jikat kurish mulong wa kutaninamu kwa an a antu, kadiap mulong wa yisakin ya Nzamb. Akat kurish njit mulong akatin kujimbish ngand yau, kwikal nich nfalang jivud, ap mulong wa kutwal kurutu yitongijok yau ya politik. Pakwez chid nchik piur pa antu alondina anch arishin njit mu dijin dia Nzamb mulong wa kuchidij difukwil diau ap mulong wa kujip akankuny a Nzamb? Yehova ukuyichidij in kumwifukwil end akin ni kuyishesh akankuny nend kwi njit jikusadika machuku ma kurutu—njit ja Harmagedon. (Kuj. 16:14, 16) Mwi njit jinej, amasalay a Nzamb akurisha akwikal ching kusu yitang ya mu spiritu yidia mwiur, kakwikalap atushalapol end adia pa divu.—Kuj. 19:11-15.

3. IN ISAREL KAYIJIPANGAP ANTU AMEKESHANG RITIY MUDIAY YEHOVA

Pasak, amasalay a in Isarel ayanakenang antu atekang ritiy rau mudiay Nzamb, ni ayijipang ching antu ading awanyidina kufa ku mes ma Yehova. Shinshikin yilakej yaad. Ap anch Yehova walejana kushesh musumb wa Yeriko, in Isarel amupandisha Rahab ni dijuku diend mulong wa ritiy rau. (Jos. 2:9-16; 6:16, 17) Mu kusut kwa chisu, musumb wakabuj wa in Gabayon aupandisha kupwa kwa in Gabayon kumwov Nzamb wom.—Jos. 9:3-9, 17-19.

Nlel, jingand jikata kurish jikatap kuchidij antu akweta ritiy. Ni nlel, amasalay akat kujip chikupu ni antu akad milong.

4. IN ISAREL AZIYINANG KU UMUTAKEL WA NZAMB PIUR PA NJIT

Pasak, Yehova wayileja amasalay in Isarel kurish njit kukwatijan ni mbil japanay. Chilakej, yisu yimwing Nzamb wayita ‘kulejan chisambu’ mu musumb wading wa akankuny. (Kuv. 20:10) Yehova wayitang kand amasalay in Isarel kwikal ishitwila ku mujimbu ni mu mwikadil wau, ni kulik kwijondish chibeng chau. (Kuv. 23:9-14) Pakwez amasalay a michid yading yiyinyingumukina ading yisu yivud kuyiyipish amband atanangau mu materitwar matambulangau; Yehova wayikangesha in Isarel kusal mwamu. Chawiy, kafanyinap kumwat mband wakwatangau mu winkwal djat ni pakusutina ngond wa kabuj kupwa kwa kukwat musumb.—Kuv. 21:10-13.

Nlel, jingand jivud jatekin kal yijil yifanyidinau kulimish chisu cha njit. Ap anch akat kutek yijil yiney anch mulong wa kuking antu akad kwikal amasalay, cha ushon chid anch kakatap kwau kulimish yisu yivud yijil yiney.

5. NZAMB WAURISHINANG MUCHID WEND

Pasak, Yehova wayirishina in Isarel, ni yisu yivud wayikwasha kuwin njit mu chilay. Chilakej, mutapu ik Yehova wayikwashay in Isarel kukwat musumb wa Yeriko? Mud kamu mwalonday Yehova, chisu charishikishau in Isarel musumb winou, “azambula mazu, ayingil tubobobu, chad rubumbu ra musumb rawa pansh,” ni chinech chasala anch chiyiswapel kukwat musumb. (Jos. 6:20) Ni mutapu ik wayipandakanau in Amore? “[Yehova] wayasa mayal majim ma nvul . . . Avud afa ku ruvul wa mayal kupandakan antu ajipau kudi in Isarel nich mpak ya musamun.”—Jos. 10:6-11.

IN KRISTU AKIN ADING IN KUSAL CHISAMBU

Mud mutapu twamana kal, mashakamin metu mashalijadin nakash ni madingau nich in Isarel a pasak. Pakwez ap mwamu, kushalijan kwinoku kwawiyap kwau kusu kusadina mayingishin tukata kulikin kurish njit. Kud kand mayingishin makwau. Chilakej, Nzamb wasambela kulejan anch machuku ma nsudiel, antu akufundishay kakez “kilejap kand kurish njit,” ja mitapu yin yawonsu, ap kwiyandjikamu. (Isay 2:2-4) Chikwau kand, Kristu walonda piur pa in kwilejend anch kakwikalap ‘a mangand’; charumburik anch kakwiyandjikap mwi njit ja mangand.—Yoh. 15:19.

Kristu wayileja kand kusal yom yivud kusutamu kwau kwimen pinap. Wayileja kwipuk yisal yikutwisha kuletish rukuny, ujim, ni njit. (Mat. 5:21, 22) Chikwau kand, wayileja in kwilejend kwikal in “kulet chisambu,” ni kuyikat akankuny nau.—Mat. 5:9, 44.

Mutapu ik ukutwishay muntu ni muntu kusal mwamu? Chimeken anch tukatinap kwiyandjik mwi njit jin jawonsu, pakwez ov, kud risis ra rukis mu muchim wetu rikutwisha kulet kwaurik ap kupwitamijan mu chikumangen? El tudandamenany kusal usu wa kudiosh yovil yawonsu ya mutapu winou mu michim yetu.—Jak. 4:1, 11.

Tukatap kwiyandjik mwi njit ja mangand. Pakwez tukat kusal usu wa kukasikesh chisambu ni kukatijan. (Yoh. 13:34, 35) Tukwatany amboku mupak wa kulik kwiyandjik mu yom ya politik ni ya njit patuchingedina dichuku dikudioshay Yehova njit chikupu.—Kus. 46:9.