Ov, Wirijekin Mulong wa ‘Kuswan Ngand’?
ETU awonsu tusangaredin kukan kwa Yesu kwakanay anch: “Ayuk kwau itudishila, mulong awiy akez [kuswan] ngand.” (Mat. 5:5) Azizidilau many akuswan divu kusutin kuyikel ni Yesu mwiur. (Kuj. 5:10; 20:6) In Kristu avud akin nlel akwet ruchingej ra kushakam chikupu pa divu nich mujimbu uwanyidina mu chisambu, ni musangar. Mulong wa kuwanyish yom yiney, akwikal ni yom yivud ya kusal. Chilakej: akukwash mu mudimu wa kwikadish divu paradis, ni kusal anch antu akuvumbulau ikal nich yom yikwetau nich kuswir, ni kuyifundish. Tongijokin kand pa yom ukutwisha kusal mulong wa kumekesh anch ukatin kusal yom yiney mwi ngand yisu.
OV, WIRIJEKIN MULONG WA KUKWASH KWIKADISH DIVU PARADIS?
Yehova payilejay antu anch “izwishany ngand ni kuyiziyish,” wamekesha patok anch divu dia kabuj diafanyina kwikal paradis. (Dis. 1:28) Chitongijok chinech akuchiwanyish kud antu akushakamamu. Kwisambishin divu dikwikalap kapamp kamwing paradis mulong chir cha Eden chidiapaku kand. Kupwa kwa njit ja Armagedon, tukwikal ni midimu yivud ya kusal mulong wa kuwapish jindond jayipishinau kal. Chakin kamu chikwit mudimu ukash!
Yom yiney yituvurishin mudimu wikalau nich in Isarel padiokalau mu Babilon. Kwikil muntu washakam mwi ngand yau mu mivu 70. Pakwez muprofet Isay wasambela kulond anch kusutin yiyukish ya Yehova, in Isarel afanyina kuwapish kand ngand yau. Uprofet walonda anch : “Ngand yau yidi mpay yakad mem, pakwez am nikuyikarumun kwikal mudi chir chinadima mu Eden.” (Isay 51:3) Yehova wayikwasha in Isarel kuwapishiril ngand yau. Chilik chimwing, kusutin yiyukish ya Yehova, antu akushakama pa divu akudikadish paradis. Ni kud yom ukutwisha kusal nlel mulong wa kumekesh anch ukwet impu ya kwez kwipan mu mudimu winou.
Mutapu umwing ukutwisha kusal mwamu ud wa kwinangish chikumbu chey ni ndond yawonsu yikunyingumukina. Ukutwish kusal mwamu ap anch amutej ney kinanginap kwau. Ukutwish kand kukwash kwinangish Chot cha Want, ni Chot cha Chitentam. Anch chitwishikin, ukutwish kand kwikal mwin kwisotin mu mudimu wa kupan ukwash kupwa kwa yinship yikash kusadik kwi ndond udia. Kusal mwamu kukumekesh anch wirijekin mulong wa kuyikwash akadivar nau anambaz anch kwikal maswir. Ukutwish kwiyipul anch, ‘Ov, nikutwish kwilej yom yimwing nikutwisha kusadin mwi ngand yisu anch Yehova wanginkish dilau dia kushakamamu chikupu?’
OV, WIRIJEKIN MULONG WA KUYIKWASH ANTU AKUVUMBUKA?
Chisu chikemp kupwa kwa kumuvumbul mwan mband wa Yayirus, Yesu wayileja anch amwinkisha yakudia. (Mar. 5:42, 43) Chadingap chikasikena kumubangin changadim winou wa mivu 12. Pakwez tongijokin pa mudimu ukash tukusala chisu chikuwanyina mazu ma Yesu malondina anch “Chisu chikat kwez chikez kuteshau afu awonsu adia mwi nzay dizu dined, chad akez kuvumbuk.” (Yoh. 5:28, 29) Ap anch Bibil kalondinap kamu kachom ku kachom, tukutwish kutong anch antu akuvumbulau akwikal ni kuswir kwa yakudia, ndond ya kulal, ni masun. Ov, ukatin kumekesh kusambish katat anch wirijekin mulong wa kukwash? Shinshikin yipul yilondwilaku ey.
Yom ik ufanyidina kusal nlel mulong wa kumekesh anch wirijekin mulong wa kuswan ngand?
Anch ijikish dichuku dikwendinau chikumangen chen kud kalam wa munyingumuku, ov, ukwipan kumutazuk mulong wa kudiaku nend kwol kwey? Anch akadivar adia mu mudimu wa chisu chawonsu ayidiosh ku Betel mulong wa kuyitum mu teritwar, ap anch kalam wa munyingumuku wimik mudimu wend, ov, ukutwish kumukwash kutan ndond ya kushakam? Anch chitentam cha rejon ap cha pakampwil chasadikin kwi ndond ushicha, ov, ukutwish kwipan kurutu ni kwinsudiel mulong wa kuyak atutum?
OV, WIRIJEKIN MULONG WA KUYIFUNDISH ANTU AKUVUMBULAU?
Kukwatijan ni Midimu 24:15, tuchingejidin anch akuvumbul rumb ra antu avud nakash. Avud pakach pau afa pakad kumwijik Yehova. Akuyinkish mutapu wa kumwijik kupwa kwa kuyivumbul.a Atushalapol a Nzamb ashinshamena ni akweta ukaliweny akwipan mu mudimu winou wa kufundish. (Isay 11:9) Charlotte, walejana mu Erop, mu Amerik wa Kurul, ni mu Afrik, ukat kuchingel mudimu winou. Ulondin nich musangar anch: “Nichingedin kuyifundish antu akuvumbulau. Chisu nikata kutang nsangu piur pa muntu kampand wa pakur, nikat kutongang anch: ‘Anch muntu winou wamwijika Yehova, mwom wend wafanyina kwikal uwamp. Nichingedin kuyilej antu akuvumbulau piur pa Yehova ni mutapu ukwikala mwom wau anch amusadin ndiy.”
Ap atushalapol a Yehova ashinshamena ashakama kurutu kwa Yesu kwez pa divu akwikal ni yom yivud ya kwilej. Tongin mutapu chikutwisha kutusangaresh nakash ni dilau tukwikala nich dia kumurumburil Daniel kuwanyin kwa mauprofet mafunday pakad amwinend kumwov kurumburik. (Dan. 12:8) Ap kumukwash Nawom ni Rut kwijik anch mu majuku mau mwawiy mwezay kuvadikin Mesia. Chikwikal chisangareshina mud ik kwipan mu mudimu winou wa kufundish ukusadika pa mangand mawonsu pakad kuturishikish ni pakad kampuw ka mangand mayimp ma djabul!
Yom ik ufanyidina kusal kusambish nlel mulong wa kumekesh anch wirijekin mulong wa kukwash mu mudimu wa kuyifundish antu akuvumbuka? Mutapu umwing wa kusal mwamu ud wa kusal usu wa kwikal alej akweta ukaliweny ni kusutin kwipan mu mudimu wa kulejan usadikina nlel pa mangand mawonsu. (Mat. 24:14) Ap anch mulong wa upal ap yishiken yikwau kampand, wakangany kwipan mu mijikit yimwing yisadikina chisu chinech, usu wey usadina ukutwish kumekesh anch wirijekin mulong wa kuyifundish antu akuvumbulau.
Chid cha usey kutongijokin pa yipul yiney: ov, ukat kuchingel mulong wa kuswan ngand? Ov usangaredin kwez kukwash mu mudimu wa kwikadish divu paradis, kuyikwash antu akuvumbulau kwikal ni yom yikwetau nich kuswir, ni kuyifundish? Ukutwish kumekesh anch wirijekin kusutin kwipan nich mushiku mu midimu yisadikina nlel yifanijadina ni midimu yikuchingedina chisu ukuswana divu!
a Tal mutu wa mulong “Yikarumuna Antu Avud Kwikal Atentamina” mu Chinong cha Kalam cha ngond wa 9, 2022.