MUTU WA MULONG WA KWILEJ WA 53
En akadivar Ansand—Ikalany in Kristu Aswila
“Katat jijaman ikal kamu muntu ikundj.”—1 ANT 2:2.
MUMINY 135 Kutazuk kwa Yehova: “Mwanam Ikundj, Ikal Mwin Manangu”
YIDIA MU MUTU WA MULONG WINOUa
1. Yom ik yifanyidinay mwin Kristu ikundj kusal mulong wa kutwish mu mwom?
MWANT David wamuleja Salomon anch: “Katat jijaman ikal kamu muntu ikundj.” (1 Ant 2:1-3) Amakundj awonsu in Kristu nlel akat kusadin chiyul chinech. Mulong wa kusal mwamu, afanyidin kuziyin ku yijil ya Nzamb ni kusadin mbil ja Bibil mu mashakamin ma mwom wau wawonsu. (Luka 2:52) Mulong wak chid cha usey kud akadivar ansand kwikal amakundj in Kristu aswila?
2-3. Mulong wak chid cha usey kud mukadivar nsand kwikal mwin Kristu uswila?
2 In Kristu amakundj akwet yisend yivud nakash ya kuwanyish mu dijuku ni mu chikumangen. Akadivar ansand, ukwetany chakin kamu yisend ufanyidinanya kuwanyish mu machuku ma kurutu. Ukutwish kwitekin mupak wa kusal mudimu wa chisu chawonsu, kwikal nkwash wa mudimu, ni kupwa kushiken kwikal mukurump wa chikumangen. Ukusot kand kwatan ni kuval an. (Efes 6:4; 1 Tim. 3:1) Mulong wa kuwanyish ntong jinej ni kujitwish, ufanyidin kwikal mwin Kristu uswila.b
3 Yom ik yikutwisha kukukwash kwikal mwin Kristu uswila? Ud ukaliweny wa usey ufanyidina kukudish. Yom ik ufanyidina kusal katat mulong wa kwirijek chakwel utwisha kuwanyish yisend ukwikala ni mu machuku ma kurutu?
NZAU JIFANYIDINAY MWIN KRISTU USWILA KUWANYISH
Kwimburij mikadil yiwamp ya Yesu kukukwash kwikal ikundj mwin Kristu uswila (Tal paragraf 4)
4. Kwisu ukutwisha kutan yilakej yiwamp ya kwimburij? (Tal kand chipich.)
4 Tond yilakej yiwamp ya kwimburij. Bibil wizwil ni yilakej yiwamp ya ansand yifanyidina kwimburij. Amakundj inay a pasak ading amukatin Nzamb ni awanyisha yisend kushalijan mulong wa kuyibangin antu end. Ukutwish kutan kand yilakej yikwau yiwamp pakach pa ansand in Kristu aswila mu dijiku dey ni mu chikumangen. (Heb. 13:7) Ukwet kand chilakej chipandikena kuwamp cha Yesu Kristu. (1 Pita 2:21) Chisu wilejina yilakej yiney nawamp tongijokin piur pa mikadil yikusangareshina ya amakundj inay. (Heb. 12:1, 2) Tal mutapu ukutwisha ku yimburij amakundj inay.
5. Mutapu ik ukutwisha kukudish ukaliweny wa kutong ni mulong wak chid cha usey? (Kuseng 119:9)
5 Kudish ni “lam . . . Manangu makin.” (Jnsw. 3:21) Ikundj ukweta manangu ukata kushinshikin yom yida kurutu kwend ni kubabal kurutu ayisala. Sal usu wa kukudish manangu makin ni kumalam. Mulong wak? Mulong mangand minam mizwil ni ansand akat kukwat mipak yimedina pa yitongijok ni pa yovil yau. (Jnsw. 7:7; 29:11) Yom yilondinau ku televizion, ku ma internet ni yom yikwau ya kupalangesh nich jinsangu yikutwish kuyipish mutapu wey wa kutong ni wa kusal yom yikwau. Pakwez, mutapu ik ukutwisha kwikal ni ukaliweny wa kutong nawamp? Sambish kwilej mbil ja Bibil ni kujitongijokin mutapu jikutwisha kukuletin yiyukish. Kupwa sadin mbil jikutwisha kukukwash kukwat mipak yikutwisha kumusangaresh Yehova. (Tang Kuseng 119:9.) Anch wakudish ukaliweny winou wa usey, ukukukwash kwikal ikundj mwin Kristu uswila. (Jnsw. 2:11, 12; Heb. 5:14) Shinshikin mutapu ukutwisha ukaliweny winou wa kutong kukukwash mu yom yaad ey: (1) piur pa urund nau anambaz (2) mu kukwat mipak piur pa kudjal ni mutapu umekena.
6. Mulong wak ukaliweny wa kutong ukutwish kumukwash mukadivar nsand kuyilimish anambaz?
6 Ukaliweny wa kutong ukukukwash kuyilimish antu amband. Chikutwish kushiken anch ukimbin kumwijik nambaz nawamp, ni chinech chiyipinap kwau. Pakwez, nsand ukweta ukaliweny wa kutong kakutwishap kulond, kufund ap kusal chom chikutwisha kumekesh mud umukatin nambaz, ching anch ukwet kamu kashinsh anch umumen nambaz winou mud murund muwamp ukutwishay kwatijan nend. (1 Tim. 5:1, 2) Anch wamutond nambaz, ufanyidin kulam nawamp mwikadil wend mu kulik kwendang ayinau pakad muntu mwin kuyitwalaku.—1 Kor. 6:18.
7. Mutapu ik ukutwisha ukaliweny wa kutong kumukwash mukadivar nsand mutapu wa kwikidish ni kudjal?
7 Mutapu ukwau ukutwishay nsand kumekesh anch ukudishin ukaliweny wa kutong chid kusutin kutond nawamp yidjal ni mutapu wa kwikidish. Yidjal yivud yipalangeshinau nlel yid antu akad kumulimish Yehova, ni yikat kuyitwal kusal yom yijondina. Yitongijok yijondina yikat kumeken mu mutapu wa kudjal masun malamina, ni mamumekeshina muntu ikundj mud mband. Chisu chitondina yom yakudjal nsand mwin Kristu uswila ukat kulik mbil ja Bibil jimutakela ni kulondul yilakej yiwamp mu chikumangen. Ukutwish kwiyipul anch: ‘Kutond kwam kukat kumekesh anch niyilimishin antu akwau? Ov, mutapu wam wa kudjal ukat kumekesh kud antu akwau anch nid kashalapol wa Nzamb?’ (1 Kor. 10:31-33; Tit. 2:6) Nsand ukweta ukaliweny wa kutong akat kumulimish kud akadivar ni anambaz kupandakanamu kand kud tatukwetu wa mwiur.
8. Mutapu ik ukutwishay mukadivar nsand kwikal muntu wa kuchingejin?
8 Ikal muntu wa kuchingejin. Nsand udia muntu wa kuchingejin ukat kuwanyish yisend yend yawonsu. (Luka 16:10) Shinshikin chilakej chipandakena kuwamp cha Yesu. Kadingap mwin usweral ap mwin kukangany kuwanyish maswir mend. Pakwez wawanyisha yisend yend yamwinkishau kud Yehova ap pa chisu chading chikasikena kusal mwamu. Wading uyikatin antu pakampwil in kwilej end, ni wading swa kupan mwom wend mulong wa awiy. (Yoh. 13:1) Mulong wa kumwimburij Yesu, chitin kusal usu wa kuwanyish yisend yikwinkishinau. Anch wijap yom ufanyidina kusal, it chiyul nich kwikepish kud akadivar aswila. Kangal kwau kusanger ching yisend yipipela. (Rom 12:11) Pakwez, wanyish yisend yey mud uyisadin ‘mulong wa Yehova, ni chidap mulong antu.’ (Kol. 3:23) Chakin kamu, udap muntu uwanyidina, chawiy ikal muntu wija mimbu yey ni itiyin kurumbuk kwawonsu usadina.—Jnsw. 11:2.
KUDISH UKALIWENY UKUTWISHA KUKUKWASH
9. Mulong wak mukadivar nsand ufanyidin kukudish ukaliweny ukutwisha kumukwash?
9 Mulong wa kwikal ikundj mwin Kristu uswila, ufanyidin kukudish ukaliweny ukutwisha kukukwash. Ukaliweny winou ukukukwash kuwanyish yisend yey mu chikumangen, kusal mudimu wa kumujimbu mulong wa kuwanyish maswir ma dijuku diey ni kwikal mu urund wa piswimp nau antu akwau. Shinshikinaku ukaliweny ukemp wa usey ulondwilaku ou.
Kwijik kutang ni kufund nawamp kukukwash ey ni chikumangen (Tal paragraf 10-11)
10-11. Kwilej kwij kutang ni kufund nawamp kukutwish nchik kumukwash mukadivar ni chikumangen? (Kuseng 1:1-3) (Tal kand chipich.)
10 Kwilej kufund ni kutang nawamp. Bibil ulondin anch wayuk muntu ukata kusutish chisu mulong wa kutang Dizu dia Nzamb ni kuditongijokin. (Tang Kuseng 1:1-3.) Kusutin kutang Bibil dichuku diawonsu ukushiken kwijik mutapu utonginingay Yehova, chinech chikukukwash kwijik mutapu wa kusadin Mifund. (Jnsw. 1:3, 4) Amakundj mud inay ad usey mu chikumangen. Mulong wak?
11 Akadivar nau anambaz akwet kuswir kwa amakundj ija kufundish ni ija kupan nawamp yiyul ya Bibil. (Tit. 1:9) Anch wij kutang ni kufund nawamp, ukutwish kurijek madiskur nawamp ni kupan yakul yikutwisha kuyikwash ni kuyikasikeshin antu. Ukutwish kand kufund nawamp yom ukwileja ni kutesh mu madiskur ku yikumangen, ku yitentam ya munyingumuku ni ya rejon. Yom yiney ukufunda yikutwish kukukwash ni kukasikesh ritiy rey ni kukwash kand nich antu akwau.
12. Yom ik yikutwisha kukukwash kwijik mutapu wa kwambamb nawamp?
12 Ileja mutapu wa kwambamb nau antu nawamp. Ikundj mwin Kristu ufanyidin kwijik kwambamb nawamp nau antu. Muntu ikundj wija kwambamb nawamp ukat kutesh nich manangu yitongijok ni yovil ya antu akwau. (Jnsw. 20:5) Ufanyidin kwijik mutapu ulondinau antu akwau, mu mazu maswapela ni kwikal mu urund ni antu. Ukwijik kusal mwamu ching anch ukat kusutish chisu nau antu. Anch ukat kusadin yom ya elektronik mulong wa kwambamb, kusadin ma email ap ma mesaj, kukutwish kukukwash kusadin ukaliweny wey wa kwambamb nau antu. Sal usu wa kukimb mitapu ya kwambamb nau antu pakampwil.—2 Yohan 12.
Chid cha usey kwilej ukaliweny ukukukwasha kwikal ni mudimu (Tal paragraf 13)
13. Yom ik yifanyidinay nsand kwilej? (1 Timote 5:8) (Tal kand chipich.)
13 Ileja kwisadinap yom amwiney. Ikundj mwin Kristu uswila ufanyidin kwijik kwisadinap yom amwinend ni antu a ku chikumbu chend. (Tang 1 Timote 5:8.) Mu jingand jimwing, akadivar ansand akat kwilej midimu yijau anvaj au ni anamakwau. Mu jingand jikwau, nsand ukutwish kwilej mudimu ap ukaliweny ukwau ku shikol. Chikalap nchik mulad win wawonsu, chid cha usey kwilej mudimu ukutwisha kukukwash kwikal ni mudimu. (Mid. 18:2, 3; 20:34; Efes 4:28) Ukwikal ni katumb kawamp anch wikasikesh kusambish mudimu ni kuupwish. Anch wasal mwamu, ukutwish kwikal mitapu ya kuman mudimu ni kuulam. Mikadil ni ukaliweny twisambina kal ey yid ya usey mulong wa kwikal ikundj mwin Kristu ukutwisha kuwanyish yisend yend mu machuku ma kurutu. El tushinshikinany yisend yimwing.
KWIRIJEK MULONG WA YISEND YA MACHUKU MA KURUTU
14. Mutapu ik ukutwishay mukadivar kwirijek mulong wa kwikal kashalapol wa chisu chawonsu?
14 Mudimu wa chisu chawonsu. In Kristu amakundj avud aswila asambisha mudimu wa chisu chawonsu padingau ansand nakash. Mudimu wa uchibol ukat kuyikwash ansand kusal mu kwovijan ni antu kushalijan. Ukat kuyikwash kand kwijik mutapu wa kusadin nfalang ni manangu ni kulik kujisadin mu mutapu wakad kuwanyin. (Fil. 4:11-13) Mutapu uwamp wa kusambish mudimu wa chisu chawonsu kud kusambish bil ni mudimu wa uchibol nkwash. Antu avud akat kusambish ni uchibol nkwash mu chisu kanang, ukat kuyikwash kwikal ni kashinsh kakwikal chibol wa rawonsu. Kusal mudimu wa uchibol ukutwish kukukwash kusal mitapu yikwau ya mudimu wa chisu chawonsu, mud kuya mu mudimu wa kutung ap ku Betel.
15-16. Yom ik yikutwisha kumukwash mukadivar nsand kwikal ankwash wa mudimu ap mukurump wa chikumangen?
15 Kwikal nkwash a mudimu ap mukurump. Amakundj in Kristu afanyidin kwitekin rutong rikutwisha kuyikwash kwikal amakurump mulong wa kuyisadin akadivar nau anambaz mu chikumangen. Bibil ulejen anch muntu ikundj anch usotin kwikal mukurump ndiy usotin “mudimu uwamp.” (1 Tim. 3:1) Kurutu kwa kusal mud mukurump, mukadivar ufanyidin kuwanyish yitinau mulong wa kusal mud nkash wa mudimu. Ankwash a mudimu akat kuyikwash amakurump mu yom yivud. Amakurump avud ni ankwash a mudimu akat kuyisadin akadivar nau anambaz nich kwikepish ni akat kwipan nich mushiku mu mudimu wa kulejan. Akadivar ansand akutwish kuwanyish yitinau mulong wa kusal mud ankwash a mudimu ap anch ad mwinshin mwa mivu makum maad. Ni nkwash wa mudimu uwanyishina yitinau ukutwish kwikal mukurump kusambish kamu mu mivu makum maad.
16 Mutapu ik ukutwisha kuwanyish yitinau mulong wa kwikal ni yisend yiney? Bibil ukwet list wa yom uswirikedina mulong wa kuwanyish yitinau. Pakwez, vurik anch mikadil yiney yawonsu yimedin pa Bibil ni pa kumukat Yehova, dijuku diey ni chikumangen. (1 Tim. 3:1-13; Tit. 1:6-9; 1 Pita 5:2, 3) Sal usu wa kwijik mwikadil mwin wawonsu. Mulembila Yehova mulong akukwasha kuwanyish yitinau.c
Yehova ukatin anch ikundj amukat mukajend ni an end ni kuyibangin ku mujimbu, mu manangu ni kuyiwanyishin maswir ma mu spiritu (Tal paragraf 17)
17. Mutapu ik ukutwishay mukadivar nsand kwirijek mulong wa kwikal ikundj ni ntakel wa dijuku? (Tal kand chipich.)
17 Muntu ikundj ni kutakel dijuku. Mud walejanay Yesu, amakundj in Kristu akutwish kushal ajich. (Mat. 19:12) Pakwez, anch ukatin kwatan, ukusend chisend cha kwikal ikundj ni ntakel wa dijuku. (1 Kor. 11:3) Yehova uyitin amakundj kuyikat akajau mu kuyiwanyishin maswir ma kumujimbu, ma mu manangu ni ma mu spiritu. (Efes 5:28, 29) Mikadil ni ukaliweny twisambina kal mu mutu wa mulong winou, mud kukudish ukaliweny wa kutong, kuyilimish antu amband ni kwikal muntu wa kuchingejin yikutwish kukukwash kwikal mbay wa uruw muwamp. Ukwikal wirijekina nawamp mulong wa kuwanyish yisend yey mud ikundj ni ntakel wa dijuku.
18. Mutapu ik ukutwishay mukadivar kwirijek mulong wa kwikal tatuku?
18 Kwikal tatuku. Kupwa kwa kwatan, ukutwish kwikal tatuku. Yom ik ukutwisha kwilejin kud Yehova mulong wa kwikal tatuku muwamp? Kud malejan mavud. (Efes 6:4) Yehova wamuleja mwanend Yesu anch: umukatin ni ukwet dilau dend. (Mat. 3:17) Anch wikal tatuku ikal ni kashinsh anch ukusambish kuyelang aney chisu chawonsu anch uyikatin. Yijikitisha mulong wa yom yiwamp yisadinau. Atatuku imburijina chilakej cha Yehova akat kuyikwash anau kwikal in Kristu amakundj ni amband aswila. Ufanyidin kwirijek katat mulong wa chisend chey kusutin kuyikat antu akwau, mu dijuku dey, mu chikumangen, ni mu kumekesh rukat rey ni kuyiman anch ad a usey kud ey. (Yoh. 15:9) Chinech chikutwish kukukwash kuwanyish yisend yey ya machuku ma kurutu mud ikundj ni tatuku. Dichuku dawonsu, ukutwish kwikal ukwash wa usey nakash ku Yehova, mu dijuku dey ni mu chikumangen.
YOM IK UFANYIDINA KUSAL KATAT?
Ansand avud ileja Mifund ni kusadin yom yilejau ikala in Kristu aswila (Tal paragraf 19-20)
19-20. Yom ik yikutwisha kuyikwash akadivar ansand kwikal amakundj in Kristu aswila? (Tal chipich cha pa chibur.)
19 Akadivar ansand, ukutwishanap kwikal kapamp kamwing in Kristu aswila. Ufanyidinany kutond yilakej yiwamp ya kwimburij, kukudish ukaliweny wa kutong, kwikal wa kuchingejin, kwilej ukaliweny ukutwisha kukukwash mu mwom ni kwirijek mulong wa yisend ya machuku ma kurutu.
20 Anch watongin piur pa yom yawonsu ufanyidina kusal, ukutwish kwiyov anch yikasiken nakash. Pakwez ukutwish kwey kuyisal. Vurik anch Yehova udaku mulong wa kukukwash. (Isay 41:10, 13) Chakin kamu, akadivar nau anambaz ney mu chikumangen akukukwash. Anch wasadin usu wey mud ikundj mwin Kristu uswila, mwom wey ukwikal uwamp ni usangareshina. Tukukatinany ey akadivar ansand! El Yehova akuyukishany nakash piusadinanya usu wa kwikal amakundj in Kristu aswila.—Jnsw. 22:4.
MUMINY 65 Yang Kurutu!
a Amakundj aswila ad a usey mu chikumangen cha win Kristu. Mu mutu wa mulong winou tukwisambin mutapu ukutwishanya en akadivar ansand kwikal amakundj in Kristu aswila.
b Tal “Kurumburil kwa Mazu” mu mutu wa mulong wasambedina ou.