El Akubatish Pakad Kulab Nakash

1. Mayingishin ik mamwing mafanyidina kukubachik kutambul dibatish?

OV, UMUKATIN Yehova Nzamb wakwinkisha ey yipan yawonsu kuwejinaku ni mwom? Ov, ukatin kumekesh anch umukatin? Mutapu uwamp wa kusal mwamu ud wa kwipan amwiney kud ndiy ni kumekesh chisal chinech patok kusutin kutambul dibatish. Anch wasal mwamu ukwikal mu dijuku da Yehova. Mud chibudikin, Nzamb uda Tatukwey ni Muruney ukukutakel ni kukubangin. (Kus. 73:24; Isay 43:1, 2) Kwipan ni kukubatish kukukwinkish kand dilau da kusanger mwom chikupu.​—1 Pita 3:21.

2. Yom ik tukwileja mu mutu wa mulong winou?

² Ov, kud chom chikukangeshina kukubatish? Anch chid mwamu, ijik anch udap kwey amwiney. Mamiliyon ma antu abatishau kurutu kwey asala usu wa kuswimp mwikadil wau ni mutapu wau wa kutong mulong wa kuwanyish yitinau kurutu kwa kuyibatish. Katat amusadidin Yehova nich musangar ni mushiku. Yom ik ukutwisha kwilejin ku chilakej cha antu abatishau mu mivu chitot ya kusambish? El tushinshikinany yikokujol yarishau nich ni tumanany yom tukutwisha kwilejin ku chilakej chau.

IN SAMARIYA AYIBATISHA

3. Yikokujol ik yela kuyikangesh in Samariya kutambul dibatish?

³ In Samariya ading mu kachisak ka relijon pa chirung cha Yesu. Avud pakach pau ading ashich kwindum kwa Yudeya. Kurutu kwa kutambul dibatish, in Samariya afanyina kwitiy yom yawonsu yida mu Dizu da Nzamb ni kudilej. In Samariya itiyang anch ching kusu mikand ya kusambish yitan ya Bibil yawiy yapepilau kud Nzamb, charumburik anch kudokal ku Disambishil djat ku Kuvurik Yijil, ni pamwing ap kand buku wa Joshua. Pakwez, kukwatijan ni kushilamu kuda mu Kuvurik Yijil 18:18, 19 in Samariya ading achingedin kwez kwa Mesiya. (Yoh. 4:25) Mulong wa kutambul dibatish, afanyina kumwitiy Yesu mud Mesiya washilawamu. “In Samaria avud” asala mwamu. (Yoh. 4:39) Akwau chayita kulik kasolikany kading kikunina kal mu michim yau pakach pa in Samariya nau in Yuda.​—Luka 9:52-54.

4. Kukwatijan ni Midimu 8:5, 6, 14, yom ik yasalau in Samariya pateshau uruu wa Filip?

⁴ Yom ik yayikwasha in Samariya kutambul dibatish? Palejanay Filip “rusangu ra Kristu” in Samariya amwing ‘itiyija dizu da Nzamb.’ (Tang Midimu 8:5, 6, 14.) Amutesha Filip ap anch wading mwin Yuda. Pamwing ap avurika maverse mamwing mada mu mikand yitan ya kusambish mamekeshina anch Nzamb kakwetap kasolikany. (Kuv. 10:17-19) “Ata matu ni kumutesh Filip nawamp” palondangay piur pa Kristu, ni itiya uman wading umekeshina anch Filip wading ukwet spiritu wa Nzamb. Wasala kand yilay yivud, chilakej woka mayej ni kwopat ayilembil.​—Mid. 8:7.

5. Malejan ik ukutwisha kwilej kusutin in Samariya?

⁵ In Samariya inay afanyina kulik kumutesh Filip mulong kadingap mwin Yuda ni mulong ading kand kal ateshangap malejan mud minam. Pakwez kasalap mwamu. In Samariya kalabishap kutambul dibatish kupwa kwa kujingunin anch Filip wayifundisha uyakin. Bibil urumburil anch: “Pitiyijau rusangu ruwamp ra Want wa Nzamb ni ra Yesu Kristu ralonday Filip, ayibatisha.” (Mid. 8:12) Ov, ukwet kashinsh anch Dizu da Nzamb did uyakin ni anch Atuman a Yehova akat kupandakan kasolikany ni kusal usu wa kumekeshijadin umwing ni mukwau rukat rakin​—rikata kuyikwash antu kujingunin anch ad in Kristu akin? (Yoh. 13:35) Komb kangal wov wom wa kutambul dibatish, ikal ni kashinsh anch Yehova ukukuyukish.

6. Chilakej cha Ruben chikutwish kukukwash mutapu ik?

⁶ Ruben, wa mu Alemany, wapamina mu dijuku da Atuman a Yehova. Chikalap nchik mwamu, padingay nsand, wading widjidjekin piur pa kwikalaku kwa Yehova. Yom ik yamukwasha kulikap kwidjidjek? Pajinguninay anch kijap kamu yom yivud pa mulong winou, wakwata mupak wa kwilej nakash. Ulondin anch: “Chisu nilejang, nading nikwet kuswir kwa kujingunin yom yida yakin ni ya makasu. Nileja tupamp tuvud mitu ya milong yisambidina piur pa mafundish ma dikarumuk.” Watanga buku Y a-t-il un Créateur qui se soucie de vous ? Buku winou wamukwasha Ruben nakash. Walonda amwinend anch: ‘Waw! Yehova udaku kamu chakin.’ Ni payay kutal biro mujim wa pa mangand mawonsu, Ruben wakata nakash uumwing wa akadivar nau anambaz ada pa mangand mawonsu. Pawanishay mivu 17 kupwa kwa kuchirik mu Alemany, amubatisha. Anch widjidjekin piur pa yom wilejina, ukutwish kupwish kwidjidjek kwinoku anch wakimbijol nakash mu mikand yetu. Kwikal ni “ronganyin rakin” kukukukwash kulik kwidjidjek. (Efes 4:13, 14) Anch watesh rapor piur pa rukat ni uumwing yida pakach pa atushalapol a Yehova ku jindond jimwing kupwa wimenap yom yiney mu chikumangen chey, rukat rey mulong wa akadivar nau anambaz a pa mangand mawonsu rikukul nakash.

SAUL WA KU TARISIS AMUBATISHA

7. Yitongijok ik yafanyinay kuswimp Saul?

⁷ Shinshikin chilakej cha Saul wa ku Tarisis. Amulidina mu Chijil cha in Yuda ni wading muntu wa piur nakash pakach pa in Yuda. (Gal. 1:13, 14; Fil. 3:5) Saul wayizengola in Kristu nakash chisu chayimanau kud in Yuda anch ad in kupumbok. Watongang anch usadin rusot ra Nzamb. (Mid. 8:3; 9:1, 2; 26:9-11) Mulong wa kumwitiy Yesu ni kutambul dibatish, Saul wafanyina kwitiy kumuzengol.

8. (a) Yom ik yamukwasha Saul kutambul dibatish? (b) Kukwatijan ni Midimu 22:12-16, mutapu ik wamukwashau Saul kud Ananias? (Tal kand chipich.)

⁸ Yom ik yamukwasha Saul kutambul dibatish? Pamumekenau kud Yesu, Saul wikala mputames. (Mid. 9:3-9) Mu machuku masatu, wajila yakuda ni chimeken anch watongijokina nakash pa yom yamushikena. Mwaning, Saul wikala ni kashinsh anch Yesu wading kamu Mesiya ni anch in kwilej end ading kamu mu relijon wakin. Pamwing ap Saul wifisha nich nakash mulong wanunga chikas ku rufu ra Stefan! (Mid. 22:20) Kupwa kwa machuku masatu, mwin kwilej umwing utazukinau anch Ananias wamusejina Saul, wamwoka ni wamukasikesha kutambul dibatish pakad kulab. (Tang Midimu 22:12-16.) Nich kwikepish, Saul witiya ukwash wend ni amubatisha.​—Midimu 9:17, 18.

9. Malejan ik ukutwisha kwilej kusutin chilakej cha Saul?

⁹ Kud malejan tukutwisha kwilej kusutin chilakej cha Saul. Wafanyina kulikidil chibud ni wom wa antu yimukangesh kutambul dibatish. Pakwez kasalap mwamu. Saul wikepisha ni waswimpa mulong wa kumulondul Kristu. (Mid. 26:14, 19) Saul wakata kwikal mwin Kristu ap anch wading wij anch akumuzengol. (Mid. 9:15, 16; 20:22, 23) Kupwa kwa kumubatish, wadandamena kuchingejin ukwash wa Yehova mulong wa kujijamen yikokujol kushalijan. (2 Kor. 4:7-10) Anch watambul dibatish mulong wa kwikal Kaman wa Yehova, ukutwish niyey kurish ni yikokujol yikutwisha kupak ritiy rey. Pakwez ukutwish kwikal nich kashinsh anch Nzamb ni Kristu akukwinkish ukwash uswirikedina mulong wa kujijaman ni kushal ushinshamena.​—Fil. 4:13.

10. Chilakej cha Anna chikutwish kukukwash mutapu ik?

¹⁰ Anna wapamina mu Erop wa kwingangel. Kupwa kwa kumubatish makwend, Anna wasambisha kwilej Bibil ni mivu 9. Tatukwend ndiy witiya anch ileja Bibil. Pakwez, chom chinech chaleta mulong kud anamakwau ading ashicha mu dijuku dau. Anamakwend amana anch chid chom cha usany nakash kud mwan kudokal mu relijon wa angakiril. Pawanishay Anna mivu 12, wamwipula tatukwend anch akutwish kwend kumubatish. Tatutwend wakata kwijik anch mupak wading udokil kud ndiy amwinend ap ang kwading muntu umubachikina. Anna wamwakula anch: “Nimukatin Yehova.” Tatukwend wamwitiyina kutambul dibatish. Kupwa kwa kumubatish Anna, anamakwend adandamena kumuzengol. Mwanamakwend umwing wamwela anch: “Chikutwish kwikal chiwamp kud ey anch wikal mukamasandj ap mwin kuna ruwand pa ndond pa kwikal Kaman wa Yehova.” Yom ik yasalay Anna? Ulondin anch: “Yehova wanginkisha usu, tatuku ni maku niyau ankwasha nakash.” Anna wasala list wa yom yamukwashau kud Yehova mu mwom wend. Washinshikinang list winou yisu yivud mulong wa kulik kuvuramen mutapu wamukwashau kud Yehova. Anch wovil wom wa kukupompat, ikal ni kashinsh anch Yehova ukukukwash niyey kujijaman.​—Heb. 13:6.

KORNEY AMUBATISHA

11. Mulong wak Korney wafanyina pamwing ap kwidjidjek kumubatish?

¹¹ Bibil wisambidin kand chilakej cha Korney. Ulejen anch: “Wading kalal wa amasalay chitot au in Rom.” (Mid. 10:1) Chom chinech chamusala kwikal muntu wa usey pakach pa antu ni mu usalay. “Ndiy wasalanga mudimu nakash wa kuyikwash atuzwendj.” (Mid. 10:2) Yehova wamutuma kambuy Pita mulong wa kumulej rusang ruwamp. Ov, mwaz wadingay nich Korney wamulabisha kutambul dibatish?

12. Yom ik yamukwasha Korney kutambul dibatish?

¹² Yom ik yamukwasha Korney kutambul dibatish? Tutangin mu Bibil anch: Wading “mwin kumwifukwil Nzamb pamwing ni dijuku diend diawonsu.” Korney wamulembilang kand Nzamb chisu chawonsu. (Mid. 10:2) Pamulejau rusang ruwamp kud Pita, ndiy ni dijuku dend amwitiya Kristu ni ayibatisha. (Mid. 10:47, 48) Korney wading ukatin kuswimp yom kanang mu mwom wend mulong wa kumwifukwil Yehova pamwing ni dijuku dend​—Jos. 24:15; Mid. 10:24, 33.

13. Malejan ik ukutwisha kwilej kusutin chilakej cha ­Korney?

¹³ Mud Saul, Korney wafanyina pamwing ap kulikidil mwaz wend umukangesh kwikal mwin Kristu. Pakwez kasalap mwamu. Ov, niyey chikwitin kuswimp yom yijim mu mwom wey mulong wa kwitiy uyakin? Anch chid mwamu, ijik anch Yehova ukukukwash. Ukukuyukish anch wakwat mupak wa kusadin mbil ja Bibil mu mwom wey mulong wa kumwifukwil.

14. Chilakej cha Tsuyoshi chikutwish kukukwash mutapu ik?

¹⁴ Tsuyoshi, uda mu Japon, wafanyina kuswimp yom kanang mu mudimu wend chakwel awanyish yitinau mulong wa kutambul dibatish. Wading nkwash a mudimu wa mukurump wa shikol ya Ikenobo yading yitadina milong ya kurijek yisalamb. Pakanganyangay mukurump wa shikol kuya ku yidil, yisu yivud Tsuyoshi wayangang pa ndond yend ni kwikalaku pa chisu chisadinau yishankur ya in Buda. Pakwez, chisu chilejay Tsuyoshi uyakin piur pa Bibil, chishankur chinech chakimba kumukangesh kutambul dibatish. Wakwata mupak wa kulik kwipan mu yishankur ya in Buda. (2 Kor. 6:15, 16) Tsuyoshi wamulejamu mukurump wa shikol. Yibudikin ik yikalaku? Tsuyoshi amulama ku mudimu ap anch kipanangap kand mu yishankur yiney. Amubatisha piswimp muvu umwing kupwa kwa kusambish kwilej Bibil.a Anch uswirikedin kuswimp yom kanang mu mudimu wey mulong wa kumusangaresh Nzamb, ikal ni kashinsh anch ukukwinkish ey pamwing ni dijuku dey yom uswirikedinanya.​—Kus. 127:2; Mat. 6:33.

IN KORINT AYIBATISHA

15. Yom ik yafanyina kuyikangesh in Korint kutambul dibatish?

¹⁵ Antu ading ashicha mu musumb wa Korint wa pakur ading akatin nakash yom ya kumujimbu ni yisal ya masandj. Antu avud asalang yom yimukisishina Nzamb. Chakin kamu, chafanyina kuyikasiken antu ading ashicha mu musumb winou kwitiy rusang ruwamp. Pakwez chisu chezay kambuy Paul mu musumb ni kulejan rusang ruwamp piur pa Kristu, “in Korint . . . avud atesha rusangu ra Yesu, amwitiyij, chad ayibatish.” (Mid. 18:7-11) Kupwa Nsalejetu Yesu Kristu wamubudikina Paul mu chilay, wamuleja anch: “Antu avud a mu musumb winou adi amam.” Chawiy Paul wadandamena kulejan mwinimwa muvu umwing ni chikunku.

16. Yom ik yayikwasha ni Korint amwing chakwel ayibatisha? (2 Korint 10:4, 5)

¹⁶ Yom ik yayikwasha in Korint chakwel ayibatisha? (Tang 2 Korint 10:4, 5.) Dizu da Nzamb ni usu wa spiritu wend utumbila yawiy yayikwasha kuswimp mwom wau. (Heb. 4:12) In Korint awonsu itiya rusang ruwamp alikap yisal mud, kuleu, wij ni utun.​—1 Kor. 6:9-11.b

17. Yom ik tukutwisha kwilejin ku chilakej cha in Korint?

¹⁷ Man anch in Korint ading ni yaku yiyimp yikunina kal, pakwez katongap anch kakutwishap kuyipandakan yaku yiney mulong wa kwikal in Kristu. Asala usu chakwel endina mwi njil yikemp yitwadina ku mwom wa chikupu. (Mat. 7:13, 14) Ov, niyey usadin usu wa kupandakan chaku chiyimp chakwel uwanyish yitinau mulong akubatish? Kangal waziy! Mulembila Yehova chakwel akwinkish spiritu wend utumbila ukutwisha kukwinkish usu wa kulik kusal yom yiyimp.

18. Yom ik wilejidina ku chilakej cha Monika?

¹⁸ Monika, wa mu Georji, wasala usu wa kulikap kulond kuyimp ni kwipuwangej kuyimp chakwel awanyisha yitinau mulong wa kumubatish. Ulondin anch: “Pinading changadim, malembil manginkishang usu nakash. Yehova wading wij anch nikatin kusal yom yiwamp, chawiy wankwasha ni kwintakel.” Monika amubatisha ni mivu 16. Ov, niyey kud yaku yiyimp ufanyidina kulikap chakwel umusadina Yehova mud mukatinay? Dandamen kumwit usu chakwel akukwasha kuswimp. Yehova ukat kupan spiritu wend utumbila kwa kwikatin.​—Yoh. 3:34.

RITIY REY RIKUTWISH KUKUKWASH KUSHEMUNIN MIKANDU

19. Yom ik yikutwisha kukukwash kupandakan yikokujol yida mud mikandu? (Tal kand chipich.)

¹⁹ Ikal ni kashinsh anch Yehova ukukatin ni ukatin anch wikala muntu wa mu dijuku dend. Chid kamu chakin, chikalap nchik yikokujol urishina nich mulong wa kukubatish. Yesu wayileja in kwilej end a mu mivu chitot ya kusambish anch: “Ang ukwetany ritiy rijim mud rubut ra mutard, ukutwishany kuulej mukandu ou anch: ‘Dokal pinap yang akwa,’ chad ukushemunik, ni kwikil chom chikukukasikenanya.” (Mat. 17:20) Antu inay alejay Yesu ading asambish kal kumulondul pasut kal kwau chisu chikemp, chawiy ading akwet kuswir kwa kukasikesh ritiy rau. Pakwez Yesu wayinkisha kashinsh anch ang ikal ni ritiy rikash, Yehova wafanyina kuyikwash kupandakan yikokujol yida mud mikandu. Niyey Yehova ukukukwash kusal mwamu!

20. Mutapu ik wakukasikesha kal yilakej ya in Kristu a mu mivu chitot ya kusambish ni a pa chirung chetu yisambinau kal mu mutu wa mulong winou?

²⁰ Anch wajingunin yom yikukangeshina kukubatish, sal usu wa kuyipandakan pakad kulab. Tan rongoj kusutin yilakej ya in Kristu a mu mivu chitot ya kusambish ni a pa chirung chetu. El chilakej chau chikukasikesh ni kukubachik kwipan kud Yehova ni kukubatish. Kwikil mupak ukwau usutinamu winou!