Nikala Mishoner ap Anch Nading Muntu Ukweta Usany Nakash

Navadika mu muvu wa 1951 mu musumb wa Vienne, mu Otrish. Dijuku detu dading mu Katolik. Pinawanyisha mivu chidivu, tatuku wasambisha kwilej ni Atuman a Yehova; ni mu kusut kwa chisu chikemp, maku niyend wasambisha kwilej nau.

Pakad kulab twikala mu chikumangen cha Döbling mu musumb wa Vienne. Mu dijuku detu, twasalang yom yivud pamwing. Twatangang ni kwilej Bibil, twakumanganang, ni twasalang mud in kwipan ku yitentam. Kudokal ku wanikanch wam, tatuku wanfundisha kumukat Yehova nakash. Tatuku walembilang chisu chawonsu chakwel am ni mwancham mband twikal ayibol. Pakwez am nadingap ni mupak wa kwikal chibol.

MUTAPU NASAMBISHA MUDIMU WA CHISU CHAWONSU

Ambatisha mu muvu wa 1965, pinading ni mivu 14. Pakwez chading chinkasikedin kuyisejin antu nakad kwijik mu mudimu wa kulejan. Niyovang mud muntu wa mwinshin nakash ni nading nikatin anch ankwat ni usey kud ayangadim akwau ap anch nadingap ni kashinsh anch yikutwish kwikal mwamu. Chawiy, chisu chikemp kupwa kwa kutambul dibatish, nasambisha kusutish chisu nau antu akad kumusadin Yehova. Ap anch nading nikatin kusutish nau chisu pamwing, kom kam kanfishang nich mulong nasutishang chisu chilemp nau antu akad kwikal Atuman. Pakwez chading chinkasikedin kuswimp. Yom ik yankwasha?

Chisu chinicha, Dorothée, changadim wading ukweta mivu 16 weza mu chikumangen chetu. Nadingaku mukurump pakemp kumusutamu ndiy. Natongang mu muchim anch: ‘Anvajam ad Atuman, pakwez dijuku da Dorothée didap kwau mu uyakin. Ushich ni makwend uyedina, pakwez chisu chawonsu ukat kubudik mu mudimu wa kulejan!’ Chilakej chend chankasikesha kusal yom yivud mu mudimu wa Yehova. Pakad kulab am ni Dorothée twasambisha mudimu wa uchibol. Kwinsambishin twading ayibol ankwash, kupwa twikala ayibol a rawonsu. Mulong Dorothée walejanang nakash, niyam nasambisha kulejan nakash mud ndiy. Wankwasha kusambish dilejan dam da kusambish da Bibil. Mu kusut kwa chisu, chasambisha kwinswapel kulejan ku chikumbu ni chikumbu, mwi njil, ni mu jindond jikwau kand.

Mu muvu wam wa kusambish wa mudimu wa uchibol, mukadivar Heinz wa mu Otrish weza mu chikumangen chetu. Wilejina uyakin mwi ngand ya Kanada payay kumutal mwanamakwend wadinga Kaman. Heinz amutuma mu chikumangen chetu mu musumb wa Vienne mud chibol wa pakampwil. Namukata kudokal kwinsambishin. Wading ukatin kwikal mishoner, pakwez am nadingap ni rusot rinira. Chawiy kwinsambishin namujindjikina yovil yam. Pakwez mu kusut kwa chisu, twasambisha kwendijadin, kupwa twatijana, ni twasambisha kusal mudimu wa uchibol pamwing mwi ngand ya Otrish.

MUPAK WA KUSAL MUD MISHONER

Heinz wanlejang yisu yivud piur pa mupak wend ma kusal mud mishoner. Pakwez kanshindinangap, wangipolang ching kusu yipul mud: “Mulong tukwetap an, ov, tukutwish kusal yom yivud mu mudimu wa Yehova?” Nova wom wa kwikal mishoner mulong nading muntu wa usany. Chakin, nasala mud chibol, pakwez chitongijok cha kwikal mishoner namana mud chimpandakedin. Pakwez nich kushimpish muchim, Heinz wadandamena kulam mupak wend. Wankasikesha kand nakash kwipan mu kuyikwash antu kusutamu kwitongin amwinam. Chiyul chend chankwasha kamu.

Pakemp pakemp, nasambisha kukudish maku ma kusal mudimu wa umishoner, chawiy twizwisha formiler mulong wa kuya ku Shikol ya Gilead. Pakwez mukadivar wadinga ntakel ku mutiy, wanleja anch nifanyidin bil kuswish Anglais. Kupwa kwa kusal usu mu mivu yisatu mulong wa kuswish Anglais, twakashimuka atutum mu chikumangen cha serbo-croate mu musumb wa Salzburg, mu Otrish. Twasadina mu teritwar winou mu mivu sambwad yalondulaku, kuwejinaku ni muvu umwing twasala mu mudimu wa munyingumuk. Dizu da serbo-croate dading dikasiken, pakwez twading ni malejan ma Bibil mavud.

Kupwa mu muvu wa 1979 atuleja kuya mu konge mwi ngand ya Bilgari. Kwinikwa mudimu wetu wa kulejan ading aukangeshin kal. Chawiy konje mwawonsu twamusutisha pakad kulejan. Pakwez twandjika ku ujindj tumikand tukemp tukemp mulong wa anambaz atan ading mu musumb ujim wa Sofia. Nova wom nakash, pakwez Yehova wankwasha mu chisend chinech chisangareshina. Kutakaman kwa anambaz inay ni musangar wading ukwetau chikalap nchik mutapu wadingau mu ubaaj wa kuyitek mu rukan yankasikesha ni kwimbachik kusal usu wam wawonsu mulong wa kuwanyish yom yangitangau kusal mu dirijek da Yehova.

Kupwa kwa chisu chikemp, twizwisha kand formiler mulong wa kuya ku Shikol ya Gilead, ni kapamp kinak atutazuka chad. Twatonga anch tukwilej mu Anglais mu Etats-Unis. Pakwez mwi Ngond wa 11, muvu wa 1981, Shikol ya Gilead yasambisha kusadikin kand mu mutiy wa Wiesbaden, mwi ngand ya Alemany. Chawiy twileja mu dizu da Alemany, dizu dading dinswapedina kutesh. Chad kwisu kwafanyinau kututum?

KUSADIN MWI NGAND MWADINGA MILONG YA NJIT NAKASH

Atutuma kusadin mwi ngand ya Kenya! Pakwez biro wa mutiy wa mwi ngand yiney watwipula anch chikutusangaresh kuya kusadin mu Uganda, ngand ya piswimp. Mu mivu dikum ya kwinyim, guvernema wa Uganda amuwisha kud Idi Amin, mukurump wa amasalay. Mu mivu yalondulaku, winyikel wend wajipesha tunan twa antu ni kumeshikish mamiliyon ma antu mar. Kupwa mu muvu wa 1979 guvernema wa Uganda amuwisha kand kakwau. Chawiy ukutwishan kwov mulong wak niyakamishaku pa kuya mwi ngand mwading milong ya njit mwamu. Pakwez Shikol ya Gilead yatufumba kumuchingejin Yehova. Chawiy twitiya.

Mwom wading ukasiken nakash mwi ngand ya Uganda. Heinz warumburila yom yiney mu Annuaire 2010 anch: “Yom yivud, . . . Mud mem yamu ya kwambambin yadingakup kand. . . . Mat ni wij yading yivulijadin, pakampwil uchuku. . . . Antu awonsu ashakamang ku yikumbu, achingejang​—ni alembilang yisu yivud—​chakwel Nzamb ayichidij uchuku.” Chikalap nchik yikokujol yiney yikash, akadivar nau anambaz mu Uganda amusadinang Yehova nich musangar!

Mu muvu wa 1982, am ni Heinz twaya mu musumb ujim wa Kampala, mwi ngand ya Uganda. Pitwashikinap, twasala angond atan kwa mukadivar Sam ni mukajend Christina Waiswa pamwing ni anau atan ni anamakwau anying. Mu dijuku da mukadivar winou yisu yivud adangang kapamp kamwing pa dichuku, chawiy chading chishimwokishena kamu pa kuman muchim wau wa kupan. Chisu twasutisha mu dijuku da mukadivar ni nambaz Waiswa, am ni nfumwam Heinz twileja malejan ma usey nakash matukwasha mu mudimu wetu wa umishoner. Chilakej, twileja mutapu wa kusadin mem nawamp, mud kwowal alitre akemp a mem, ni kusadin mu musalany mem twasadinang kal. Mu muvu wa 1983, am ni Heinz twabuukina ku chikumbu chetu, mwi ndond mwadingaku diking, mu musumb winou wa Kampala.

Twasangera kamu mudimu wa kulejan mu Kampala. Nivurikin anch ngond umwing twapana mikand 4000 ni kusut! Pakwez antu awiy ading atusangareshina nakash. Ading amulimishin Nzamb ni akatang kwambamb milong ya Bibil. Am ni Heinz twading muntu ni muntu ni malejan ma Bibil 10 kushik ku 15. Ni twileja yom yivud kusutin in kwilej etu a Bibil. Chilakej, rubing ni rubing, endang nakash mulong wa kwez ku yikumangan, pakwez kinanangap ni ading chisu chawonsu ni musangar.

Mu muvu wa 1985 ni 1986, amasalay arisha njit jikwau tupamp twaad mwi ngand ya Uganda. Twamanang yisu yivud amasalay anikanch akwet mat, ad ku jinjil mulong wa kushinshikin antu asutina. Mu chisu chinicha, twamulembilang Yehova chakwel atwinkish manang ni kutukwash kwipuk ubaaj chisu twading mu mudimu wa kulejan ni kulik kwov wom. Ni Yehova wakula malembil metu. Twavuramenang swa yakamish yetu chisu twatanijanang ni muntu usangaredina uruu wa Want.

Twakatang kand kwilej nau antu adokila jingand jikwau. Chilakej, twileja ni Murat ni Dilbar Ibatullin, ambay a uruw adokala mu Tatarstan (Risi). Murat wading dokter. Ambay a uruw inay atambula dibatish ni adandamedin kumusadin Yehova nich kushinshaman kushik ni katat. Mu kusut kwa chisu, natanijana kand ni Tatiana Vileyska, mband wadokala mu Ikren wading wovila ja kwijip. Kupwa kwa kutambul dibatish, Tatiana wachirika mu Ikren ni mu kusut kwa chisu wasambisha kusal mudimu wa kukarumun mikand yetu.a

YISEND YISU

Mu muvu wa 1991 am ni Heinz twading mu konje mu Otrish. Atutazuka kud akadivar a ku mutiy mulong wa kutulej chisend chisu cha kuya mwi ngand ya Bilgari. Mu mivu yivud, mudimu wetu wa kulejan ading aukangeshin kal mu jingand jivud ja mu Erop. Pakwez yom yaswimpa, Atuman a Yehova ayitiya kulejan mu jingand jinej, kuwejinaku ni mu Bilgari. Mud mutwalondang kwinsambishin, am ni nfumwam Heinz twandjika ku ujindj mikand yimwing mwi ngand yiney pading pakangeshinawamu mudimu wetu. Pakwez kapamp kinak atutumamu mulong wa mudimu wa kulejan.

Akadivar atuleja kulik kuchirik mu Uganda. Chawiy twachirikap kand ku chikumbu chetu cha amishoner mulong wa kusend yom ap kuyikan arunetu, pakwez twaya kapamp kamwing ku Betel wa Alemany, twasenda motak ni twaya ku Bilgari. Mu Sofia atuteka mu chirund cha in kulejan piswimp 20.

Twarisha ni yikokujol yikwau mu Bilgari. Cha kusambish, twadingap twija dizu. Chikwau kand, kwading kwau mikand yaad mu dizu da Bilgari: La vérité qui conduit à la vie éternelle ni Recueil d’histoires bibliques. Chawiy chatukasikenang kusambish malejan ma Bibil. Chikalap nchik yikokujol yiney, chisak chetu chinech chikemp cha Atuman chading kamu chikat kuya kurutu. Egliz wa Ortodox wamana chom chinech, ni pawiy kamu pasambisha rupompat.

Mu muvu wa 1994 relijon wa Atuman a Yehova kamwitiyijangap kand kud guvernema, ni antu avud a mu Bilgari amumanang mud wa ubaaj. Akadivar amwing ayikwata. Apalangesha nsang ja makasu ku maradio ni matelevizion anch Atuman a Yehova akat kuyijip anau ni kuyibachik antu akwau kwijip. Chatukasikena am ni Heinz kusal mudimu wa kulejan. Yisu yivud twatanang antu akweta chisum, atutoyang, atwasang yom ni kutazuk amasalay. Kwadingap mutapu wa kwandjik mikand mwi ngand, ap kuman ndond ya kufutin mulong wa kusal yikumangan. Dichuku dimwing amasalay imika chitentam chetu. Am ni Heinz twadingap twijidina rukis ra mutapu winou. Twamana kamu kushalijan kujim pakach pa antu inay ni antu a mwi ngand ya Uganda, ading akatina kwilej Bibil. Yom ik yatukwasha kwijidin?

Kusutish chisu pamwing ni akadivar nau anambaz kwawiy kwatukwasha. Ading akwet musangar mulong wa uyakin wajinguninau ni ading asangaredin ukwash wetu. Twading mu uumwing ni twakwashijanang umwing ni mukwau. Mu yom yiney yawonsu twileja anch tukutwish kwikal ni musangar mu chisend chin chawonsu chitwinkishinau anch twayitongin antu akwau pa ndond pa kushinshikin pa milong yetu.

Pakwez mu kusut kwa chisu chatuswapela kulejan. Mu muvu wa 1998, dirijek detu aditiyija kand kud guvernema ni mikand yetu yivud yikalaku mu dizu da Bilgari. Kupwa mu muvu wa 2004 atunga biro musu wa mutiy. Nlel mu Bilgari mud yikumangen 57 nau in kulejan 2 953. Muvu wa mudimu wasutina ou, antu 6 475 akumangana ku Chivurikish. Ap anch kwisambishin kwading kwau anambaz atan mu Sofia, pakwez katat tukwet yikumangan chidivu! Am ni nfumwam twamana kamu kuwanyin kwa uprofet umekeshina anch dijuku dikemp dikez kikal muchid ujim.​—Isay 60:22.

YIKOKUJOL NARISHA NICH MU MWOM WAM

Mu mwom wam narisha ni yikokujol yivud piur pa ukash wa mujimbu. Mu kusut kwa mivu, a docter anleja anch nikwet kanser jindond jivud, kuwejinaku ku wong. Kupwa kwa kwingok kusutin radiothérapie, angopera mu asa 12 mwi ngand ya Inde mulong wa kwok kanser. Kupwa kwa kwiyov nawamp ku mutiy wa Inde, twachirika mu Bilgari mulong wa kuwanyish kand chisend chetu.

Pa chisu chinicha, Heinz niyend wayela mayej matazukinau anch Huntington, makad kwijikan nakash maswanay kud anvaj end. Chading chimukasikedin kwend, kunyikek nakash ni kulond. Changita kumukwash nakash mulong mayej madandamena kukasikan. Yisu yimwing naziyang nakash ni niyakamishang mulong nadingap ni kashinsh anch nikutwish kudandamen kumulam. Pakwez Bobi, mukadivar umwing nsand wayangang ni Heinz yisu yivud mu mudimu wa kulejan. Bobi kwovangap kwend usany wa antu mulong Heinz kalondangap kwend nawamp ni kendangap nawamp. Yisu yivud namuchingejinang Bobi anch nikwetap mutapu wa kumukwash nfumwam. Ap anch twakwata mupak wa kulik kuval mu mangand minam, pakwez twiyova anch Bobi wading mwan ikuny watwinkishay Yehova!​—Mar. 10:29, 30.

Heinz niyend warisha ni kanser. Cha ushon nfumwam mukatish wafa mu muvu wa 2015. Niyova anch nidap kamu mu diking kupwa kwa rufu ra Heinz, chading kwau mud chilat. Nikat kumutongang nakash, chawiy kud am chid mud uchid kwend mwom! (Luka 20:38) Nikat kuvurik yisu yawonsu mazu mend ma rukat ni yiyul yend ya manang. Nikwet musangar nakash mulong wa mivu twasutisha nend pamwing mulong wa kumusadin Yehova.

NIMUJIKITISHIN YEHOVA MULONG WA UKWASH

Chakin kamu Yehova wankwashin kal mu yikokujol yam yawonsu. Wankwashin kal kand kupandakan usany wam ni kuyikat antu awonsu. (2 Tm. 1:7) Nimujikitishin kand Yehova mulong am ni mwancham tud etu awonsu mu mudimu wa chisu chawonsu. Nlel, ndiy ni nfumwend ad mu mudimu wa munyingumuk wa dizu da Serbi, mu Erop. Chinech chid chakul ku malembil masalangay tatuku pitwading anikanch!

Dilejan dam da Bibil dikat kwinkwash kwikal ni chisambu cha mu manang. Mu yirung yikash nilejin kal kulembil “chipandakena” mud mwasalay Yesu. (Luka 22:44) Yehova ukat kwakul ku malembil mam kusutin rukat rikatau kwinmekeshin kud akadivar nau anambaz a mu chikumangen cham cha Nadezhda, mu Sofia. Akat kwintazwok kusutish nau chisu pamwing ni kumekesh anch ansangaredin, chinech chikat kwinkasikesh nakash.

Yisu yivud nikat kutongijokin pa divumbuk. Nikat kusal mud nimen dijuku dam dawonsu pamwing, anvaj am ad kand ansand mud patijanau. Nimumen mwancham ukat kwisuk yakuda. Mud nimumen kand Heinz ushich piswimp ni kabar wend. Kutongijokin pa yom yiney kukat kudosh manang mayimp mangezina, ni kwimbachik kumujikitish Yehova.

Anch natongin pa yom yawonsu yiwamp yangikishinay kal Yehova mu mwom wam ni kushinshikin mes mam pa yom yiwamp yikwingikay machuku ma kurutu, nikat kwiyov mud mwiyovay David palonday mazu mada mu Kuseng 27:13, 14, anch: “Chakin, nikwet ruchingej ra kuman kuwap kwa Yehova mwi ngand ya aom! Muchingeja [Yehova], ikal mukash, muchim wey ujijaman. Inge, muchingeja [Yehova].”