Ov, Chinfanyidin Kulikap Kwendish?

Ov, yom mud yiney yikushikedin niyey? Anch mwawiy, yom ik yikutwisha kukukwash kuman anch ukudandamen kwendish ap bwat?

Mu jingand jimwing anch muntu wawanish mivu kanang chitin kumwinkish mikand kud dokter yimekeshina anch amwitiyijin kudandamen kwendish. In Kristu ashicha mu jingand jinej akat kuziyin mbil ni mipak yikwatinau antakel. (Rom 13:1) Pakwez ap anch mwi ngand yen mwikil kwau yijil ya mutapu winou, kud yitongijok yikutwisha kukukwash kuman anch ukwet kand mutapu wa kudandamen kwendish nawamp pakad kwitek mu ubaaj.

SHINSHIKIN MUTAPU WEY WA KWENDISH

Mud mulejenau pa kapend ka l’Institut national du vieillissement mu Etats-Unis, ukutwish kusambish kwiyipul yipul mud:

• Ov, chikat kwinkasikenang kushishikin yijingidij ya njil ap kuman nawamp uchuku?

• Mulong wa kuvul kwa mivu, ov, chikat kwinkasiken kukarumun mutu mulong wa kutal makalash malejena kwinyim ni kufumb nawamp?

• Ov, chikat kwinkasiken kuzambul mwend swa, chilakej kuudosh pakuwejin mau ni kuutek pa kukepishin mau?

• Ov, nikat kwendish pakemp pakemp kushik mu chilik cha kuletikish kanrumbangesh mwi njil?

• Ov, machuku ma kwinyim am chanshikedin kukimb kusal aksidan tupamp tuvud, ap ov, motak wam wabwanyokin mulong wa kububol ku yom?

• Ov, ankwatodin kud amasalay mulong nendishin nayimp?

• Ov, chikat kwinshiken kuzel tul chisu nendishina?

• Ov, ninil mwon ukutwisha kwikal ni yibudikin pa mutapu wam wa kwendish?

• Ov, antu a mu dijuku dam iyakamishin mulong nikat kwendish motak?

Ang chakul chey chid anch mwaning ku chipul chimwing ap yaad ku yipul yiney, ijik anch chid chisu cha kuswimp yom yimwing. Chilakej, ukutwish kukwat mupak wa kulik kwendish yisu yivud, pakampwil uchuku. Yisu yawonsu dandamen kushinshikin mutapu wey wa kwendish. Ukutwish kumwipul muruney ap muntu wa mu dijuku dey chakwel akulej yom yimenay piur pa mutapu wey wa kwendish. Pamwing ap ukutwish kwilej yom yikwau piur pa mutapu wa kwendish amwiney. Pakwez ang wakulang anch mwaning ku yipul yivud yipulangau kwiur oku, ijik anch chid chisu cha kwimik kwendish motak.a

LIK MBIL JA BIBIL JIKUTAKEL

Tukutwish kukangany kujingunin anch ukaliweny wetu wa kwendish uyil mu kukep. Ni chitongijok cha kwimik kwendish chikutwishap kutusangaresh. Chawiy, mbil ik ja Bibil jikutwisha kukukwash kwikal ni chitongijok chiwamp piur pa mashakamin mey ni kukukwash kukwat mupak wa manang? Shinshikin mbil jaad ej:

Ikal wisikena. (Jnsw. 11:2) Pituyila mu kananap, chikusambish kutukasiken kuman nawamp, kutesh, usu wa mujimbu ukat kukep ni mutapu wa kuman yom ukat kuswimp. Chilakej, antu avud akat kwimik masengan mamwing payilau mu kananap, mulong akat kuman anch ang adandamen akutwish kwitek mu ubaaj. Mbil yiney yitadin kand milong ya kwendish. Kushik mu chisu kanang, muntu wisikena ukutwish kukwat mupak wa kwimik kwendish mulong wa kulik kwitek mu ubaaj. (Jnsw. 22:3) Ni anch antu akwau amulej mutapu wiyakamishinau piur pend, muntu wisikena ukat kwishil chisu cha kuyitesh.​—Ilakej ni 2 Samwel 21:15-17.

Ipuk kumwang mash. (Kuv. 22:8) Motak ukutwish kwikal wa ubaaj nakash anch twalik kuwendish nawamp. Muntu udandamedina kwendish ap anch ukaliweny wend wa kwendish wakepin kal ukutwish kutek mwom wend ni wa antu akwau mu ubaaj. Ni ukutwish kusal aksidan ni kumwang mash.

Anch urishin mulong wa kukwat mupak ukash wa kudandamen kwendish ap bwat, ipuk chitongijok cha kwel anch kakukukwatap kand ni usey kud antu. Yehova ukukatin mulong wa mikadil yey yiwamp mud kwikepish, kwikal wisikena, ni muchim wey wa kuyibangin antu akwau. Ni ukanin kukukwash ni kukukasikesh. (Isay 46:4) Kakukulikap bwat. Chawiy, mwita chakwel akukwash kusadin manang ni ukaliweny wa kujingunin chisu ukimbina kukwat mupak wa kudandamen kwendish motak ap bwat.