Lam Musangar Wey Chisu Ulamina Ipal ap Muyej

1-2. Yehova ukat kuyikwat nchik antu ayilamina akwau? (Jinswir 19:17) (Tal kand yipich.)

MUKADIVAR Jin-yeol wa mu Kore ulondin anch: “Am ni mukajam twatijana kwasut kal mivu 32. Mu mivu yitan yasutang ey, nad mwin kumulam. Wayela nakash ni chamukasikenang kunyikek. Nimukatin mukajam nakash ni nikatin kumulam nawamp. Uchuku wawonsu, ukwet kuswir kwa kulal pa ulal ukwatijadina ni ukash wa mujimbu wend. Nikat kulal ku kabet kend ni tukat kulamijanaku ku makas.”

² Ov, ulamin muntu kanang ukatina, chilakej nvaj wey, mwaney ap muruney? Anch mwawiy, usangaredin dilau ukweta da kumukwash amwiney pakampwil. Kusutin kumulam muntu ukatina, umekeshin anch umuziyidin Yehova. (1 Tim. 5:4, 8; Yak. 1:27) Chakin kamu, urishin ni yikokujol yakadau antu akwau kuman. Yisu yimwing, ukutwish kuman anch yey kwey umena mar. Antu akutwish kukuman ukat kusip, pakwez kakutwishap kwijik anch yisu yimwing ukat kudil chisu uda kwa amwiney. (Kus. 6:7) Yehova umen ni wij chisu chawonsu mutapu wiyovila ap anch antu akwau kijap. (Ilakej ni Kubudik 3:7.) Ukwatin nich usey mansoj mey ni usu usadina. (Kus. 56:8; 126:5) Ukat kushinshikin yom yawonsu usadina mulong wa kumukwash muntu ukatina. Yehova ulondin anch ang twamubangin muntu tukatina chid mud tukat kumusondjik, ni ndiy ukutufut mulong wa yom tusadina.​—Tang Jinswir 19:17.

3. Yikokujol ik yarishay nich Aburaham ni Sar mulong wa kumulam Tera?

³ Mu Bibil mud yilakej ya amakundj ni amband avud ayilama antu akwau. El tushinshikinan chilakej cha Aburaham ni Sar. Padokalau mu musumb wa Ur, tatukwau Tera wading ni mivu piswimp 200. Chikalap nchik mwamu, waya nau pamwing. Enda mu weny wa akilometre 960 mulong wa kushik ku Haran. (Dis. 11:31, 32) Pakad kwidjidjek, Aburaham ni Sar ading amukatin Tera, pakwez tongijokin pa yikokujol yafanyinau kurish nich mulong wa kumulam, pakampwil chisu chadingau mu weny. Chimeken anch endinang pa atumel nau ayimbur, chinech chafanyina kumukasiken nakash Tera wada wapamina kal. Yisu yimwing afanyina kuziy. Pakwez chikalap nchik mwamu, Yehova wayinkisha usu wading uswirikedinau. Mud mwamukwashay Aburaham ni Sar, Yehova ukukwinkish kand niyey usu uswirikedina mulong wa kudandamen kumulam muntu ukatina.​—Kus. 55:22.

4. Yom ik tukwisambina mu mutu wa mulong winou?

⁴ Musangar ukutwish kukukwash kudandamen kumubangin muntu ulamina. (Jnsw. 15:13) Vurik anch ukutwish kudandamen kulam musangar wey chikalap nchik yikokujol. (Yak. 1:2, 3) Mutapu ik ukutwisha kwikal ni musangar mud winou? Ukutwish kusal mwamu kusutin kumulembil Yehova ni kumuchingejin, kumwit chakwel akukwash kulam chitongijok chiwamp. Mu mutu wa mulong winou tukwisambin yom yikwau yikutwishay kusal muntu ulamina muyej ap ipal mulong wa kwikal ni musangar. Tukuman kand mutapu ukutwishau antu akwau kumukwash. Cha kusambish, el tushinshikinany yom yiswirikedinay muntu ulamena mulong wa kwikal ni musangar ni yikokujol yikutwisha kukepish musangar wend.

MULONG WAK CHISWAPELAP KWIKAL NI MUSANGAR CHISU TUMULAMINA MUNTU?

5. Mulong wak antu ayilamina akwau afanyidin kulam musangar wau?

⁵ Anch antu ayilamina akwau ashadish musangar wau, chikat kuyiziyish. (Jnsw. 24:10) Ni anch aziy, kakutwishap kand kumwanaken muntu ulaminau ap kumukwash mud muchifanyidina. Yikokujol ik yikutwisha kukepish musangar wau?

6. Mulong wak antu ayilamina akwau akutwish kuziy nakash?

⁶ Antu ayilamina akwau akutwish kuziy nakash. Nambaz Leah ulondin anch: “Ap dichuku disutina kwau nawamp, antu alamena akutwish kuziy mu manang; mwamu nikata kwiyov. Yisu yimwing nikat kuburen ni usu wa kwakul ku uruu.” Antu akwau chiyikasikedining kwikal ni chisu cha kulal ap cha kwipuwangej. Nambaz Inés ulondin anch: “Chinswapediningap kulal nakash. Yisu yivud nikat kulank uchuku kupwa kwa asaa aad mulong wa kumubangin mawenam. Am ni nfumwam, twasal kal mivu yivud pakad kuya mu konje.” Amwing kakwetingap mutapu wa kusutish chisu nau arunau ap kusal yom yivud mu mudimu wa Yehova mulong wa kuyibangin nakash anamakwau. Mud chibudikin, akutwish kwiyov anch ad kwau ayinau mulong katwishinap kusal yom yawonsu yikatinau.

7. Mulong wak antu amwing alamena akat kwifish nich ap kunenganan?

⁷ Antu ayilamina akwau akutwish kunenganan nakash ap kwifish nich. Nambaz Jessica ulondin anch: “Yisu yivud nikat kwiyov anch nifanyidin kusal yom yivud nakash mulong wa kumukwash tatukwam. Ni nikat kwiyov nayimp nakash chisu nikata kusal yom mulong wa kwibangin amwinam.” Antu amwing ayilamina akwau akutwish kwifish nich yisu yimwing mulong kasangaredinap mashakamin mau. Akwau akutwish kwiyakamish mulong kasadinap yom yivud yifanyidinau kusal mulong wa kuyikwash akatish nau. Akwau kand akutwish kwifish nich mulong yisu yimwing ajimana ni kulond yom yayitapa ku muchim antu akwashinau. (Yak. 3:2) Pakwez antu akwau akat kunenganan nakash anch aman muntu ulaminau ukat kudandamen kuyel. Nambaz Barbara ulondin anch: “Chikokujol chikash kud am pakach pa yikokujol yawonsu kud kuman mayej ma mukatish nam makat kudandamen kukasikan dichuku dawonsu.”

8. Let chilakej chimekeshina mutapu ukutwisha mazu makemp ma kujitish kwikal ni usu pad muntu ulamena.

⁸ Antu alamena akutwish kwiyov anch yom yisadinau kayisangaredinap kud antu akwau. Mulong wak? Mulong kakatap kuyijikitish chisu chawonsu mulong wa usu usadinau ni mudimu wau ukash. Kulond mazu makemp kwau mulong wa kuyijikitish kukutwish kuyisal nawamp nakash. (1 Tes. 5:18) Nambaz Melissa ulondin anch: “Yisu yimwing nadila mulong wa kuziy. Pakwez chikat kwinkasikesh anch muntu nibangidina wangel anch ‘wajikit nakash mulong wa yom winsadidina!’ Mazu mud minam makat kwinkwash kulank ni usu ni kwinkwash kudandamen kand kumubangin.” Mukadivar Ahmadu ulejen mutapu ukatay kwiyov anch amujikitish. Ndiy ni mukajend akat kumulam musanyau changadim ushicha nau, uyedina nakash. Ulondin anch: “Ap anch kakutwishap kamu kuman usu tusadina mulong wa kumulam, nikat kwov musangar nakash anch watujikitish ap anch wafund kwend tumazu tukemp anch ‘nikukatinany.’”

MUTAPU WA KUDANDAMEN KULAM MUSANGAR

9. Mutapu ik ukutwishau antu ayilamina akwau kwijik mimbu yau?

⁹ Ijik mimbu yey. (Jnsw. 11:2) Etu awonsu tukwet mimbu piur pa chisu ni usu tukweta. Chawiy chikutwish kukwit kwitekin mimbu pantaliken ni yom ukutwisha kusal ap kulik kusal. Chiyipinap kwau kusal mwamu! Pakwez ukumekesh anch wij mimbu yey. Anch antu akwau akimb kukukwash, itiy ukwash wau nich musangar. Mukadivar Jay ulondin anch: “Dichuku dawonsu tukutwish kusal kusu yom kukwatijan ni chisu ni usu tukweta. Anch twalik kusutish pa yom tukweta mutapu wa kusal, tukutwish kulam musangar wetu.”

10. Mulong wak chid cha usey kud muntu ulamena kwikal mwin kujingunin yom? (Jinswir 19:11)

¹⁰ Jingunin yom yimubachikina muntu kusal chom kanang. (Tang Jinswir 19:11.) Kwikal mwin kujingunin yom kukukukwash kulik kujiman swa anch akurumbukin. Muntu wa mutapu winou ukat kusalang usu wa kujingunin yom yimubachikina muntu kusal chom mu mutapu kanang. Chakin kamu, mayej mamwing malabina kal nakash makutwish kumubachik muntu kusal yom yakad kuwanyin. (Mul. 7:7) Chilakej, muntu ukweting kwend yisal yiwamp ni kulond kwa kalimish, ukutwish kusambish kupwitamijan ney. Ukutwish kwikal ni kada katun ap ukasikena kusangaresh. Anch umulamin muntu uyedina nakash, chikwikal cha usey kwijik yom yivud piur pa mayej mend. Kwijik nawamp mayej mend kukutwish kukukwash kutesh anch yom yilondinay ap yisadinay yid kwau mulong wa mayej mend, kadap mulong ukatin kusal mwamu.​—Jnsw. 14:29.

11. Yom ik ya usey nakash yifanyidinay muntu ulamena kusal dichuku dawonsu? (Kuseng 132:4, 5)

¹¹ Ikal ni chisu cha kukasikesh urund wey ni Yehova. Yisu yimwing, chikukwit kulik kusal yom yikwau mulong wa kusal “yom yida ya usey nakash.” (Filip 1:10) Chom chimwing pakach pa yom yiney, kud kukasikesh urund wey ni Yehova. Mwant David wateka difukwil da Yehova pa ndond ya kusambish. (Tang Kuseng 132:4, 5.) Chilik chimwing, niyey chid cha usey kwishil chisu mulong wa kutang Bibil dichuku dawonsu ni kulembil. Nambaz Elisha ulondin anch: “Nikat kulam musangar wam anch nalembil ni kutongijokin pa kuseng ukasikeshina. Kumulembil Yehova chawiy chom chikata kwinkwash nakash. Yisu yimwing nikat kulembil dichuku dakabuj mulong wa kwiyov pee.”

12. Mulong wak antu alamena afanyidin kwikal ni chisu cha kubangin ukash wau wa mujimbu?

¹² Ikal ni chisu cha kubangin ukash wey wa mujimbu. Antu alamena akwatakening nakash, chawiy chikutwish kuyikasiken kwikal ni ukash wa mujimbu uwamp mulong kakwetap chisu chivud cha kuland ap kwisuk yakuda yiwamp yitungina mujimbu. Yakuda yiwamp ni kwikal ni program muwamp wa kwiyijidish yid ya usey mulong wa kwikal ni ukash uwamp wa mujimbu. Chawiy sadin nawamp chisu chikemp ukweta kusutin kuda yakuda yitungina ni kwiyijdish chisu chawonsu. (Efes 5:15, 16) Chikwau kand, sal usu wa kulal nakash. (Efes 4:6) Antu akata kwilej milong ya wong alondin anch tul tukat kuukwash wong kwiyok awinau. Mutu wa mulong umwing wisambidina yom ya chimwingang ulondin anch: Muntu ukata kulal tul nakash ukat kukepish yakamish ni chikat kumuswapel kurish ni yishiken yikash. Chid kand cha usey kwishil chisu mulong wa kwipuwangej. (Mul. 8:15) Muntu umwing wading ulamena ulejen yom yamukwasha kwikal ni musangar. Ulondin anch: “Ang kwiur kwacha nawamp nikat kubudik pol ni kusanger ka chitokish ka muten. Ngond ni ngond nikat kwitenchik kand mulong wa kusutishaku chisu pamwing ni murunam, ni tukat kusal yom yitusangareshining nakash.”

13. Mulong wak chid cha usey kusipaku? (Jinswir 17:22)

¹³ Ikal ni chaku cha kusipaku. (Tang Jinswir 17:22; Mul. 3:1, 4) Kusip kukutwish kukukwash kukepish yakamish. Yisu yivud, anch umulamin muntu, yom yikatap kamu kusadik mud muutongina. Pakwez anch chikuswapedin kusipaku mu yishiken yikash, ukutwish kwijidin mashakamin mey. Kusip nau antu ulamina, kukutwish kusal anch ukatijanany nakash.

14. Kwambamb ni murund uchingejidina kukutwish kukukwash mutapu ik?

¹⁴ Ambamb ni murund uchingejidina. Ap anch usadin usu wa kulam musangar wey, yisu yimwing ukutwish kuziy. Chawiy yisu mud yiney, chikutwish kwikal cha usey nakash kwambamb ni murund muwamp—murund muwamp ukutwisha kukutesh pakad kukurumburish mulong wa yom ulondina. (Jnsw. 17:17) Mutapu wend wa kutesh ni mazu mend makasikeshina, yikutwish kwikal yom uswirikedina mulong wa kulam musangar wey.​—Jnsw. 12:25.

15. Kwisambin piur pa Paradis kukutwish nchik kukukwash kwikal ni musangar?

¹⁵ Tongin mutapu ukwikala mwom wen mu Paradis. Ikasikesha kulam mu manang anch uyilamin kwey mu chisu kanang, ni Yehova katenchikap anch antu asala yom ya mutapu winou. (2 Kor. 4:16-18) “Mwom wakin” wawiy wezina mu machuku ma kurutu. (1 Tim. 6:19) Ukwikalany ni musangar nakash anch wisambinany yom ukatinanya kusal mu Paradis pamwing ni muntu ulamina. (Isay 33:24; 65:21) Nambaz Heather ulondin anch: “Nikat kumulej muntu nilamina anch piswimp ap tukuchim yom pamwing, tukuya mau pamwing ni tukwendish jinking pamwing. Tukosh mikat ni kwisuk yakuda ya akatish netu akuvumbuka. Tukat kumujikitish Yehova pamwing mulong wa ruchingej tukweta.”

MUTAPU UKUTWISHAU ANTU AKWAU KUKWASH

16. Mutapu ik tukutwisha kumukwash muntu ulamena uda mu chikumangen chetu? (Tal kand chipich.)

¹⁶ Yikwasha antu alamena chakwel niyau ishadinaku. Etu awonsu mu chikumangen tukutwish kumukwash muntu ulamena kusutin kusutishaku chisu ni muntu ulaminay. Mwamu tukumukwash muntu ulamena kuchirishaku usu ni kusalaku yom yend. (Gal. 6:2) Akadivar nau anambaz amwing atenchikin kal program wa pa rubing mulong wa kuyikwash antu alamena. Nambaz Natalya, ukweta nfumwend wakad kwendang ulondin anch: “Mukadivar umwing wa mu chikumangen ukat kwez mulong wa kusutish chisu pamwing ni nfumwam kapamp kamwing ap twaad pa rubing. Ukat kuya nend mu mudimu wa kulejan, akat kwambamb ni kutal kand mafilm pamwing. Yisu mud yiney yid ya usey nakash kud nfumwam ni yikat kwinkwash kwikal ni chisu cha kuwanish maswir mam, mud kubudikaku pol ni kwendangan.” Yisu yimwing, chikutwit kulalaku ni muntu ulaminau chakwel muntu ulamena niyend alalaku tul nawamp.

17. Mutapu ik tukutwisha kuyikwash antu alamena pa yisu ya yikumangan?

¹⁷ Yikwasha antu alamena chisu cha yikumangan. Antu alamena kakutwishap kamu kutesh nawamp yom yifundishinau ku yikumangan ap ku yitentam mulong akwataken nakash mu kuyilam akatish nau. Antu awonsu mu chikumangen akutwish kukwash anch amwing ashakamaku ni muntu wapamina kal ap uyedina, pa chisu cha yikumangan ap pa chisu cha chikunku kanang. Anch muntu wapamina kal ap uyedina kakwetap mutapu wa kudokal ku chikumbu, tukutwish kwipan mulong wa kushalaku nend chakwel muntu umulamina aya ku yikumangan.

18. Yom ik yikwau tukutwisha kusal mulong wa kuyikwash antu alamena?

¹⁸ Lembil mulong wa antu alamena ni yikasikesha. Chisu chawonsu, amakurump afanyidin kuyendin antu alamena mulong wa kuyikasikesh. (Jnsw. 27:23) Chikalap nchik mashakamin tukweta, etu awonsu mu chikumangen tufanyidin kuyikasikesh ni kuyilembil antu alamena. Tukutwish kumwit Yehova chakwel adandamen kuyikasikesh ni kuyikwash kulam musangar wau.​—2 Kor. 1:11.

19. Yom ik tuchingedina machuku ma kurutu?

¹⁹ Piswimp ap, Yehova ukudosh yom yawonsu yikata kutuletin mar ni mayej. Mayej ni rufu yikwikalapaku kand. (Kuj. 21:3, 4) “Ayishet akez kamatok mudi atubaj.” (Isay 35:5, 6) Yibudikin yiyimp yidokiling ku upal ni kusansan kukata kudokal ku kumulam muntu tukatina uyedina yikwikal pakach pa ‘yom ya pakur tukeza kavuramen.’ (Isay 65:17) Kusambish nlel, pituchingedina kuwanyin kwa ruchingej retu riner ruwamp, Yehova kakutulikap bwat. Anch twadandamen kumuchingejin chakwel atukasikesh, ukutukwash “[kujijamen] yom yawonsu nich kushimpish muchim ni musangar.”​—Kol. 1:11.