Lam Musangar Wey Chikalap Nchik Upal

1-2. Yehova uyimening mutapu ik atushalapol end amapal ashinshamena? (Kuseng 92:13-15; tal kand chibur.)

ANTU avud pa mangand akat kutong yom kushalijan piur pa upal. Chilakej, tong bil: Ov, uvurikin chisu wasambisha kuman nsuk jitok ku mutu wey? Wova pamwing ap ja kujidosh kurutu kwa antu kujiman. Pakwez wamana anch kujidosh kukukangeshap jikwau kutok. Chilakej chinech chimekeshin anch chiyikasikedining antu avud kwitiyin anch apam kal.

² Pakwez Yehova ukat kuyiman atushalapol end apamina kal mu mutapu windj. (Jnsw. 16:31) Uyifanakeshin ni mitond yisongina mabuj mawamp. (Tang Kuseng 92:13-15.) Mulong wak kufanakesh kwinoku kuwanyidin kamu? Mitond yalabina kal yikweting mayij mabikitina ni yisalamb yikweta didjimb diwamp. Chilakej, kud mulad wa mitond yimwing yidinga mwi ngand ya Japon yasadina kal mivu yivud. Yimwing pakach pa mitond yiney yikwet mivu 1000 ni kusut. Mud mitond yiney, atushalapol ashinshamena a Nzamb akwet usey nakash, pakampwil ku mes Kwend. Yehova kakumanangap kusu njivu, pakwez ukat kuman wuntu wa amapal inay. Ni ukwatining nich usey mikadil yau yiwamp, mud kujijaman ni kushinshaman, kuwejinaku ni mivu yivud yasutishinau kal mu kumusadin nich kushinshaman.

3. Let chilakej chimekeshina mutapu wayisadinau amapal kud Yehova mulong wa kuwanyish rusot rend.

³ Usey wa muntu ukukepangap ku mes ma Yehova mulong wa upal.a Yisu yivud Yehova ukat kuyisadin amapal mulong wa kuwanyish rusot rend. Chilakej, Sara wading wapamin kal nakash pamulejau kud Yehova anch ukwikal maku wa muchid ujim ni ngakiril wa Mesiya. (Dis. 17:15-19) Moses niyend wading ukwet mivu yivud chisu chamulejau kud Yehova kuyikwol In Isarel mu Idjibit. (Kub. 7:6, 7) Ni kambuy Yohan wading wananapin kal pamupepilau mulong wa kufund mikand yitan ya Bibil.

4. Kukwatijan ni Jinswir 15:15, yom ik yikutwisha kuyikwash amapal kujijamen yikokujol yau? (Tal kand chipich.)

⁴ Antu apamina kal akat kurish ni yikokujol yivud. Mu maswimbu, nambaz umwing warumburila anch upal chidap chom chiswapela. Pakwez musangarb ukutwish kuyikwash amapal kujijamen yikokujol yau. (Tang Jinswir 15:15.) Mu mutu wa mulong winou, tukuman yom yikutwishau kusal antu apamina kal mulong wa kulam musangar wau. Tukuman kand mutapu ukutwishau antu akwau kuyikwash akadivar ni anambaz amapal a mu chikumangen chau. Twisambinany bil chakusambish yom yikutwisha kusal anch chitukasiken kulam musangar wetu pituyila kunanap.

UPAL UKUTWISH KWIKAL NI YIBUDIKIN IK PA MUSANGAR WEY?

5. Yom ik yikutwisha kuyiziyish antu apamina kal?

⁵ Yom ik yikutwisha kukuziyish? Pamwing ap ukutwish kuziy mulong utwishinap kand kusal yom yiwasalang pakur. Ap ukat kutong chisu chiwading nsand ni mukash ku mujimbu. (Mul. 7:10) Chilakej, nambaz Ruby ulondin anch: “Chinkasikedin kudjal masun mulong nikatap kutwish kushemunik mud munasalang pakur ni mulong ku mujimbu kwinsansen chisu chawonsu. Ap kuzambul kusu kwau mend mulong wa kudjal mashoset kwinkasikedin. Makas mantalel ni kwinsum, chawiy chinkasikedin kusal chom ap chimwing, ap chida kwau chikemp.” Harold, wasadina ku Betel ulondin anch: “Yisu yimwing najimanang mulong natwishangap kusal yom nasangerang kusal pakur. Nading nikatin kwiyijidish nakash. Masengan nading nikatina nakash mading basket. Akwetu alondang anch: ‘Mudjubwilany Harold mulong ndiy kakurezangap.’ Pakwez katat, nitongin anch nikutwishap ap kudjubul ndundu.”

6. a) Yom ik yikwau yikutwisha kuyishikij antu apamina kal kuziy? b) Yom ik yikutwisha kuyikwash kuman anch afanyidin kudandamen kwendish ap bwat? (Tal mutu wa mulong “Ov, Chinfanyidin Kulikap Kwendish?”) uda mu chinong chinech.

⁶ Ukutwish kuziy mulong utwishinap kand kusal yom amwiney mud muwasalang pakur. Chikutwish kwikal mwamu, pakampwil anch wikal ni kuswir kwa ukwash wa mwin kukulam ap kuswir kwa mwanikanch mwin kukwendish. Ap kand ukutwish kuziy nakash mulong mes mamenap kand nawamp ni ukwetap ukash wa mujimbu uwamp ukutwisha kukukwash kuya kwi ndond ukimbina ap kwendish motak ap chom chikwau. Ukutwish kamu kunenganan! Pakwez chid chiwamp kuvurik anch usey tukweta ku mes ma Yehova ni kwa antu wimedinap pa mutapu tukweta wa kwibangin, kushakam ayinetu, ap wa kwendish motak ap chom chikwau. Ni tufanyidin kwikal ni kashinsh anch Yehova wij nawamp mutapu twiyovila. Yehova wij anch tumukatin nakash ndiy ni akadivar nau anambaz, ni chinech chawiy chida cha usey nakash kud ndiy.​—1 Sam. 16:7.

7. Yom ik yikutwisha kuyikwash antu anenganena mulong atongin anch disuden da mangand dikuyitanap achid aom?

⁷ Pamwing ap unenganen mulong utongin anch disuden da mangand minam dikukutanap uchid mwom. Anch wiyovil mwamu, yom ik yikutwisha kukukwash? Vurik anch Yehova uchingedin nich kushimpich muchim chisu chikusheshay mangand minam mayimp. (Isay 30:18) Mulong wak ushimpishinay muchim? Usadin mwamu mulong wa kuyishil antu chisu cha kumwijik ni kumusadin. (2 Pita 3:9) Chawiy anch waziy, pakish kutongin pa yiyukish yikutambulau antu pashimpishinay Yehova muchim kurutu kwa kulet disuden. Pamwing ap pakwikal ni antu a mu dijuku dey.

8. Yom ik yikutwishau kusal antu apamina kal chisu chiyedinau ap chovilau kusansan?

⁸ Chikalap nchik mivu tukweta, anch twiyovilap nawamp, tukutwish kulond ap kusal yom yakad kuwanyin. (Mul. 7:7; Yak. 3:2) Chilakej, pading pamenay Job mar, mazu ma ikundj winou ushinshamena mikala “ma usup.” (Job 6:1-3) Chikwau kand, antu apamina kal akutwish kulond ap kusal chom chiyimp mulong wa mayej ap mon unilau. Chakin kamu, kwikil muntu ap umwing pakach petu ukatina kusadin upal ap mayej mud diyingishin da kulond yom yiyimp ap kwikal ni kada katun. Ang twaman anch twamulondin muntu yom yiyimp, tufanyidin kwit dilikishin pakad kulab.​—Mat. 5:23, 24.

MUTAPU WA KULAM MUSANGAR

9. Mulong wak ufanyidina kwitiy ukwash wa antu akwau? (Tal kand yipich.)

⁹ Itiy ukwash wa antu akwau. (Gal. 6:2) Kwinsambishin chikutwish kukukasiken kusal mwamu. Nambaz Gretl ulondin anch: “Yisu yimwing chikat kwinkasiken kwitiy ukwash mulong nikat kuman mud nid chisend kud antu akwau. Changita chisu mulong wa kuswimp mutapu wam wa kuman yom ni kwitiyin anch nikwet kuswir kwa ukwash.” Anch witiy ukwash wa antu akwau, ukuyikwash kwov musangar udokiling ku kupan. (Mid. 20:35) Ni ukusangar kamu chakin kuman mutapu ukukatinau ni ukubangidinau kud antu akwau.

10. Mulong wak ufanyidina kuvurik kwikal mwin kujikitish? (Tal kand yipich.)

¹⁰ Ikal mwin kujikitish. (Kol. 3:15; 1 Tes. 5:18) Tukat kwov musangar nakash anch antu akwau atusadin yom yiwamp, pakwez tukutwish kuvuramen kuyijikitish. Chikwau kand, anch twisipeshaku ni kuyijikitish, arunetu akwiyov anch tuyikwatin ni usey. Leah, uyilamining amapal ku Betel, ulondin anch: “Umwing wa anambaz nilamining ukat kwinfundinang mulong wa kwinjikitish. Ufundining kwend mazu makemp, pakwez mading mawamp. Nikat kumasangerang kamu, mulong mamekeshining anch usangaredining ukwash wam.”

11. Mutapu ik ukutwisha kuyikwash antu akwau? (Tal kand yipich.)

¹¹ Sal usu wa kuyikwash antu akwau. Anch wasadin chisu ni usu wey mulong wa kuyikwash antu akwau, chikukuswapel kulik kushinshikin pa yikokujol yey. Mu Afrik muding chishimu chimwing chiyifanakeshina amapal ni mabuku makweta malejan ma usey. Pakwez anch antu katanginap kwau mabuku minam, kakutwishap kwau kwilej chom. Chilik chimwing, ansand kakutwishap kwilej malejan ma usey anch wishidinap chisu cha kuyilej yom wija. Yipula yipul ni yitesha. Yileja mulong wak chid cha usey kulimish mbil ja Yehova ni mutapu ukutwishau kwikal ni musangar anch asal mwamu. Chakin kamu, ukwov musangar anch wayikasikesh aruney ansand.​—Kus. 71:18.

12. Kukwatijan ni Isay 46:4, yom ik yishidinayamu Yehova kuyisadin amapal? (Tal kand yipich.)

¹² Mwita Yehova usu mu malembil. Ukutwish kuziy ku mujimbu ap mu manang, pakwez Yehova “kakuziyangap ap kuzel tul.” (Isay 40:28) Mutapu ik ukatay Yehova kusadin usu wend wakad mimbu? Mutapu umwing ud kusutin kuyikasikesh amapal ashinshamena. (Isay 40:29-31) Ushidinamu kuyikwash. (Tang Isay 46:4.) Ni Yehova ukat kuwanyish kushilamu kwend kwawonsu. (Jos. 23:14; Isay 55:10, 11) Anch walembil, Yehova ukukukwash kukwatijan ni maswir mey. Mwamu ukuman mutapu ukukatinay, ni chinech chikukusangaresh kamu nakash.

13. Kukwatijan ni 2 Korint 4:16-18, yom ik tufanyidina kuvurik? (Tal kand yipich.)

¹³ Vurik anch upal wey ud kwau wa kachisu kakemp. Anch twavurik anch chikokujol turishina nich chid kwau cha kachisu kakemp, chikutuswapel kujijaman. Bibil utwinkin kashinsh anch upal ni mayej yid kwau ya kachisu kakemp. (Job 33:25; Isay 33:24) Chawiy ukutwish kwikal ni musangar ang wijik anch machuku mey mawamp madap kwinyim, pakwez kurutu. (Tang 2 Korint 4:16-18.) Pakwez yom ik yikutwishau kusal antu akwau mulong wa kukukwash?

MUTAPU UKUTWISHAU ANTU AKWAU KUKUKWASH

14. Mulong wak chid cha usey kuyendin amapal ap kuyitazukaku?

¹⁴ Chisu chawonsu, yendina ni kuyitazuk akadivar nau anambaz amapal. (Heb. 13:16) Amapal akutwish kwiyov anch ayiduwil. Mukadivar Camille wakading kudokal ku chikumbu ulondin anch: “Nikat kushakam ku chikumbu kudosh pamanch djat urel. Chawiy nikat kwov usweral. Yisu yimwing nikat kwiyov mud ntambu ufungidinau mu ditang. Mu yisu yiney nikat kwov kuyip ni kujiman.” Anch twayendin amapal tukat kuyinkish kashinsh anch akwet usey ku mes kwetu ni tuyikatin. Tuvurikin pamwing ap chisu twatonga kumwendin ap kumutazuk ipal kanang wa mu chikumangen chetu, pakwez twakangany kusal mwamu. Yom ik yikutwisha kutukwash “kujingunin yom yida ya usey nakash,” kuwejinaku kuyendin amapal? (Filip 1:10) Chikwikal cha usey kufund pa kalendriye wey mulong wa kuvurik kuyitumin amapal a mu chikumangen chey uruu ap kuyitazuk. Ukutwish kand kwitenchik mulong wa kuya kuyital kwol kwau; tond dichuku ukutwisha kulimish.

15. Yom ik yikutwishau ansand nau amapal kusal pamwing?

¹⁵ Anch ud nsand ap changadim, ukutwish kwiyipul yom ufandina kulond ap kusal pamwing ni amapal. Pakwez kangal wiyakamish nakash. Cha usey ikal kwey murund muwamp. (Jnsw. 17:17) Ishila chisu cha kwambamb nau kwinsambishin kwa yikumangan ap kwinsuden. Ukutwish pamwing ap kuyit chakwel akulejap mufund ukatiningau nakash ap ka rusang kawamp kavurikinau ka ku wanikanch wau. Ap kuyitazuk mulong wa kutal nau pamwing program musu wa JW Télédiffusion^®. Ukutwish kand kusalaku yom kampand mulong wa kuyikwash amapal. Chilakej, kushinshikin mulong wa kuman anch telefon wau ap tablet wau usadin nawamp, ni kuyipwitin kand mikand yisu. Nambaz Carol ulondin anch: “Sal nau amapal yom ukatining kusal. Ap anch nid ipal, nidandamedin kusanger mwom. Nikatining kubudik kulandolaku yom, kuda, ni kutalaku yitang.” Nambaz Maira niyend ulondin anch: “Murunam umwing ukwet mivu 90. Winsutinamu ku mivu 57. Pakwez yisu yivud nimening mud twilaken kwetu nend mulong tukat kusip nend ni kutaI mavideo pamwing. Ni chisu turishina ni yikokujol, tukat kukwashijan yiyul.”

16. Mulong wak chikutwish kwikal cha usey kuyitwalaku amapal kuyiman amingang?

¹⁶ Yitwalaku kumanijan ni mwingang. Anch wayitwalaku kumanijan ni mwingang, sal usu wa kwikal ni kashinsh anch ayibangidin ni ayokin mu chilik chiwanyidina. (Isay 1:17) Ukutwish kuyikwash kand kusutin kufund yom yilondinau amingang. Ruth, nambaz wananapina kal, ulondin anch: “Yisu yivud, anch naya amwinam kumutal dokter, kakatap kamu kwinkwat ni usey. Adokter akat kulond anch: ‘Uyedinap kwey, wovil kwey wom.’ Pakwez anch antwalaku kud muntu, mutapu winkwatiningay dokter ushalijadining kamu. Niyijikitishin akadivar nau anambaz akata kwishil chisu cha kwintwalaku.”

17. Milad ik ya mudimu wa kulejan ukutwisha kusal pamwing nau antu ananapina kal?

¹⁷ Lejan nau pamwing. Amapal amwing kakwetap usu wa kulejan ku chikumbu ni chikumbu. Ov, umen nchik anch wamutazuk nambaz ipal mulong wa kulejan nend ku prezantwar? Ukutwish kand kusendaku chitwam chakwel ashakamin piswimp ni prezantwar. Ap kand ukutwish kumusend mukadivar ipal mulong wa kuya kutakel nend dilejan da Bibil, pamwing ap ukutwish kutakelany dilejan dined kwol kwend. Amakurump a chikumangen akutwish kutenchik mulong wa kusadin chikumangan cha mudimu wa kulejan ku yikumbu ya amapal mulong wa kuyipipejinaku yom. Yehova ukwatin nich usey usu wawonsu tusadina mulong wa kuyimekeshin rukat ni kuyilimish antu ananapina kal.​—Jnsw. 3:27; Rom 12:10.

18. Yom ik tukwisambina mu mutu wa mulong wambakedinap?

¹⁸ Atuvurish kal anch Yehova uyikatin amapal ni uyikwatin nich usey. Mwamu tukata kusal etu awonsu mu chikumangen! Upal kadap chom chiswapela, pakwez nich ukwash wa Yehova, ukutwish kulam musangar wey. (Kus. 37:25) Chikasikeshin kamu nakash wijik anch machuku mey mawamp madap kwinyim, pakwez kurutu! Chid nchik piur pa amwing pakach petu alamina mwanamakwau wananapina kal, mwan ap murund uyedina? Mutapu ik ukutwishau kulam musangar wau? Tukutan chakul mu mutu wa mulong wambakedinap.