Yesu Ud Mwin Kupesh Wetu Mujim Ukweta Ranaken

1-2. (a) Mulong wak Yehova wamutuma mwanend pa mangand? (b) Yom ik tukwileja mu mutu wa mulong winou? (Hebereu 5:7-9)

KWASUT kal mivu piswimp 2000, Yehova Nzamb wamutuma Mwanend mukatish pa mangand. Mulong wak? Diyingishin dimwing pakach pa mayingishin mavud dading da kuyikol antu ku chitil ni rufu, ni kupwish milong yawonsu yaletishay Satan. (Yoh. 3:16; 1 Yoh. 3:8) Yehova wading wij anch mwom wafanyinay kwikal nich Yesu pa mangand mud muntu, wafanyina kumukwash kwikal mwin ranaken, mwin riy ni Mwin Kupesh wetu Mujim. Yesu wasambisha kuwanish chisend chinech kupwa kwa kumubatish mu muvu wa 29 C.C.a

² Mu mutu wa mulong winou tukuman mutapu ik mwom wa Yesu pa mangand wamurijeka mulong wa kuwanish chisend chend cha Mwin Kupesh Mujim ukweta ranaken. Anch twatesh nawamp mutapu ‘wamwikadishau uwanyidina’ chikutuswapel kumusejin Yehova ap anch twaziy mulong wa yitil yetu ap mulong wa ulim wetu.​—Tang Hebereu 5:7-9.

MWAN MUKATISH WA NZAMB WEZA PA MANGAND

3-4. Mutapu ik waswimpa mwom wa Yesu pezay pa mangand?

³ Amwing pakach petu ashikena kuswimp yom kanang mu mwom mud kusha chikumbu chau, kushakamin kulemp ni dijuku dau ni arunau. Kuswimp kwinoku kukutwish kulet yikokujol. Pakwez kwikil kwau muntu waswimpap kal yom mu mwom wend mud Yesu. Padingay mwiur, wading mwangel wa kusambish ni wading ni ndond ya piur nakash. Yehova wading umukatin nakash ni chisu chawonsu wading ni musangar mulong wasalang mudimu pamwing ni Tatukwend. (Kus. 16:11; Jnsw. 8:30) Pakwez, Filip 2:7 ulondin anch Yesu witiya ‘kulikap yom yawonsu,’ washa ndond yend ya piur nakash yadingay nich mwiur mulong wa kushakam pa mangand nau antu akad kuwanin.

⁴ Tushinshikinany kand yom yasadika chisu chavadikay Yesu ni mutapu wading mwom wend mu mivu yend ya kusambish pa mangand. Yesu wavadikina mu dijuku da atuzweny, twij mwamu kusutin yipan yikemp yapanau anvajend kupwa kwa kuvadik kwend. (Lev. 12:8; Luka 2:24) Pateshay anch Yesu wavadikang kal, Herod, Mwant wa chisum wakimba kumujip. Mulong wa kumupandish Yesu, anvajend achinina mu Idjibit mu chisu kanang. (Mat. 2:​13, 15) Mwom wa Yesu pa mangand wading kamu ushalijadina ni wadingay nich mwiur!

5. Yom ik yamanay Yesu pa mangand, ni yamutenchika mutapu ik mulong wa kuwanish chisend chend cha Mwin Kupesh Mujim? (Tal kand chipich.)

⁵ Padingay Yesu pa divu, wamana antu akat kuman mar. Watesha mutapu ukatay kwiyov muntu anch wafish mukatish nend, pamwing ap niyend wiyova mwamu pafay Jozef, tatukwend wamulila. Palejanangay, Yesu watanijana kand nau antu ading ayedina nakash, amputames, ayilim, ap kand antu afisha anau, ni wayovila riy. (Mat. 9:2, 6; 15:30; 20:34; Mar. 1:40, 41; Luka 7:13) Chakin kamu, ap padingay mwiur, Yesu wayimanang antu amena mar. Pakwez pezay pa mangand mud muntu, watesha kusansan kukatau kwov antu amena mar. (Isay 53:4) Yom yamanay Yesu padingay pa mangand, yamukwasha kutesh mutapu ukatau kwiyov antu mu yishiken kushalijan ni mutapu umenau mar mulong wa yikokujol ya mu mwom. Mud antu awonsu, Yesu niyend waziyang, wiyakamishang ni wanengananang.

YESU WAMEKESHA ANCH NIYEND WIYOVANG MUD ANTU AWONSU

6. Chilakej chasadinay muprofet Isay chitufundishin ik piur pa ranaken ni riy ramekeshay Yesu? (Isay 42:3)

⁶ Mu mudimu wend wawonsu pa mangand, Yesu wayanakena nakash antu ading aziyina ni antu apipejinau. Kusutin kusal mwamu, wawanisha uprofet. Mu mifund ya Hebereu, antu ading akweta usu ni akweta mwom uwamp ayifanakeshin yisu yimwing ni chir chikatau kwichil mem. (Kus. 92:12; Isay 61:3; Jer. 31:12) Pakwez atuzweny nau antu ameshinau mar ayifanakeshin ni mushiy (dileny) uda piswimp ni kubukuk ni kasu kada piswimp ni kujim, yom yakad kand kwikal ni usey kud antu awonsu. (Tang Isay 42:3; Mat. 12:20) Muprofet Isay amupepila mulong wa kusadin chilakej chimekeshina rukat ni riy yafanyinay Yesu kuyimekeshin antu ading apipejinau ni akwatangau mud akad usey.

7-8. Mutapu ik wawanishay Yesu uprofet wa Isay?

⁷ Mateu wamekesha anch Yesu wawanisha kamu uprofet uda mu Isay pafunday anch: “Ndiy kakezap kapuchol dileny diumina, ap kujimish moj wa lamp ubudishina mish djat ni pakuletinay kutentam.” Yesu wasala yilay yivud mulong wa antu ading apipejinau ni ading akad kwikal ni ruchingej ra mwom uwamp. Pakach pa antu inay, pading muntu umwing uyedina musong wa kasu. Kadingap ni ruchingej ra kuyerik ni kwikal pamwing ni dijuku dend nau arunend (Luka 5:12, 13) Wamwoka kand muntu mukwau wading kajikamatu ni wakad kulond nawamp. Tongin mutapu wiyovangay payimanangay antu akwau akat kwambamb ni kuswimbul pakad ndiy kutesh yilondinau. (Mar. 7:32, 33) Pakwez kupwilap.

⁸ Pa chirung cha Yesu, In Yuda avud ading itiyijin anch, ang mar mamushiken muntu, chid mulong wa yitil yend ap yitil yasalau anvajend. (Yoh. 9:2) Mud chibudikin, yitiyij yiney ya makasu yayinenganeshang antu ni iyovang mud kakwetap usey. Pakwez Yesu wayoka ni kuyikwash kutesh anch Nzamb uyibangidin. Chom chinech chitwinkishin kashinsh ik?

9. Mutapu ik umekeshinay Hebereu 4:15, 16 anch Yesu ukat kuyanaken antu akad kuwanin?

⁹ Tang Hebereu 4:15, 16. Tukutwish kwikal ni kashinsh anch Yesu ukutwanaken chisu chawonsu. Ov, chirumburikin ik? Muntu ukweta ranaken ukat kuman mar ni yovil ya muntu mukwau ni kwitek pa ndond yend. Dizu da Grek dikarumwinau anch “ranaken” dimekeshin kwitek pa ndond ya muntu ni kwiyov mutapu wiyovilay. (Tal kand Hebereu 10:34, mwinomu Paul usadidin kand dizu da Grek.) Nsang jisambidina piur pa yilay yasalay Yesu jimekeshin mutapu wiyovangay pamanangay mar ma antu akwau. Kadingap kafanyidina ching kusal yilay yiney. Pakwez, Yesu wading uyibangidin chakin kamu ni wading ukatin kuyikwash. Chilakej, pamwokay muntu wading uyedina musong wa kasu, wading ukwet kwend mutapu wa kumwokin palemp, pakwez kasalap mwamu. Chimeken anch wikala wa kusambish kumupukun muntu winou kupwa kwa mivu yivud pakad kumukwataku kud muntu mukwau! Pamwokay muntu wading kajikamatu, Yesu wamudosha pa ndond pading masok ma antu ni wamwokina kuns. Kurutu kwa Mufaris umwing, Yesu wamulondina kand mband wakarumuka ni wowisha mend mend nich mansoj ni wamukusumwona nich nsuk jend. (Mat. 8:3; Mar. 7:33; Luka 7:44) Yesu kayidiulap ayilim ap antu asala yitil yikash. Pakwez, witiyang anch amusejin ni wamekeshang anch uyikatin. Tukutwish kwikal ni kashinsh anch niyetu ukutwanaken.

TUMWIMBURIJANY MWIN KUPESH WETU MUJIM

10. Yom ik tukweta ya mu spiritu tukutwisha kusadin mulong wa kuyikwash atujikamatu ni amputames? (Tal kand yipich.)

¹⁰ Mulong tud in kwilej ashinshamena a Yesu, tukat kwikasikesh kumwimburij kusutin kumekesh rukat, kumekesh yovil yakin ni kuyovil antu akwau riy. (1 Pita 2:21; 3:8) Ap anch tukutwishap kumwok kajikamatu ap kumwok mputames, tukutwish kuyikwash mu spiritu. Chilakej, mikand yimedina pa Bibil yidaku mu mazu ma yijingidij 100 ni kusut. Ni mulong wa kuyikwash amputames ni antu akad kuman nawamp, mikand ya bray yidaku mu mazu 60 ni kusut ni mu mazu marumburila yom yimekena mu video amabudishin mu mazu 100 ni kusut. Yom yiney yawonsu yikat kuyikwash atujikamatu nau amputames kumusejin Yehova ni Mwanend piswimp.

11. Dirijek da Yehova dimekeshin mutapu ik ranaken radingay nich Yesu mulong wa antu a mitapu yawonsu? (Midimu 2:5-7, 33) (Tal kand yipich.)

¹¹ Dirijek da Yehova disadin usu nakash mulong wa kuyikwash antu a mitapu yawonsu. Vurik anch kupwa kwa kuvumbuk, Yesu wapalangesha spiritu utumbila kud antu akumangana ku musambu wa Pantekot chakwel antu atesha rusang ruwamp, muntu ni muntu “mu dizu dend.” (Tang Midimu 2:5-7, 33.) Kusutin umutakel wa Yesu, dirijek dibudishin mikand yimedina pa Bibil mu mazu 1000 ni kusut, mamwing pakach pa mazu minam akat kumalond kwau kud antu akemp kusu. Chilakej, mazu mamwing ma Amérindien amalondining kud antu akemp kusu ashicha mu Amerik wa Kurul ni wa Kwiyand. Pakwez dirijek dabudishin kal mikand mu mazu minam 160 ni kusut mulong wa kuyikwash antu akata kumalond kutesh rusang ruwamp. Mikand yetu yidaku kand mu mazu ma Romani 20 ni kusut. Antu avud alondina mazu minam itiyin uyakin.

12. Ukwash ik kand ukwau tutambwila mu dirijek da Yehova?

¹² Kudoshaku kuyifundish antu rusang ruwamp, dirijek da Yehova dikat kuyikwash kand antu amena mar madokila ku yom yatangau. In kwipan kwa kwisotin avud akat kunung chikas ku ditenchik dined mulong wa kuyikwash akadivar ni anambaz nau ada mu maswir. Dirijek dikat kukwash kand kusutin kutung jindond jisikena ja difukwil mukutwishau antu kukumangan mulong wa kwilej piur pa rukat rikwetay Nzamb mulong wa awiy.

MWIN KUPESH WETU MUJIM UKUTWISH KUKUKWASH

13. Yesu utukwashin mu mitapu ik?

¹³ Mud kafung muwamp, Yesu ukat kubangin maswir ma mu spiritu ma muntu ni muntu wa pakach petu. (Yoh. 10:14; Efes 4:7) Yisu yimwing, mulong wa yishiken ya mwom tukutwish kwiyov mud dileny diumina ap mud moj wa lamp ubudishina mish. Tukutwish kuziy nakash mulong wa mayej makash tukweta, kurumbuk twasadina ap mulong wa urund wetu wayipina ni muntu mukwau mu chikumangen. Chikutwish kutukasiken kushinshikin pa ruchingej retu ra machuku ma kurutu ni kulik kutongijokin pa milong turishina nich nlel. Vurik anch Yesu umen yikokujol urishina nich ni wij mutapu wiyovila. Ranaken ra Yesu rikat kumubachik kusal yom kanang mulong wa kukukwash. Chilakej, ukutwish kusadin spiritu utumbila mulong wa kukwinkish usu chisu uziyina. (Yoh. 16:7; Tit. 3:6) Chikwau kand, Yesu ukutwish kuyisadin “antu [ada] mud yipan” ni ambay netu akwau a mu chikumangen mulong wa kutukasikesh ni kutukwash.​—Efes 4:8.

14. Yom ik tukutwisha kusal chisu tuziyina?

¹⁴ Chisu uziyina, tongijokin pa chisend chikwetay Yesu mud Mwin Kupesh Mujim. Vurik anch Yehova kamutumap pa divu mulong kwau wa kupan mwom wend mud difut, pakwez mulong kand wa kutesh nawamp milong yirishinau nich antu akad kuwanyin. Chisu tuziyina mulong wa yitil yetu, Yesu ukutwish ni ukatin kand kutukwash “pa chisu chiwanyidina.”​—Heb. 4:15, 16.

15. Rumburil kusutin chilakej mutapu ukutwishay muntu washadikina kal kutambul ukwash mulong wa kuchirik mu chikumangen.

¹⁵ Yesu ukat kuyitakel kand antwend asadina usu wa kuyikimb ni kuyikwash antu ashadikina kal. (Mat. 18:12, 13) Shinshikin yom yamushikena Stefano.b Kupwa kwa kumutek pol pa chikumangen mu mivu 12, wakwata mupak wa kusambishiril kukumangan. Ulondin anch: “Chadingap chinswapedina, pakwez nakata kand kwikal mu dijuku da Yehova dikweta rukat. Amakurump nambamba nau anginkisha kashinsh anch akusangar nakash anch anman nasambish kand kukumangan. Yisu yimwing, niyovang anch nikwetap usey ni nova ja kulikap. Pakwez amakurump anvurisha anch Yehova ni Yesu akatin anch nidandamen kuya kurutu. Chisu chanchirishau, chikumangen chakabuj changaka nich musangar pamwing ni dijuku dam. Mukajam wasambisha kwilej Bibil, ni nlel tumusadidin Yehova pamwing mu dijuku detu.” Tutongidin musangar ukutwishay kwov Mwin Kupesh wetu Mujim pakatay kuman antu akarumukina akat kutambul ukwash uswirikedinau mulong wa kuchirik mu chikumangen!

16. Mulong wak ud mwin kujikitish mulong wa Mwin Kupesh Mujim ukweta rukat?

¹⁶ Padingay Yesu pa divu, wayikwasha antu avud nakash pa chisu chiwanyidina. Ap nlel tukutwish kwikal ni kashinsh anch ukutukwash pa chisu chiwanyidina. Ni mu mangand masu makweza piswimp ap ukuyikwash antu aziyidina kukolik ku yibudikin yiyimp ya chitil ni kuburen kuwanyin. Tumujikitishin nakash Yehova Nzamb wetu, mulong kusutin riy ni rukat rend rijim, wamutonda Mwanend mulong wa kwikal Mwin Kupesh wetu Mujim!