Buku Dzra Wubidzri Dzra Samuwele
1 Ntsrhaku ka ku fa ka Sawulo, Davhida a tsrhame Ziklagi ku dzringana masiku mabidzri, ntsrhaku ka loko a buyile hi ku hluleni* ka Vaamaleki. 2 Hi siku dzra wuzrazru ku tlhase wanuna wa kukazri na a buya he mintxhatxheni ya Sawulo, na a ni mpahla ya ku handzrukela a tale ni hi misava nhlokweni. Hiloko a tsrhindzrekelela Davhida a tlhasa a khinsama a lavisa hansi.
3 Davhida a mu vutisa a ku: “U buya hi kwini?” A mu hlamula a ku: “Ni tsrutsrume a mintxhatxheni ya Vaisrayele.” 4 Davhida a mu vutisa a ku: “Hi nga ni byela, ku yentxeke yini?” A mu hlamula a ku: “A masotxha ma tsrutsrumile a yimpini nakone manyingi ma vavisiwile ma va ma fa. Nambi Sawulo ni n’wanake Yonathani va file.” 5 Davhida a vutisa wanuna yelweyo a ku: “U swi tivisa kuyini leswaku Sawulo ni n’wanake Yonathani va file?” 6 A mu hlamula a ku: “Ni tikume na ni le Nhaveni ya Gilbowa na ni nga swi yimelanga, kutani ni vona Sawulo na a sime hi tlhazri dzrake nakone a masotxha lawa a ma famba hi tin’qolo ta yimpi ni lawa a ma famba hi makavhalu a ma ya ma tlhasa lani a a li kone. 7 Kutani loko a ndzruluka a ni vona, a ni vitana, mine ni ku: ‘Hi mine lweyi!’ 8 A gama a ni vutisa a ku: ‘Hi wene mani?’ Mine ni ku: ‘Ni Muamaleki.’ 9 Hiloko a ku: ‘Tsrhindzrekela u ni dlaya hikusa ni twa ku vavisa ngopfu kambe na ha hanya.’ 10 Kutani ni tsrhindzrekela ni tlhasa ni mu dlaya, hikusa leswi a a vavisiwe ngopfu a ni swi tiva leswaku a nge ti hanya. Ni game ni teka hazri* ya wuhosi a nhlokweni yake ni va ni susa sindzra a vokweni dzrake ni swi buyisela wene hosi yanga.”
11 Hi kola ka leswo Davhida a handzrula mpahla yake, ni masotxha yake hinkwawu lawa a ma li na yene ma yentxa leswi fanaka. 12 Va be nkosi va dzrila va va va titsrona swakuda ku ya tlhasa madambyeni hi kola ka leswi Sawulo, n’wanake Yonathani, vhanu va Yehovha ni Vaisrayele va vanyingi va dlayiwiki hi xipada.
13 Davhida a vutisa wanuna lweyi a mu buyiseliki ndzrava a ku: “U wa kwini wene?” A mu hlamula a ku: “Ni n’wana wa Muamaleki lweyi a tsrhamaka a Israyele.” 14 Davhida a mu vutisa a ku: “Ha yini u tiye u dlaya muhlawuliwa wa Yehovha?” 15 Hiloko Davhida a vitana mun’we ka masotxha yake a ku: “Buya u mu dlaya.” Kutani a musotxha a tsrema wanuna lweyo hi xipada a fa. 16 Davhida a ku: “A ngati yaku a yi ve henhla kwaku, hikusa u dlayisiwe hi nomu waku loko u te: ‘Ni dlaye muhlawuliwa wa Yehovha.’”
17 Hiloko Davhida a yimbelela lisimu dzra xilahlu* hi kola ka Sawulo ni n’wanake Yonathani 18 a va a hlaya leswaku dzri fanela ku dondzrisiwa vhanu va le Yuda. A lisimu ledzro ledzri vitaniwaka “Wugubu” dzri tsraliwe a bukwini dzra Yaxari nakone dzri li:
19 “A wuxongi byaku we Israyele, byi nyamalale a tinhaveni.
A tinhenha ti wile!
20 Mi nga swi dzrunguli leswo a Gati;
Mi nga swi tivisi a switaratwini swa le Axkeloni,
Akuva a tintombhi ta le Filistiya ti nga nyonxi,
Akuva a vana va lava va kalaka va nga sokanga va nga bi nkulungwana.
21 N’wine tinhava ta le Gilbowa,
Mi nga tsrakamisiwi hi mbezre nambi hi mpfula,
Nambi masimu ma nga bindzruli leswi taka nyikeliwa ka Xikwembu Nkulukumba,
Hikusa ka mbangu lowo ku zrukiwe xitlhangu xa tinhenha,
A xitlhangu xa Sawulo xi zrukiwile, a xa ha hlawulekisiwanga hi mafuzra.
22 A wugubu bya Yonathani ni xipada xa Sawulo a swi hlamba hi ngati ya valala,
Swi tlhava fuzra dzra tinhenha,
A swi nga phukwi.
23 Sawulo na Yonathani a va zrandzreka* ngopfu swinene a ku hanyeni kwavu,
Nambi ku feni kwavu a va tsravukanisiwanga.
A va tsrutsruma ngopfu ku tlula magama,
Nakone a va ni ntamu ku tlula tinghonyama.
24 N’wine van’hwanyana va Israyele, dzrilani Sawulo,
Lweyi a mi yambexiki mpahla ya lisima ni ya xiyimu xa le henhla,
Lweyi a xongiseliki mpahla yenu hi woru.
25 A tinhenha ti wile a yimpini!
Yonathani a dlayiwile a tinhaveni!
26 Ni dzrila hi mhaka yaku makwezru Yonathani;
Wene a u li nakulozri lweyi a zrandzrekaka ngopfu;
Kwanga a lizrandzru dzraku a dzri tlula lizrandzru dzra vavasati.
27 A tinhenha ti wile
Ni matlhazri ya yimpi ma helisiwile!”