Deuteronoma
9 “Yingela We Israyele, namunhla u tsremakanya nambu wa Yordani akuva u nghena tikweni ledzri u va u hlongola matiko lamakulu ni lawa ma nga ni ntamu ku ku tlula, madoropa lamakulu ni lawa ma tiyisiwiki ku ya tlhasa matilweni,* 2 vhanu lava nga ni ntamu nakone va lehiki, vana va Vaanaki lava u va tivaka nakone u yingeliki ku hlayiwa leswi ha vone: ‘I mani lweyi a nga yimaka a tiya a mahlweni ka vana va Anaki?’ 3 Xileswo swi tivi namunhla leswaku Yehovha Xikwembu Nkulukumba waku a ta ku zrangela. Yene i ndzrilo lowu helisaka nakone a ta va helisa. A ta va hlula na u swi vona akuva u va hlongola* hi ku kahlula ni ku va helisa, hi lani Yehovha a ku dumbisiki ha kone.
4 “Loko Yehovha Xikwembu Nkulukumba waku a hlongola matiko lawa mahlweni kwaku, u nga txhuki u tibyela leswi a mbilwini yaku: ‘Yehovha a ni yentxe ni nghena a tikweni ledzri ni dzri teka hi leswi ni lulamiki.’ A matsrhan’wini ya leswo, Yehovha a hlongola matiko lawa a mahlweni kwaku hi mhaka ya wubihi bya wone. 5 A u ngheni tikweni dzravu u dzri teka hi mhaka ya leswi u lulamiki, kumbe hi mhaka ya ku lulama ka mbilu yaku. Kambe Yehovha Xikwembu Nkulukumba waku a hlongola matiko lawa a mahlweni kwaku hi mhaka ya wubihi bya wone ni leswaku yene Yehovha a ta hetisisa leswi a swi hlambanyeliki vakokwana vaku, ku nga Abrahamu, Izaki na Yakobe. 6 Xileswo, swi tivani leswaku Yehovha Xikwembu Nkulukumba wenu a nga mi nyiki tiko ledzri ledzrinene akuva mi dzri teka hi mhaka ya leswi mi lulamiki, hikusa n’wine mi vhanu lava tlanyaliki timbilu.*
7 “Dzrimukani, mi nga txhuki mi dzrivala ndlela leyi mi mu pfukiki ha yone Yehovha Xikwembu Nkulukumba wenu a mananga. Ku sukela siku ledzri mi humiki ha dzrone a tikweni dzra Egipta ku ta ta tlhasa mbangwini lowu, mi tsrhamele ku pfukela Yehovha. 8 Nambi a Horebe mi pfuke Yehovha nakone Yehovha a mi hlundzrukele ngopfu lakakuva a a lulamele ku mi helisa. 9 Loko ni tlhantukele nhaveni akuva ni ya yamukela swipepezrele swa mazribye, ku nga swipepezrele swa xipfumelelanu lexi Yehovha a xi yentxiki na n’wine, ni tsrhame a nhaveni ku dzringana 40 wa masiku, wusiku ni nhlikanhi, na ni nga di ntxhumu* nambi ku nwa mati. 10 Kutani Yehovha a ni nyike swipepezrele swibidzri swa mazribye leswi tsraliwiki hi litiho dzra Xikwembu Nkulukumba; ka swone a ku ni mazritu hinkwawu lawa Yehovha a mi byeliki wone a nhaveni na a li makazri ka ndzrilo, hi siku ledzri a mi hlengeletane ha dzrone.* 11 A ku heleni ka masiku wolawo ya 40, wusiku ni nhlikanhi, Yehovha a ni nyike swipepezrele swibidzri swa mazribye, ku nga swipepezrele swa xipfumelelanu. 12 Kutani Yehovha a ni byele a ku: ‘Fulamela hi ku kahlula, hikusa a vhanu vaku lava u va humesiki a Egipta, va dohile. Va hambuke hi ku kahlula a ndleleni leyi ni va leletiki ku famba ha yone. Va tihambele xithombe.’ 13 Nakone Yehovha a ye mahlweni a ku: ‘Na swi vona leswaku a vhanu lava nakunene va tlanyale timbilu. 14 U nga zami ku ni sivela ku va helisa, ni va ni tima vito dzravu a hansi ka matilo ni gama ni yentxa leswaku wene u va tiko ledzri nga ni ntamu ni ledzri nga ni vhanu va vanyingi ku va tlula.’
15 “Kutani ni fulamelile a nhaveni, hi nkama lowu nhava a yi pfuzra nakone a ni tamele swipepezrele swibidzri swa xipfumelelanu. 16 Loko ni lavisile, ni vone leswaku a mi dohele Yehovha Xikwembu Nkulukumba wenu. A mi tihambele zrole,* a mi hambuke hi ku kahlula a ndleleni leyi Yehovha a mi leletiki ku famba ha yone. 17 Xileswo, ni teke swipepezrele leswiya swibidzri ni swi txukumetela hansi swi pandzrekela na mi swi vona. 18 Kutani ni khinsame mahlweni ka Yehovha hi lani ni yentxiki ha kone a ku sunguleni, ku dzringana 40 wa masiku, wusiku ni nhlikanhi. A ni danga ntxhumu nambi ku nwa mati, hi mhaka ya swidoho hinkwaswu leswi a mi swi yentxile, hi ku yentxa leswi bihiki a mahlweni ka Yehovha ni ku mu khunguvanyisa. 19 Hikusa a ni txhava hi mhaka ya leswi Yehovha a a mi hlundzrukele ngopfu swinene, a a lulamele ku mi helisa. Nambitasu, ni ka khambi ledzro Yehovha a ni yingisetile.
20 “Yehovha a a mu hlundzrukele ngopfu Aroni lakakuva a a lulamele ku mu helisa, kambe ni ka khambi ledzro ni khongote ni kombela leswaku a dzrivaleliwa. 21 Kutani ni teke ntxhumu lowu a mi doha ha wone, ku nga zrole ledzri a mi dzri hambile, ni dzri hisa; ni dzri pfotlotela ni dzri sila hi ku helela dzri za dzri hamba mpupu, kutani ni teka mpupu lowo ni wu txukumetela a matini lawa ma fulamelaka hi le nhaveni.
22 “Handle ka leswo, a Tabera, a Masa ni le Kiberoti-hatavha mi tlhele mi pfuka Yehovha, mi mu hlundzrukisa. 23 Loko Yehovha a mi zrumile na mi sukela a Kadexi-barineya, a ku: ‘Fambani mi ya teka tiko ledzri nakunene ni taka mi nyika dzrone!’ N’wine mi tlhele mi yentxa swa ku hambana ni leswi Yehovha Xikwembu Nkulukumba wenu a mi leletiki swone, nakone a mi kombisanga lipfumelo kwake nambi ku mu yingiseta. 24 Ku sukela ni mi tiva, n’wine mi va ku pfukela Yehovha.
25 “Kutani ni khinsame a mahlweni ka Yehovha ku dzringana 40 wa masiku, wusiku ni nhlikanhi, nakone ni yentxe leswo hi leswi Yehovha a hlayiki leswaku a ta mi helisa. 26 Ni sungule ku tsratsriya Yehovha ni ku: ‘We Yehovha Hosi Leyi Nga Henhlahenhla, u nga va helisi vhanu vaku. Phela vone i vhanu vaku,* lava u va tizruliki hi wukulu byaku nakone u va humesiki a Egipta hi voko dzra ntamu. 27 Dzrimuka malandzra yaku, ku nga Abrahamu, Izaki na Yakobe. U nga yi hi ku tlanyala ka timbilu ta vhanu lava nambi hi wubihi byavu ni xidoho xavu. 28 Hikusa vhanu va tiko ledzri u hi humesiki ka dzrone va nga ku: “Yehovha swi mu hlulile ku tlhasisa vhanu lava a tikweni ledzri a va dumbisiki dzrone nakone leswi a va nyenyaka a va humese lani akuva a ya va dlaya a mananga.” 29 Hikusa vone i vhanu vaku lava lumbaka wene ntsena, nakone u va humesiki hala hi ntamu waku ni hi voko dzraku ledzri nalavukiki.’