Buku Dzra Ku Sungula Dzra Samuwele

25 Ntsrhaku ka nkama wa kukazri, Samuwele a fa va va Vaisrayele va hlengeletana akuva va mu dzrilela ni ku mu lahla kusuhi ni kaya kwake a Rama. Hiloko Davhida a ya a mananga ya le Parani.

2 A Mawoni a ku ni wanuna wa kukazri lweyi a a tizrela a Karmeli.* A a ganye ngopfu swinene, a a ni 3.000 wa tihamba ni 1.000 wa timbuti nakone a a tsremeta mavoya ya tihamba a Karmeli. 3 A vito dzra wanuna lweyo a ku li Nabali, kasi ke a nsati a ku li Abigayili. Abigayili a a tlhazrihile nakone a a xongile kambe Nabali nuna wake, lweyi a a li wa lixaka dzra Kalebe, a a kazrata futsrhi a a bihe mbilu. 4 Hiloko Davhida na a li mananga a yingela leswaku Nabali a le ku tsremeteni ka mavoya ya tihamba take. 5 Xileswo Davhida a zrumela 10 wa vavanuna ka Nabali a va byela a ku: “Tlhantukani mi ya a Karmeli, kutani loko mi kuma Nabali mu byelani leswaku ni navela ku tiva leswaku byo yini wutomi. 6 Mu byelani mi ku: ‘Ingiki u nga hanya nkama wa ku leha, nakone ingiki hinkwaswu swi nga ku fambela ha hombe,* wene, va ndangu waku ni hinkwaswu leswi u nga na swone. 7 Ni yingele leswaku u le ku tsremeteni ka mavoya ya tihamba. Nkama lowu a vabyisi vaku a va li na hine a hi va yentxanga ntxhumu wa ku biha nakone a va nyamalaleliwanga hi ntxhumu ku dzringana nkama hinkwawu lowu a va le Karmeli. 8 Vutisa malandzra yaku, ma ta ku tiyisekisa mhaka leyo. Ingiki a masotxha yanga ma nga yamukeleka a mahlweni kwaku, hikusa hi buye hi nkama wa ku nyonxisa.* Hi kombela u nyika hine malandzra yaku kun’we ni n’wanaku Davhida, xin’wana ni xin’wana lexi u vonaka na xi fanela.’”

9 Hi ndlela leyo a malandzra ya Davhida ma suka ma ya ka Nabali ma ya mu byela hinkwaswu leswi Davhida a swi hlayiki. Loko ma gamile, 10 Nabali a byela malandzra ya Davhida a ku: “Davhida n’wana wa Yese o va mani yene? Phela Davhida o va mun’we wa malandzra manyingi lawa namunhla wa siku ma tsrutsrumaka vinyi va wone. 11 Ha yini ni fanela ku teka pawu dzranga, mati yanga ni nyama ya swifuyu leswi ni swi dlayeliki vatsremeti va mavoya ya tihamba tanga, ni nyika vhanu lava va ku nambi swaku i va kwini a ni swi tivi?”

12 Hiloko masotxha ya Davhida ma tlhela, ma tlhasa ma mu byela hinkwaswu leswi Nabali a swi hlayiki. 13 Davhida a tekela ku byela masotxha yake a ku: “Hinkwenu tlhomani swipada a nyongeni.” Hiloko hinkwavu va tlhoma swipada, na yene Davhida a yentxa hi lani ku fanaka. Davhida a fambe ni 400 wa masotxha, kasi a 200 wa wone ma sale ni mintsrhwalu.

14 Hi nkama wolowo mun’we wa malandzra a byela Abigayili nsati wa Nabali a ku: “Davhida a zrumele vhanu va kukazri ku sukela a mananga akuva va ta ta losa hosi yezru Nabali ni ku tiva leswaku o yini, kambe a va zruketelile. 15 Vavanuna lava va hi khome ha hombe, a va hi yentxelanga ntxhumu wa ku biha nakone a hi nyamalaleliwanga hi ntxhumu nkama hinkwawu lowu a hi li na vone nhoveni. 16 Wusiku ni nhlikanhi a va fana ni muru lowu a wu hi sizrelela hi matlhelo hinkwawu, nkama hinkwawu lowu hi viki na vone na hi byisa mintlhambi. 17 Kutani, vona leswaku u nga yentxa yini, hikusa leswi, nakunene swi ta yentxa leswaku a hosi yezru ni hinkwavu va ndangu wa yone va weliwa hi khombo, yone yi phuntile* nakone a yi djuli ku twa mhunu.”

18 Xileswo Abigayili a tekela ku teka 200 wa mapawu, tihotsro tibidzri ta tikulu ta vhinyu, ntlhanu wa tihamba leti xindliwiki, ntlhanu wa mintsrhava ya tinhleke leti kantingiwiki,* 100 wa mabolu lawa ma hambiwiki hi mawuvha ya ku woma ni 200 wa mabolu lawa ma hambiwiki hi makuwa ya ku woma, kutani hinkwaswu a swi zrwexa timbongolo. 19 Hiloko a byela vatizri vake a ku: “Pfanani mi famba ni ta mi kuma.” Kambe a nga mu byelanga nuna wake Nabali.

20 Nkama lowu a fulamelaka na a khwele ka mbongolo, Davhida ni masotxha yake a va buya hi ndlela yoleyo ya yin’we, kambe a va nga vonani hi mhaka ya leswi a va siveliwa hi nhava, hiloko va tlhangana. 21 Davhida a a tibyele leswi: “A swi sizanga ntxhumu ku va ni sizrelele mintxhumu hinkwayu ya wanuna lweyi a mananga. A nga nyamalaleliwanga hi ntxhumu, nambitanu ka mintxhumu leyinene leyi ni mu yentxeliki yone a ni hakela hi wubihi. 22 Ingiki Xikwembu Nkulukumba a nga khatisa valala vanga loko byo xa na ni nga mu dlayanga Nabali ni vavanuna vake hinkwavu.”

23 Loko Abigayili a vona Davhida, a tekela ku xika a mbongolweni a va a khinsama mahlweni ka Davhida a lavisa hansi. 24 Na a ha khinsame mahlweni ka Davhida a ku: “Hosi yanga, a nandzru a wu ve wanga; ni kombela u ni pfumelela ni vulavula u va u ni yingiseta, mine nandzra waku. 25 Na ku kombela hosi yanga, u nga mu tekeli nhlokweni wanuna lweyi, lweyi a kalaka a nga pheli, ku nga Nabali,* hikusa a fambisana ni ntlhamuxelo wa vito dzrake. A vito dzrake i Nabali, i xiphunta. Mine nandzra waku a ni va vonanga vavanuna lava u va zrumiki. 26 Kutani, leswi wene hosi yanga u hanyaka, na funga ha Yehovha Xikwembu Nkulukumba lweyi a hanyaka, leswaku i Yehovha lweyi a ku siveliki ku va ni nandzru wa ngati ni kuva u tidzrihisela hi mavoko yaku. Ingiki a valala vaku ni lava va djulaka ku ku yentxela swa ku biha va nga fana na Nabali. 27 Ni ku tisele swakuda leswi, swanga xihiwa,* akuva u ta nyika masotxha yaku. 28 Ni kombela u ni dzrivalela mine nandzra waku, hikusa nakunene Yehovha a ta yentxa leswaku a vanaku va fuma ku dzringana nkama wa ku leha; phela wene hosi yanga u lwa tiyimpi ta Yehovha nakone a ku kumiwanga ntxhumu wa ku biha ni wun’we kwaku ku ta ta tlhasa namunhla. 29 Loko mhunu wa kukazri a ku hlongolisela akuva a ku dlaya,* Yehovha Xikwembu Nkulukumba waku a ta sizrelela wutomi byaku ku fana ni loko mhunu wa kukazri a bekisa mintxhumu ya lisima a paxteni dzrake, kambe a wutomi bya valala vaku Xikwembu Nkulukumba a ta byi txukumeta kule ku fana ni loko ku txopiwa mazribye hi xibalakatsra. 30 Nakone loko Yehovha a ta va a ku yentxele mintxhumu hinkwayu leyinene leyi a ku dumbisiki yone a va a ku beka leswaku u va muzrangeli wa Israyele, 31 wene hosi yanga a wu nge ti biwa hi lipfalu nambi ku titwa nandzru a mbilwini hi ku va u halate ngati leyi ngeke na nandzru na ku nga na xivangelo kumbe hi ku va u tidzrihiselile hi mavoko yaku. Loko Yehovha a ta va a ku tovokisile u nga ni dzrivali mine nandzra waku.”

32 Hiloko Davhida a byela Abigayili a ku: “A a dzrumisiwi Yehovha, Xikwembu Nkulukumba wa Israyele, lweyi a ku zrumiki kwanga namunhla! 33 Ingiki Xikwembu Nkulukumba a nga ku tovokisa hi kola ka wutlhazri byaku! Ingiki u nga tovokisiwa hi ku va u ni sivele ku va ni nandzru wa ngati ni ku va u ni sivele ku tidzrihisela hi mavoko yanga. 34 Na funga ha Yehovha, Xikwembu Nkulukumba wa Israyele lweyi a hanyaka, lweyi a ni siveliki ku ku yentxa swa ku biha, leswaku loko a u nga buyanga hi ku kahlula, mundzruku a byi ta xa na ku nga ha na wanuna ni mun’we a kaya ka Nabali.” 35 Xileswo Davhida a yamukela leswi Abigayili a mu teliki na swone a gama a ku: “Muka hi ku zrula, ni xi yingelile xikombelo xaku nakone ni ta xi hetisisa.”

36 Hi ku famba ka nkama, na Abigayili kutani a tlhelele ka Nabali, Nabali a a li ku tikholiseni a kaya kwake ingiki i hosi, a a nyonxile nakone a e pfotlo hi ku popswa. Abigayili a nga mu byelanga ntxhumu ku ya tlhasa mundzruku ka kone mixweni. 37 Loko byi xile, na byala kutani byi hangalakile, a nkatake a mu dzrungulela hinkwaswu. Loko a twa ndzrava leyo, a mbilu yake yi woma ingiki hi loko e fa ni mizri wake wu woma ingi i zribye. 38 Ntsrhaku ka kolomu ka 10 wa masiku, Yehovha a dlaye Nabali.

39 Loko Davhida a tiva leswaku Nabali a file a ku: “A ku dzrumisiwi Yehovha lweyi a ni yimeleliki a va a ni huluxa ka tingana leti Nabali a ni txheliki tone, nakone a ni siveliki ku yentxa leswi bihiki, Yehovha a yentxe leswaku a wubihi bya Nabali byi tlhela hi yene!” Hiloko Davhida a zruma vhanu leswaku va ya mu gangisela Abigayili. 40 Loko malandzra ya Davhida ma tlhasa ka Abigayili a Karmeli, ma mu byela ma ku: “Davhida a hi zrume leswaku hi ta ta ku teka akuva u ya va nsati wake.” 41 Abigayili a tekela ku khinsama a lavisa hansi a ku: “Mine nandzra waku ni lulamele ku va mutizri akuva ni hlampswa milenge ya malandzra ya hosi yanga.” 42 Abigayili a tekela ku tilulamisela a va a khwela mbongolweni a famba na a heketiwa hi ntlhanu wa malandzra ya xisati; a fambe ni malandzra ya Davhida a ya va nsati wake.

43 Davhida a a tekane na Ahinowama wa le Yezriyele, kutani ha wubidzri byavu va va vasati vake.

44 Kambe Sawulo a a teke n’wanake Mikali, nsati wa Davhida, a mu nyika Paliti n’wana wa Layixi, lweyi a a li wa le Galimu akuva a va nsati wake.