Genesisi

44 Ntsrhaku ka leswo, Yosefa a byela wanuna lweyi a a lavisela yindlu yake a ku: “Tata masaka ya vavanuna lava hi swakuda leswi va taka kota ku swi zrwala, u gama u peta mali ya mun’wana ni mun’wana ka saka dzrake. 2 Kambe ka saka dzra lwentsrongo, handle ka ku peta mali yake peta ni kopo dzranga dzra prata.” Xileswo wanuna lweyo a yentxa leswi Yosefa a mu byeliki ku yentxa swone.

3 A mixweni na dambu dzra ha ku xa, va tsrhike vavanuna lavo va muka ni timbongolo tavu. 4 Na va nga si ya kwini, Yosefa a byela wanuna lweyi a a lavisela yindlu yake a ku: “Kahlula u landzra vavanuna lavayani! Loko u va kuma va byeli leswi: ‘Ha yini mi yentxe swa ku biha nakasi mi yentxeliwe leswinene? 5 Ha yini mi yive kopo ledzri n’winyi wanga a nwaka ha dzrone a tlhela a dzri tizrisela ku hlahluva?* Leswi mi swi yentxiki swi bihe ngopfu swinene.’”

6 Nkama lowu a nga va kuma, a va byele mazritu lawo. 7 Kambe va mu hlamula va ku: “We hosi, ha yini u hlaya leswo? Hine malandzra yaku a hi nge txhuki hi yentxa ntxhumu wa ku fana ni lowo. 8 Phela nkama lowu hi buyiki hi le tikweni dzra Kanana, hi ku buyisele mali leyi hi yi kumiki a masakeni yezru. Kutani a hi ta yivela yini a prata kumbe woru dzra le kaya ka n’winyi waku? 9 Lweyi a taka kumiwa na a ni kopo dzroledzro a fanela ku fa nakone hine vambeni hi ta va swikazrawa swa n’winyi waku.”* 10 Hiloko nandzra wa Yosefa a ku: “A swi ve hi lani mi hlayaka ha kone: lweyi a taka kumiwa ni kopo a ta va xikazrawa xanga, kambe n’wine vambeni a mi nge ti nyikiwa nandzru.” 11 Kutani mun’wana ni mun’wana wavu a xixa saka dzrake hi ku kahlula a dzri pfula. 12 Hiloko nandzra wa Yosefa a djuletela ha hombe, a sungula hi saka dzra lwenkulu a gamisa hi saka dzra lwentsrongo. Hi wugamu a kopo dzri kumiwa ka saka dzra Benjamini.

13 Xileswo va handzrula mpahla yavu, kutani mun’wana ni mun’wana a hayeka ntsrhwalu wake ka mbongolo yake va va va tlhelela doropeni. 14 Loko Yuda ni vamakwavu va nghene kaya ka Yosefa, va kume na a nga si suka; hiloko va khinsama mahlweni kwake. 15 Yosefa a va byela a ku: “Ha yini mi ni yentxele leswi? A mi nga swi tivi leswaku wanuna wa ku fana na mine a nga nyikela mintlhamuxelo leyi nga yone hi ta wumundzruku a tlhela a gungula hinkwaswu?”* 16 Yuda a hlamula a ku: ‘Ha ha ta ku yini we hosi? A ha ha na swa ku hlaya. A hi nge yentxi ntxhumu ku kombisa leswaku hi lulamile. Xikwembu Nkulukumba wa ntiyiso a kombise xihoxo xa malandzra yaku. Ku sukela swoswi we hosi, hine ni lweyi a kumiwiki ni kopo hi swikazrawa swaku!” 17 Nambitanu Yosefa a hlamula a ku: “Ni nge txhuki ni yentxa leswo! Wanuna lweyi a kumiwiki ni kopo hi yene lweyi a taka va xikazrawa xanga, kasi n’wine vambeni mukani hi ku zrula ka papayi wenu.”

18 Kutani Yuda a mu tsrhindzrekelela a ku: “Na ku tsratsriya hosi yanga, no kombela, ni pfumeleli mine nandzra waku ni vulavula na wene hosi yanga. U nga hlundzrukeli nandzra waku, hikusa wene hosi u fana na Faro hi ku kongoma. 19 Wene hosi u vutise malandzra yaku u ku: ‘Papayi wenu a ha hanya? Mi ni makwavu mumbeni?’ 20 Hi va hi ku hlamula we hosi hi ku: ‘Papayi a ha hanya nakone a duhwalile, futsrhi hi ni makwezru lwentsrongo lweyi a mu pswaliki na kutani a duhwalile. Kambe a makwavu a file, nakone makwezru yelweyo hi yene wuswake a saliki ka vana va mamana wake, nakone papayi a mu zrandzra ngopfu swinene.’ 21 Ntsrhaku ka leswo we hosi, u byele malandzra yaku u ku: ‘Ni buyelani ni makwenu halenu akuva ni mu vona.’ 22 Kambe hi game hi ku byela leswi we hosi: ‘A mupfana a nge suki a siya papayi wake. Loko o suka, nakunene papayi a ta fa.’ 23 Hiloko we hosi u byela malandzra yaku u ku: ‘Loko mi nga li na yene makwenu lwentsrongo, mi nga ti lani.’*

24 “Kutani loko hi tlhelele ka nandzra waku, papayi, hi mu byele mazritu lawa we hosi u ma hlayiki. 25 Hi ku famba ka nkama papayi a te: ‘Tlhelani mi ya hi xavela swakudanyana.’ 26 Kambe hi mu byele leswi: ‘A hi nge tlheli. Hi to tlhela ntsena loko makwezru lwentsrongo o famba na hine, hikusa a hi fanelanga hi ya ka wanuna lwiyani* na hi nga li na yene makwezru lwentsrongo.’ 27 Kutani a nandzra waku, papayi, a hi byela a ku: ‘N’wine mi swi tiva ha hombe leswaku a nkatanga e ni pswalela vana vabidzri ntsena. 28 Kambe mun’we wavu a ni siyile, ni va ni ku: “Swi nga yentxeka a phatluleliwile!” Nakone ku sukela kolanu a na ha zanga ni mu vona. 29 Loko mo teka ni lweyi a ya kule na mine a gama a kumana ni nghozi a fa, nakunene mi ta yentxa leswaku ni ku duhwala kwanga ni dzrila ni za ni ya fulamela Sizreni.’*

30 “Kutani loko no tlhelela ka nandzra waku, papayi, na hi nga li na yene mupfana, lweyi a mu zrandzraka ngopfu,* 31 nkama lowu a taka vona leswaku a hi buyanga na yene, a ta fa, kutani hine malandzra yaku nakunene hi ta yentxa leswaku nandzra waku, papayi, ni ku duhwala kwake a va ni xiviti a za a ya fulamela Sizreni.* 32 Mine nandzra waku ni tiyisekise papayi mayelanu ni mupfana, ni ku: ‘Loko no txhuka ni nga buyi na yene ni ta zrwala nandzru mahlweni kwaku wutomi byanga hinkwabyu.’ 33 Xileswo ni kombela u tsrhika mine nandzra waku ni sala mbangwini wa mupfana swanga xikazrawa xaku, akuva mupfana a tlhela ni vamakwavu. 34 Ni nga swi kotisa kuyini ku tlhelela ka papayi na ni nga li na yene? A ni nge tiyi ku vona papayi na a xaniseka a za a ya fa!”