Mabindzru Ya Ku Tibeka Hansi Ka Wulawuli Bya Xikwembu Nkulukumba

KU TIBEKA hansi ka Xikwembu Nkulukumba, Hosi Ya Wuyako Hinkwabyu, i swa lisima akuva hi kota ku hleleka a ku yentxeni ka ku zrandzra ka Yehovha. Ha byi pfumela wuzrangeli bya N’wanakwe a bandleni dzra wukriste hi tlhela hi yingiseta nawu wa wunhloko ka swiyenge swimbeni swa wutomi. Ku tibeka hansi ka wulawuli bya Xikwembu Nkulukumba hi ndlela leyo swi pfuna hinkwavu lava yentxaka tanu.

² Mhaka ya leswaku mhunu a tibeka hansi ka wulawuli lebyi nga nawini yi sungulele a xizrambeni xa Edeni. I xileleto lexi humaka ka Xikwembu Nkulukumba, lexi kumekaka ka Genesis 1:28 na 2:16, 17. Swivumbiwa leswitsrongo a swi fanela ku tibeka hansi ka mhunu, kasi a vhanu a va fanela ku tibeka hansi ka Xikwembu Nkulukumba ni wuhosi byakwe. Ku tibeka hansi ka wulawuli lebyo bya Xikwembu Nkulukumba a swi ta tisa mihandzru ya ku fana ni ku zrula ni ku hleleka lokunene. Nawu wa wunhloko wu game wu khanyisiwa ka 1 Ba-le-Korinte 11:3. Mupostola Pawulo a tsrale leswi: ‘Kambe dzri zrandzra kuva mi tiva leswaku a nhloko ya wanuna mun’wana ni mun’wana i Kriste; a nhloko ya wansati i wanuna, a nhloko ya Kriste i Xikwembu Nkulukumba.’ Leswi swi kombisa leswaku ka lulamiselo ledzri hinkwadzru, hinkwavu va le hansi ka wulawuli, handle ka Yehovha ntsena.

³ Vhanu vanyingi namunhla a va pfumeli kumbe ku yingiseta wuzrangeli. Ha yini? Timhaka ti sungulele a Edeni loko vapswele vezru va ku sungula va hlawule ku bakanya wuhosi bya Xikwembu Nkulukumba ha vomu. (Gn 3:4, 5) Nambitanu, ntsrhunxeko wavu a wu tatanga nkombe. Ku hlaya ntiyiso, va ndzruluke swikazrawa swa xivumbiwa xa ku biha, Sathana Diyavulosi. Wupfukeli lebyo bya ku sungula byi hambukise vhanu ka Xikwembu Nkulukumba. (Kl 1:21) Swanga mihandzru, ntalu wa vhanu namunhla va le hansi ka wulawuli bya lwe mfani.​—1Yh 5:19.

⁴ Hi ku dondzra xihlayelamfuzri xa Zritu dzra Xikwembu Nkulukumba hi tlhela hi hanya ha xone, hi kote ku phondla hi huma ka nhlohlotelo wa Sathana. Swanga Timboni leti tinyiketeliki ti tlhela ti babatisiwa, hi pfumelela Yehovha ku va Hosi ya wutomi byezru. Hi pfumelelana na Hosi Davhida, lweyi a twisisiki leswaku Yehovha i ‘Hosi ya hinkwaswu’. (1Mk 29:11) Ina, hi twisisa leswi hi mbilu ya ku titsrongahata: ‘Swi tivani leswaku Yehovha hi yene a nga Xikwembu Nkulukumba, hi yene lweyi a nga hi hamba; hi vakwe; hi tiko dzrakwe, ni tihamba takwe.’ (Ps 100:3) Ha pfumela leswaku Yehovha i nkulu nakone a faneliwa hi ku titsrongahata kwezru loku heleliki, swanga hi leswi a vumbiki hinkwaswu. (Mpf 4:11) Swanga vatizreli va Xikwembu Nkulukumba wa ntiyiso, hi landzrela Yesu Kriste, lweyi a bekiki xikombiso lexi hetisekiki xa ku tibeka hansi ka Xikwembu Nkulukumba.

⁵ Xana Yesu a dondzre yini ka mintxhumu leyi a xanisekiki ha yone na a ha li misaveni? Ba-Heberu 5:8 ya hlamula: ‘Nambi e n’wana a dondzrile ku yingiseta hi leswi a vavisekiki ha swone.’ Ina, Yesu a titsrhongahate ka Tatana wakwe wa le matilweni hi ku dumbeka minkama hinkwayu. Handle ka leswo, Yesu a nga yentxanga ntxhumu ni wun’we hi ku tisungulela. A nga vulavulanga swa ku sukela kwakwe; nambi ku lwela ku dzrumisiwa. (Yh 5:19, 30; 6:38; 7:16-18) Hi nkama wa wutizreli byakwe, a a nyonxisiwa hi ku yentxa ku zrandzra ka Tatana wakwe, nambi leswi ku yentxa tanu a swi mu vitanela valala ni ku xanisiwa. (Yh 15:20) Ni loko swi li tanu, Yesu a tibeke hansi ka Xikwembu Nkulukumba. Yesu a titsrongahatile ku ya tlhasela “lifu a mhandzrini ya nxanisa”. Ku titsrongahata kwakwe hi ndlela leyi heleliki a mahlweni ka Yehovha ku hakeliwe hi tindlela tinyingi, ta ku fana ni ku huluxiwa ka vhanu hi lani ku nga helikiki, ku tlakuxiwa kwakwe ni ku dzrumisiwa ka Tatana wakwe.​—Flp 2:5-11, NM; Hb 5:9.

LOMU HI NGA TITSRONGAHATELAKA WULAWULI BYA YEHOVHA

⁶ Loko hi titsrongahata ka Xikwembu Nkulukumba hi ku yentxa ku zrandzra kwakwe, hi huluka ku tsrhamela ku hlatiyela ni ku hetiwa ntamu, ku nga mintxhumu leyi kazrataka lava yalaka ku tibeka hansi ka wuhosi bya Yehovha. Nala wezru, Diyavulosi, wusiku ni nhlikanhi a tsrhama na a djuletela tindlela ta ku hi phozra. Hi ta vona ku huluxiwa a mavokweni ya mubihi lweyo loko hi lwisana na yene hi tlhela hi tibeka hansi ka Yehovha hi mbilu ya ku swi zrandzra.​—Mt 6:10, 13; 1Pe 5:6-9.

⁷ A ndzreni ka bandla dzra wukriste, hi titsrongahatela wunhloko bya Kriste ni wulawuli lebyi a nyikiki ‘nandzra lwe wa ku dumbeka ni ku tlhazriha’. Leswi swi khumba ndlela leyi hi khomaka vambeni ha yone ni ndlela leyi hi hanyisanaka na vone ha yone. Ku tibeka hansi ka Xikwembu Nkulukumba a ndzreni ka bandla swi ta hi susumetela ku yingiseta Zritu dzrakwe a swiyin’wini hinkwaswu swa wutomi. Ku yingiseta koloko ku patsra wutizreli byezru, ku ya a mintlhanganwini hi tlhela hi hlengemela ka yone hi ku hlamula, wuxaka byezru ni vakulu ni ndlela leyi hi seketelaka ha yone malulamiselo ya nhlengeletanu.​—Mt 24:45-47; 28:19, 20; Hb 10:24, 25; 13:7, 17.

⁸ Ku tibeka hansi ka Xikwembu Nkulukumba swi tlhela swi byala ku zrula, nsizrelelo ni nhleleko lowunene wa bandla dzra wukriste. Wumhunu bya Yehovha byi tlhela byi vonekisiwa hi lava va tibekaka hansi kwakwe. (1Ko 14:33, 40) Ku tiva kwezru nhlengeletanu ya Yehovha swi hi susumetela ku hlaya leswi hlayiwiki ha Hosi Davhida. Ntsrhaku ka ku vona ku hambana loku nga kone a makazri ka vatizreli va Yehovha ni vhanu va ku biha, Davhida a hlaye leswi hi ku nyonxa: ‘Va tovoka vhanu lava Yehovha a nga Xikwembu Nkulukumba wavu.’​—Ps 144:15.

⁹ A lulamiselweni dzra mutxhatu ni le ndangwini ‘a nhloko ya wansati i wanuna’. Hi nkama lowu fanaka vavanuna va fanela ku tibeka hansi ka Kriste, kasi a nhloko ya Kriste i Xikwembu Nkulukumba. (1Ko 11:3) Vasati va fanela ku tibeka hansi ka vanuna vavu, nakone vana va fanela ku yingiseta vapswele vavu. (Ef 5:22-24; 6:1) Ku ta va ni ku zrula loko xizro xin’wana ni xin’wana xa ndangu xi landzrela nawu lowu wa wunhloko.

¹⁰ Wanuna a fanela ku tizrisa wunhloko byakwe hi lizrandzru, ku fana na Kriste. (Ef 5:25-29) Loko a nga byi tizrisi hi ndlela ya ku biha kumbe a nga byi landzruli wunhloko byakwe, nsati wakwe ni vana va ta tibeka hansi kwakwe na va nyonxile. A wansati i mupfunisi kumbe muhetisisi. (Gn 2:18) Loko nsati a seketela nuna wakwe hi xitxhavu ni ku mu lehisela mbilu, a dzrumisa Xikwembu Nkulukumba a tlhela a zrandzriwa hi nuna wakwe. (1Pe 3:1-4) Loko vanuna ni vasati va landzrela swilayu swa Bibele mayelanu ni wunhloko, va bekela vanavu xikombiso xa ku tibeka hansi ka Xikwembu Nkulukumba.

¹¹ Ku titsrongahata kwezru ka Xikwembu Nkulukumba ku tlhela ku khumba vonela dzrezru hi ‘wuhosi’, hikusa ‘byi bekiwe ha Xikwembu Nkulukumba’. (Ro 13:1-7) Swanga vayaki-tiko lava landzraka nawu, vakriste va hakela tinemba, va ‘tlhelisela swa Khezari ku Khezari, ni swa Xikwembu Nkulukumba ku Xikwembu Nkulukumba’. (Mt 22:21) Handle ka leswo, malulamiselo ya ku tizra nsimu hi ku helela ma fambisana ni milawu leyi tizrisiwaka ya ku sizrelela dzrungula. Loko hi titsrongahata hi tlhela hi yingiseta wuhosi lebyi nga nawini ka mintxhumu hinkwayu leyi nga lwisaniki ni nawu wa Yehovha wa ku lulama, swi ta hi nabyalela ku tizrisa ntamu wezru hinkwawu a ntizrweni wa ku zrezra.​—Mr 13:10; Min 5:29.

¹² Ku titsrongahatela wulawuli bya Yehovha swi khumba hinkwaswu leswi hi swi yentxaka a wuton’wini byezru. Hi matihlo ya lipfumelo, hi vona siku ledzri vhanu hinkwavu va taka titsrongahata ka Yehovha Xikwembu Nkulukumba. (1Ko 15:27, 28) Mawaku ndlela leyi va taka tovokisiwa ni ku nyonxeliwa ha yone lava va yamukelaka wuhosi bya Yehovha na va nyonxile ni ku tlhela va tibeka a hansi kwakwe hi lani ku nga helikiki!