Papela Ledzri Pfaka Ka Huvo Leyi Zrangelaka

Vazrezri-Kulozri Lava Zrandzrekaka Va Madzrungula Lamanene:

A hi ku nyonxisa ka yone ndjombo leyi hi nga na yone ya ku gandzrela xikan’we Yehovha, Xikwembu Nkulukumba mun’we wa xihlayelamfuzri! Hi ‘vatizri-kulobye’ vakwe, lava tamelisiwiki ntizro wa ku xwenga ni lowu huluxaka wutomi, ku nga wa ku zrezra ni ku dondzrisa madzrungula lamanene ya Mfumu wakwe. (1Ko 3:9; Mt 28:19, 20) Akuva hi hetisisa ntizro lowu wa misava hinkwayu hi ku zrula ni hi wumun’we, hi fanela ku hleleka hi lani ku heleliki.​—1Ko 14:40.

Buku ledzri dzri ta ku pfuna ku twisisa ndlela leyi a bandla dzra wukriste dzri tizraka ha yone namunhla. Dzri vulavula hi timfanelo ni wutiyanguleli lebyi u nga na byone swanga Mboni ya Yehovha. Loko u nyika lisima timfanelo taku u tlhela u hetisisa wutiyanguleli byaku u ta ‘tiyisiwa ku pfumeleni’.​—Min 16:4, 5; Ga 6:5.

Xileswo, hi ku kutxa leswaku u dondzra buku ledzri hi wuzron’wana. Vona tindlela leti u nga tizrisaka dzrungula ledzri ha tone a wuton’wini byaku. Hi xikombiso, loko wa ha ku va muzrezri lwa nga siki babatisiwa u nga yentxa yini akuva u babatisiwa swanga mun’we wa Timboni ta Yehovha? Hi tlhelo dzrimbeni, loko u babatisiwile, u nga yentxa yini akuva u kula he moyeni ni ku yengesela ntizro waku ka Yehovha? (1Tm 4:15) U nga yentxa yini leswaku ku va ni ku zrula a bandleni? (2Ko 13:11) Vona tinhlamulo ta swivutiso leswo ka buku ledzri.

Loko u li wanuna lwa babatisiwiki, u nga yentxa yini akuva u faneleka ku tizra swanga nandzra wa wutizreli, hi ku famba ka nkama u va nkulu? Swanga hi leswi vhanu vanyingi va nhingenaka a nhlengeletanwini ya Yehovha, ku ni xivileleko lexikulu xa vamakwezru vaxinuna lava fanelekaka akuva va zrangela. Buku ledzri dzri ta ku pfuna ku twisisa leswaku swi patsra yini ‘ku djula kumbe ku lwela’ ku tlhasela makungu ya moya.​—1Tm 3:1.

Hi khongota hi mbilu hinkwayu leswaku buku ledzri dzri ku pfuna ku vona xiyenge xaku a lulamiselweni dzra Yehovha u tlhela u xi nyika lisima. Hi mi zrandzra ngopfu hinkwenu, nakone hi ya mahlweni hi khongota akuva mi va makazri ka lava taka nyonxa hi la ku nga helikiki a ku gandzreleni ka Yehovha, Tatana wezru wa le tilweni.​—Ps 37:10, 11; Eza 65:21-25.