Yakobe A Yamukela Pfindla

A nkama lowu Izaki a nga txhata na Rabeka a a ni 40 wa malembe. Phela a a mu zrandzra ngopfu swinene. Hi ku famba ka malembe, Rabeka a pswale vana vabidzri va mahahla.

A vito dzra lweyi a zrangiki a pswaliwa a ku li Esawu kasi dzra lweyi a landzreliki a ku li Yakobe. Esawu a a swi zrandzra ngopfu swinene ku fambafamba nhoveni a hlota swihazri (ku zingela), kasi Yakobe yene a a zrandzra ku tsrhama kaya.

Leswi Esawu a a li n’wana wa mativula, a a ni mfanelo ya ku kuma pfindla dzra dzrikulu ku tlula Yakobe. Wa swi tiva leswaku i yini pfindla? I hinkwaswu leswi papayi a swi siyelaka vana ntsrhaku ka loko a file, swa ku fana ni masimu kumbe mali. Kambe a pfindla ka ndangu wa Izaki a dzri patsra swidumbiso hinkwaswu leswi Yehovha a swi byeliki Abrahamu. Esawu a a nge na mhaka ni swidumbiso leswo, kambe Yakobe a a swi tiva leswaku swi ni lisima dzrikulu ngopfu swinene!

Siku dzrin’wana Esawu a ya ku hloteni ka swihazri a va a tlhela kaya na a kazrale ngopfu swinene, kutani a kuma Yakobe na a sweka swakuda swa ku nun’hwela. Hiloko a byela Yakobe a ku: ‘Ni twa ndlala, ni phamelinyana timbaweni leto.’ Yakobe a mu hlamula a ku: ‘Ni ta ku phamela, kambe ku sungula ni dumbisi leswaku ni ta yamukela pfindla dzraku.’ Kutani Esawu a ku: ‘A ni na mhaka ni pfindla mine! U nga tsrhama na dzrone, no djula ku da ntsem!’ U yanakanya leswaku leswi Esawu a swi yentxiki ku ve wutlhazri? Im-him, a swi vanga wutlhazri. Esawu a txintxise ntxhumu wa lisima ngopfu swinene hi timbaweni.

Loko Izaki a duhwale ngopfu swinene, a vona leswaku a a li nkama lowunene wa kuva a tovokisa n’wana wa mativula. Kambe Rabeka a pfuna xigumandzreni xake Yakobe akuva xi yamukela tovoko ledzro. Nkama lowu Esawu a nga swi tsrumbula leswo, a kwata ngopfu swinene lakakuva a djula ku dlaya Yakobe. Izaki na Rabeka a va djula ku sizrelela Yakobe. Xileswo va mu byela leswi: ‘Famba u ya tsrhama ni malume waku Labani, ku ya tlhasa loko Esawu a zrulela.’ Yakobe a yingiseta vapswele vake a va a ya tsrhama kaya ka malume wake Labani akuva a huluxa wutomi byake.