Yehovha A Vulavula Na Samuwele

Muprista Lwenkulu Eli a a ni vana vabidzri lava a va vitaniwa Hofini na Feniyasi. A vana va Eli a va tizra swanga vaprista, kambe a va nga mu yingiseti Yehovha nakone a va khoma vhanu hi ndlela ya tihanyi. Nkama lowu Vaisrayele a va ya a tabernakeleni akuva va nyikela magandzrelo, Hofini na Feniyasi a va da nyama ya yinene ya kone. Kambe Eli loko a swi tivile leswo a nga yentxanga ntxhumu. Xana Yehovha a a ta pfumelela kuva leswo swi tama swi yentxeka?

Samuwele a nga va yetiselanga Hofini na Feniyasi nambileswi vone a va li vakulu kwake. Kutani Yehovha a mu nyonxele ngopfu swinene Samuwele. Ka wusiku byin’wana, loko Samuwele a li ku yetleleni, a yingela zritu dzra kukazri na dzri mu vitana, kutani a pfuka a yela Eli a tlhasa a ku: ‘Hi mine lweyi!’ Kambe Eli a ku: ‘A ni ku vitananga, tlhela u ya yetlela.’ Kambe swi tlhela swi phindha, loko Samuwele a yingele zritu ledzri hi khambi dzra wuzrazru, Eli a swi twisisa leswaku i Yehovha lweyi a vitanaka Samuwele. Xileswo, a byela Samuwele leswaku loko a tlhela a yingela zritu a fanela ku hlamula a ku: ‘Vulavula Yehovha, mine nandzra waku na ku yingela.’

Ntsrhaku ka leswo, Samuwele a tlhela a ya ku yetleleni. Hiloko a tlhela a yingela zritu na dzri ku: ‘Samuwele! Samuwele!’ Xileswo, Samuwele a hlamula a ku: ‘Vulavula Yehovha, mine nandzra waku na ku yingela.’ Kutani Yehovha a mu byela leswi: ‘Byela Eli leswaku ni ta mu yavanyisa kun’we ni ndangu wake, hikusa awa swi tiva leswaku leswi vanake va swi yentxaka a hi swinene kambe a nga yentxi ntxhumu.’ Loko byi xile, Samuwele a ya pfula swipfalu swa tabernakela, ku nga ntizro lowu a a wu yentxa siku ni siku. Kambe Samuwele a a txhava ku byela Eli leswi Yehovha a mu zrumiki ku mu byela swone. Kutani Eli a vutisa Samuwele a ku: ‘N’wananga, i yini leswi Yehovha a ku byeliki swone? Ni byeli hinkwaswu!’ Hi ndlela leyo Samuwele a mu byela hinkwaswu leswi hlayiwiki hi Yehovha.

Loko Samuwele a ya a kula, Yehovha a tame a va munghanu wake. A tikweni hinkwadzru, Vaisrayele hinkwavu va swi tivile leswaku Yehovha a a hlawule Samuwele akuva a va muprofeta ni muyavanyisi.