Davhida Na Goliyati

Yehovha a zruma Samuwele a ku: ‘Famba kaya ka Yese. Hikusa mun’we ka vanake a ta va hosi leyi landzrelaka ya Israyele.’ Samuwele a ya kaya ka Yese, kutani loko a vona n’wanake wa mativula, a tekela ku tibyela leswi: ‘A djaha ledzri hi dzroledzri langiwiki!’ Kambe Yehovha a byela Samuwele a ku: ‘A hi yene lweyi ni mu langiki. A xa lisima ngopfu kwanga a hi leswi mhunu a tsrhamisisiki xiswone hi le handle, kambe i kuva mhunu a va ni mbilu leyinene.’

Yese a gama a buyisa 6 wa vanake. Kambe Samuwele a ku: ‘A ku na lweyi a langiwiki ka lava. Xana a wa ha na vana vambeni?’ Yese a hlamula a ku: ‘Ni ni xidjahatana xin’wana ku nga Davhida. Xi le ku byiseni ka tihamba tanga.’ Kutani Yese a zrumisa kuva ku ya vitaniwa Davhida. Loko Davhida a tlhasa, Yehovha a byela Samuwele a ku: ‘Hi yelweyi ni mu langiki!’ Kutani Samuwele a teka mafuzra a ma txhela nhlokweni ya Davhida. Leswi a swi kombisa leswaku Davhida a a ta va hosi leyi landzrelaka ya Israyele.

Siku dzrin’wana, a Vaisrayele ni Vafilista va tlhangane akuva va lwa yimpi. A Vafilista a va ni sotxha dzra xihotlovila ledzri a dzri vitaniwa Goliyati, ledzri a dzri va lwela nakone siku ni siku a dzri poyilela Vaisrayele dzri ku: ‘Ni zrumelelani mhunu akuva a ta ta lwa na mine. Loko a ni hlula, hine hinkwezru hi ta va swikazrawa swenu, kambe loko mine ni mu hlula hinkwenu mi ta va swikazrawa swezru.’

Hi nkama wolowo, Davhida a a heleketela vamakwavu swakuda lava a va li masotxha; hiloko a yingela leswi Goliyati a a swi hlaya. Kutani Davhida a ku: ‘Mine ni ta lwa na yene!’ Kambe hosi Sawulo a ku: ‘Wa ha li mutsrongo.’ Kambe Davhida a mu hlamula a ku: ‘A swi na mhaka, Yehovha a ta ni pfuna.’

Sawulo a teka mpahla yake ya wusotxha a yambexa Davhida, kambe Davhida a ku: ‘A ni nge swi koti ku ya lwa na ni yambale mpahla leyi.’ Hiloko a teka xibalakatsra a va a hlawula ntlhanu wa mazribye a ma peta paxteni dzrake a kongoma lomu a ku na Goliyati. Loko Goliyati a vona Davhida, a huwelela a ku: ‘Buya halenu mupfana, ni ta ku dlaya ni va ni phamela tinyanyana ni swihazri swa nhova hi ntsrumbu waku.’ Kambe Davhida a a nga txhavi. Xileswo a mu hlamula a ku: ‘Wene u ta kwanga na u ni xipada ni tlhazri akuva u lwa na mine, kambe mine ni ta kwaku hi vito dzra Yehovha. Swi tivi leswaku a u lwi na hine kambe u lwa na Xikwembu Nkulukumba hi ku kongoma. A vhanu hinkwavu va ta swi vona leswaku Yehovha a ni ntamu ku tlula tlhazri dzrin’wana ni dzrin’wana. Yehovha a ta hi pfuna akuva hi mi dlaya hinkwenu!’

Davhida a teka zribye a dzri peta ka xibalakatsra a va a txopa hi ntamu wake hinkwawu. Kutani Yehovha a yentxa leswaku a zribye dzri ya ba mombo wa Goliyati. Hiloko Goliyati lweyi a a li xihotlovila a wa a va a fisa xiswoswo! Loko Vafilista va vona leswo, va tekela ku tsrutsruma hinkwavu. Xana wene wa mu dumba Yehovha hi lani Davhida a a mu dumba ha kone?