Hosi Ya Ku Sungula Ya Israyele

Yehovha a a hambe lulamiselo dzra leswaku Vaisrayele va zrangeliwa hi vayavanyisi, kambe vone a va djula hosi. Va byele Samuwele va ku: ‘A matiko hinkwawu ma ni tihosi, na hine hi djula hosi!’ Leswo a swi mu nyonxisanga Samuwele xileswo a khongota ka Yehovha, kutani Yehovha a mu byela leswi: ‘A Vaisrayele a va yali wene kambe va yala mine hi ku kongoma. Va byeli leswaku loko va djula hosi va ta yi kuma, kambe yi ta va xanisa ngopfu swinene.’ Hiloko Samuwele a va byela mazritu ya Yehovha, kutani va ku: ‘A hi na mhaka, hine ho djula hosi ntsem!’

Yehovha a byela Samuwele leswaku Sawulo a ta va hosi ya ku sungula ya le Israyele. Xileswo loko Sawulo a ye pfuxela Samuwele a doropeni dzra Rama, Samuwele a mu hlawulekisile akuva a va hosi. A yentxe leswo hi ku mu txhela mafuzra a nhlokweni.

Ntsrhaku ka leswo, Samuwele a tlhanganisa Vaisrayele akuva a va komba hosi leyi hlawuliwiki. Kambe a va nga mu kumi Sawulo. Ha yini? Hikusa a a tumbelile. Hiloko va mu djuletela swi phela va za va mu kuma va va va mu yimisa makazri ka xitsrhungu. Sawulo a a lehe ngopfu ku tlula vhanu hinkwavu a tlhela a xonga. Kutani Samuwele a ku: ‘Vonani lweyi Yehovha a mu hlawuliki.’ A Vaisrayele hinkwavu hi ku nyonxa va huwelela va ku: ‘A yi hanyi hosi!’

A ku sunguleni hosi Sawulo a a mu yingiseta Yehovha a tlhela a yentxa hinkwaswu leswi Samuwele a a mu byela swone, kambe hi ku famba ka nkama a tsrhike ku yingiseta Yehovha. Hi xikombiso, Sawulo a a nga na mfanelo ya ku nyikela magandzrelo ka Yehovha, kambe siku dzrin’wana loko Samuwele a mu byele leswaku a mu yimela a za a tlhasa akuva a ta nyikela magandzrelo, Sawulo nga yingisetanga. Hiloko a nyikela magandzrelo hi wuswake! U vona leswaku a yangulise kuyini Samuwele? A te: ‘A u nga fanelanga ku tsrhika ku yingiseta Yehovha.’ Xana Sawulo a dondzre xa kukazri ka xihoxo xake?

Hi ku famba ka nkama, Sawulo a ya lwa ni Vaamaleki. Kutani Samuwele a mu byela leswaku a fanela ku dlaya hinkwavu a nga siyi ni wa mun’we. Kambe a matsrhan’wini ya ku yentxa leswi a byeliwiki swone, Sawulo a tsretsrelele Agagi, hosi ya Vaamaleki. Kutani Yehovha a byela Samuwele a ku: ‘Sawulo a ni tsrhikile, a nga ni yingisetanga.’ Samuwele a kwata ngopfu a va a byela Sawulo a ku: ‘Leswi u tsrhikiki ku yingiseta Yehovha, yene a ta hlawula hosi yimbeni.’ Loko Samuwele a ndzruluka akuva a famba, Sawulo a mu khoma hi nkhantxu wu va wu handzruka hi le ponteni. Kutani Samuwele a byela Sawulo a ku: ‘Na wene Yehovha a ta ku wutlela mfumu wa Israyele.’ Kambe Yehovha a a ta wu nyika mani mfumu wolowo? Yehovha a a ta hlawula mhunu mun’wana lweyi a mu zrandzraka nakone a mu yingisetaka.