Davhida Na Sawulo

Ntsrhaku ka loko Davhida a dlaye Goliyati, hosi Sawulo a mu beke swanga muzrangeli wa masotxha. Davhida a va ni ndhuma hi leswi a a hlula ka tiyimpi ta ku tala. Minkama hinkwayu loko Davhida a buya he yimpini a vavasati a va mu tlhangaveta na va yimbelela va tlhela va kina va ku: ‘Sawulo a dlaye vavanuna vavanyingi kambe Davhida a dlaye vavanuna vavanyingi ngopfu swinene!’ Hiloko Sawulo a va ni wukwele lakakuva a djula ku dlaya Davhida.

Davhida a a swi kota ku txhaya ha hombe arpa. Siku dzrin’wana na a txhaya arpa, a txhayela hosi Sawulo, hosi Sawulo a teke tlhazri a mu txukumetela ha dzrone na a djula ku mu dlaya nakone ntsrhaku ka leswo Sawulo a tame a djuletela tindlela ta ku dlaya Davhida, nakone leswo swi yentxe Davhida a tsrutsruma a ya tumbela a mananga.

Xileswo Sawulo a teka 3.000 wa masotxha a va a famba a djuletela Davhida akuva a mu dlaya. Na a ha li ku mu djuleteleni, Sawulo a ya nghena ka mhakwa leyi Davhida kun’we ni masotxha yake a va tumbele ka yone. Hiloko masotxha ya Davhida ma ku: ‘Davhida, hi lowu mukhandlu wa ku dlaya Sawulo.’ Xileswo Davhida a nyanimela a ya lomu Sawulo a a li kone a va a tsrema xitlephunyana xa mpahla ya Sawulo, nambitanu, Sawulo a nga swi xiyanga. Kambe Davhida a biwa hi lipfalu hi leswi a kalaka a nga kombisanga xihlonipho ka hosi leyi hlawuliwiki hi Yehovha. Kutani Davhida a nga va pfumelelanga vavanuna lava a va li na yene akuva va dlaya hosi Sawulo. A gama a yangula Sawulo a mu byela leswaku inaka a mu dlayile nkama lowu a viki ni mukhandlu wa ku yentxa leswo. Xana leswo swi txintxe kungu ledzri Sawulo a a li na dzrone dzra ku dlaya Davhida?

Nikutsrongo. Sawulo a tame a djuletela Davhida akuva a mu dlaya. Ka wusiku bya kukazri Davhida ni sobrinyu wake Abixayi, va nyanimela va ya nghena ka tende ledzri hosi Sawulo a a li ka dzrone. A masotxha hinkwawu a ma yetlelile, nambi hi Abineri, lweyi a a fanela ku vonelela hosi Sawulo, na yene a a yetlelile. Kutani Abixayi a byela Davhida a ku: ‘Hi lowu mukhandlu, ni tsrhiki ni mu dlaya.’ Kambe Davhida a hlamula a ku: ‘Abixayi, swi tsrhikeli Yehovha leswi, hi yene a taka swi lulamisa. A hi teki tlhazri ni ndonga ya mati hi tifambela.’

Davhida a tlhantuka a ya ka nhava leyi a yi li kusuhi ni tende dzra Sawulo. Kutani, na a li kohala henhla ka nhava Davhida a huwelela a ku: ‘Abineri, ha yini u nga yi sizrelelanga hosi yaku? Yi kwini ndonga ya mati ya hosi Sawulo ni tlhazri dzrake?’ Loko hosi Sawulo a yingela zritu dzra Davhida a ku: ‘Inaka u ni dlayile, kambe a u swi yentxanga leswo. Na swi tiva leswaku nakunene u ta va hosi leyi landzrelaka a Israyele.’ Kutani Sawulo a muka. Kambe xana a ku li ndangu hinkwawu wa hosi Sawulo lowu a wu nyenya Davhida? Hi ta swi vona ka dondzro leyi landzrelaka.