Yesu A Hlawula Sawulo

Sawulo a pswaliwe a doropeni dzra le Tarso. A a li Mufarisi futsrhi a a wu tiva ha hombe Nawu wa Vayuda. Kambe a vakriste a a va nyenya ngopfu swinene, a a khoma vavanuna ni vavasati a va pfalela djele. Siku dzrin’wana, a vone xitsrhungu lexi a xi hlundzruke ngopfu swinene na xi khandla mudondzrisiwa Stefanu hi mazribye a za a fa kambe a nga yentxanga ntxhumu e yima a hlalela ntsena.

Sawulo a nga gamelanga ka ku pfalela vakriste a Yerusalema ntsena, leswi a a va nyenya ngopfu a patsre ni ku ya kombela muprista lwenkulu akuva a mu zrumela a Damaska leswaku a ya khoma vakriste lava a va tsrhamisa kohala. Loko a li kusuhi ni ku tlhasa a Damaska ku suketana ku va ni ku vaninga loku pfaka hi le tilweni, ku mu tsrandzrela kutani a wa hansi. Hiloko a yingela zritu dzri mu yangula dzri ku: “Sawulo, Sawulo, u ni xanisela yini?” Sawulo a vutisa a ku: “Hi wene mani Hosi?” A mu hlamula a ku: ‘Hi mine Yesu. Yana a Damaska u ta ya byeliwa leswi u fanelaka ku swi yentxa.’ Hi nkama wolowo Sawulo a fa matihlo, xileswo va mu khungisa va famba na yene a Damaska.

A Damaska a ku ni mukriste wa ku dumbeka lweyi a a vitaniwa Ananiya. Yesu a mu byela a lozrweni a ku: “Suka u ya xitaratwini lexi vitaniwaka Lulama, u ya kaya ka Yudasi u ya djuletela Sawulo wa le Tarso.” Kambe Ananiya a mu hlamula a ku: ‘Hosi, ni yingele vhanu vanyingi na va khanela hi wanuna lweyi, yene a khomelela vadondzrisiwa a va pfalela djele!’ Nambitanu Yesu a mu byela a ku: “Famba! Hikusa wanuna lweyi i xibya lexi ni xi hlawuliki akuva a twalisa vito dzranga ka matiko.”

Hiloko Ananiya a ya kumana na Sawulo, a tlhasa a ku: “Sawulo, makwezru, Hosi Yesu lweyi a humeleliki kwaku a ndleleni na wa ha buya halenu, a ni zrume akuva u ta tlhela u vona”. Hi ku kahlula Sawulo a tlhela a vona. Kutani a dondzra mayelanu na Yesu a tlhela a va mulandzreli wake. Ntsrhaku ka ku babatisiwa swanga mukriste, Sawulo a sungula ku zrezra a masinagogeni na a li xikan’we ni vapfumelikulobye. Wa yi yanakanya ndlela leyi Vayuda va hlamaliki ha yone loko va vona Sawulo na a dondzrisa vhanu mayelanu na Yesu? Va te: ‘A hi yene wanuna lweyi a a xanisa vadondzrisiwa va Yesu?’

Sawulo a zrezrele va le Damaska ku dzringana malembe mazrazru. A Vayuda a va mu nyenya ngopfu Sawulo nakone a va hamba makungu ya ku mu dlaya. Kambe loko vamakwavu va yingela leswaku va djula ku mu dlaya, va mu pfuna ku tsrutsruma. Va mu peta ka ntsrhava wa wukulu va gama va wu tsrimba va mu humesa hi mbangu wa kukazri lowu a wu pfulekile ka khumbi dzra doropa.

Loko Sawulo a tlhasa a Yerusalema, a dzringisa ku tipatsra ni vamakwavu va kohala kambe a va mu txhava. Xileswo a mupostola wa kukazri lweyi a a ni wumbilu, lweyi a a vitaniwa Barnaba, a teka Sawulo a mu yisa ka vapostola a tlhela a va tiyisekisa leswaku nakunene Sawulo a a txintxile mahanyela yake. Hiloko Sawulo a sungula ku zrezra madzrungula lamanene hi nkhinkhi kun’we ni bandla dzra le Yerusalema. Hi ku famba ka nkama a tiviwa hi vito dzra ku Pawulo.