Yonathani A Ve Munghanu Wa Ku Dumbeka A Tlhela A Va Ni Xixixi

Yonathani, mativula ya hosi Sawulo, a a li sotxha ledzri a dzri ni xixixi ngopfu swinene. Davhida a same a hlaya leswaku Yonathani a a tsrutsruma ngopfu ku tlula gama nakone a a ni ntamu ku tlula nghonyama. Siku dzrin’wana, Yonathani a vona 20 wa Vafilista a nhaveni kutani a byela mupfunisi wake a ku: ‘Hi to hlasela Vafilista ntsena loko Yehovha a hi nyika xikombiso. Loko va hi vitana akuva hi tlhantukela nhaveni hi ta swi tiva leswaku hi fanela ku ya lwa na vone.’ Hiloko Vafilista va ku: ‘Tanani hi ta lwa!’ kutani ha wubidzri byavu va famba va va va hlula Vafilista lavayani.

Swanga mativula ya hosi Sawulo, Yonathani a a ni mfanelo ya ku va hosi leyi a yi ta landzrela. Kambe Yonathani a a swi tiva leswaku Yehovha a hlawule Davhida leswaku a va hosi leyi a yi ta siva Sawulo, nambitanu Yonathani a nga mu kweletanga Davhida. Ku hlaya ntiyiso, Yonathani na Davhida a va li vanghanu lavakulu ngopfu nakone va dumbisane ku sizrelelana minkama hinkwayu. Yonathani a nyike Davhida xiyambalu xake, tlhazri, wugubu ni bandhi dzrake akuva a tiyisa wunghanu byavu.

A nkama lowu Davhida a a tsrutsruma hosi Sawulo, Yonathani a yela Davhida a ya mu byela leswi: ‘Tiya u tlhela u va ni xixixi. Yehovha a ku hlawulile leswaku u va hosi, nambi papayi awa swi tiva leswo!’ A u swi naveli ku va ni munghanu lwenene wa ku fana na Yonathani?

Yonathani a beke wutomi byake nghozini makhambi ya ku siyanasiyana akuva a pfuna munghanu wake Davhida. Yonathani a a swi tiva leswaku papayi wake Sawulo a djula ku dlaya Davhida, xileswo a mu byele a ku: ‘Papayi, loko u dlaya Davhida u ta va na wo doha hikusa a nga yentxanga ntxhumu wa ku biha.’ Hiloko Hosi Sawulo a hlundzrukela Yonathani hi leswi a swi hlayiki. Hi ku famba ka malembe, Yonathani na Sawulo va file a yimpini.

Ntsrhaku ka loko Yonathani a file, Davhida a djuletele Mefiboxeti, n’wana wa Yonathani, a va a mu byela leswi: ‘Leswi papayi waku a a li munghanu wanga lwenkulu, ni ta ku hlayisa wutomi byaku hinkwabyu. U ta tsrhama kaya kwanga nakone u ta da menzeni wanga.’ Ina, Davhida a nga mu dzrivalanga munghanu wake Yonathani!