Xidoho Xa Hosi Davhida

Loko hosi Sawulo a file, Davhida a ve hosi na a ni 30 wa malembe. Ka wusiku bya kukazri na Davhida a li henhla ka yindlu yake, a vone wansati wa ku xonga swinene! Kutani Davhida a gungula leswaku a vito dzra wansati yelweyo i Batixeba nakone i nsati wa Uriya, mun’we wa masotxha yake. Xileswo hosi Davhida a zruma vhanu leswaku va ya vitana Batixeba. Hiloko va hamba swa tinkuku xikan’we a va Batixeba a kuma nyimba. Kutani Davhida a zama tindlela ta ku fihla leswi a swi yentxiki. A byela muzrangeli wa yimpi leswaku a beka Uriya a mahlweni lani yimpi a yi hisa kone akuva a dlayiwa. Ntsrhaku ka loko Uriya a dlayiwile a yimpini, Davhida a teke Batixeba a va nsati wake.

Yehovha a yi vonile mintxhumu hinkwayu ya ku biha leyi Davhida a yi yentxiki, kutani a zruma muprofeta Natani leswaku a ya vulavula na hosi Davhida. Natani a tlhasa a byela Davhida a ku: ‘A ku ni wanuna wa kukazri lweyi a a ganyile nakone a a ni tihamba tinyingi, ni wanuna wa kukazri lweyi a a li xisiwana lweyi a o va ni hamba yin’we leyi a a yi zrandzra ngopfu. Wa swi tiva leswi wanuna lweyo wa ku ganya a swi yentxiki? A teke hamba ya yin’we leyi wanuna lwiya wa xisiwana a a li na yone.’ Loko hosi Davhida a yingela leswo, a hlundzruka ngopfu a va a ku: ‘Wanuna lweyo wa ku ganya a faneliwa hi lifu!’ Kutani muprofeta Natani a byela Davhida a ku: ‘Leswo, hi leswi wene hosi u swi yentxeliki Uriya.’ Loko a yingela leswo, Davhida a tisola ngopfu a va a hlaya leswi ka Natani: ‘Ni dohele Yehovha.’ Xidoho lexo xi tise swikazratu ka Davhida kun’we ni le ka ndangu wake. Yehovha a mu khatisile Davhida kambe a mu pfumelele leswaku a tama a hanya hikusa a titsrongahatile a tlhela a pfumela leswaku a dohile.

Davhida a a djula ku yakela Yehovha tempele kambe Yehovha a hlawule n’wanake Solomoni akuva a dzri yaka. Xileswo hosi Davhida a sungula ku hlengeletela mintxhumu leyi n’wanake Solomoni a a ta yi tizrisa a ku yakeni ka tempele a va a ku: ‘A tempele dzra Yehovha dzri fanela ku yakiwa dzri xonga. Solomoni a ha li mutsrongo, xileswo ni ta mu pfuna ku lulamisela mintxhumu hinkwayu leyi djulekaka.’ Hiloko hosi Davhida a humesa mali ya yinyingi akuva a pfunisa ka ntizro wa ku yaka. A djuletela vatizri lava nga ni wuswikoti, a hlengeletela woru ni prata ni ku tlhela a zrumela leswaku ku buyisiwa mapulangu hi le Tiri ni le Sidoni. Loko a li kusuhi ni ku fa, Davhida a byela n’wanake Solomoni a ku: ‘Yehovha a ni zrume kuva ni ku komba ndlela leyi a tempele dzri fanelaka ku yakiwa ha yone. A ta ku pfuna, u nga txhavi. Vana ni xixixi u va u sungula ku yaka!’