Leswi Swi Yentxekiki A Nhaveni Ya Karmeli

A mfumu wa Israyele wa 10 wa tinxaka, a wu zrangeliwa hi tihosi leti a ti bihe timbilu, kambe hosi Akabe a a tlulisa mpimu. Akabe a a txhate na Yezabele, wansati lweyi a a yentxa mintxhumu ya ku biha ngopfu swinene nakone a a gandzrela xikwembu xa madzrimi lexi vitaniwaka Bali. Hosi Akabe na Yezabele va yentxe leswaku a Vaisrayele hinkwavu va gandzrela Bali, va tlhele va dlaya vaprofeta va Yehovha. Xana i yini leswi Yehovha a swi yentxiki? A zrumele muprofeta Eliya akuva a nyikela madzrungula ya kukazri ka hosi Akabe.

Eliya a byele hosi Akabe leswaku hi mhaka ya wubihi lebyi a a byi yentxa, a mpfula a yi nga ha ti na a Israyele. A mpfula a yi nanga ku dzringana malembe mazrazru, hi leswo swi yentxiki leswaku a vhanu va pfumala swakuda nakone ku va ni ndlala. Hi ku famba ka nkama, Yehovha a tlhele a zrumela muprofeta Eliya leswaku a ya ka hosi Akabe. Hosi Akabe a byele Eliya a ku: ‘Hi wene u hi vangeliki swikazratu leswi! Hi wene u nga ni nandzru.’ Xileswo Eliya a hlamula a ku: ‘Im-him, a hi nandzru wanga, i nandzru waku hikusa u yentxe leswaku Vaisrayele va gandzrela Bali. Swoswi a hi hambe xikambelo akuva hi vona leswaku i mani Xikwembu Nkulukumba wa ntiyiso. Hlengeleta vhanu hinkwavu ni vaprofeta va Bali a henhla ka Nhava ya Karmeli.’

Loko vhanu hinkwavu va hlengeletanile a nhaveni, Eliya a va byele a ku: ‘Tihlawulelani, loko a li leswaku Xikwembu Nkulukumba wa ntiyiso i Yehovha mu gandzrelani, kambe loko a li Bali gandzrelani yene. A xikambelo hi lexi, 450 wa vaprofeta va Bali va fanela ku lulamisela a gandzrelo kutani va khongota ka xikwembu xavu. Kasi mine ni ta lulamisela gandzrelo ni va ni khongota ka Yehovha. Lweyi a taka hlamula xikhongoto hi ku xixa a ndzrilo wu hisa magandzrelo, hi yene Xikwembu Nkulukumba wa ntiyiso.’ Xileswo vhanu hinkwavu va pfumelile.

Kutani a vaprofeta va Bali va lulamisele gandzrelo, va gama va khongota siku hinkwadzru ka xikwembu xavu, va ku: ‘Bali ha kombela, hi hlamule!’ Kambe Bali a nga va hlamulanga, hiloko Eliya a sungula ku va poyilela a ku: ‘Tlakuxani mazritu yenu hi lani mi nga kotaka ha kone. Swi nga yentxeka a li ku yetleleni, xileswo huwelelani hi zritu dzra ku tlakuka mi ta kota ku mu pfuxa.’ Phela vaprofeta va Bali va khongote siku hinkwadzru kambe xikwembu xavu Bali a xi zanga xi va hlamulile.

Kutani ku tlhase khambi dzra Eliya, yene a beke a gandzrelo dzrake a altarini a va a txhela mati a henhla ka altari. Hiloko Eliya a khongota a ku: ‘We Yehovha, ni kombela u yentxa leswaku vhanu hinkwavu va swi tiva leswaku hi wene Xikwembu Nkulukumba wa ntiyiso.’ Hi ku kahlula, Yehovha a xixa ndzrilo hi le tilweni kutani wu hisa gandzrelo dzra Eliya. Vhanu hinkwavu va huwelela va ku: ‘Yehovha i Xikwembu Nkulukumba wa ntiyiso.’ Eliya a ku: ‘Mi nga tsrhiki vaprofeta va Bali va tsrutsruma.’ Hi siku dzroledzro 450 wa vaprofeta va Bali va dlayiwile.

Loko ku humelele tlavi dzritsrongo, muprofeta Eliya a byele hosi Akabe a ku: ‘Ku ta na mpfula leyikulu ngopfu swinene. Kahlula u khwela n’qolo u muka.’ Hiloko hosi Akabe a tsrutsrumisa n’qolo yake hi lani a nga kota ha kone. Kambe Eliya hi ku pfuniwa ha Yehovha a kote ku tsrutsruma a va a khaluta n’qolo ya hosi Akabe. Kutani ku va ni matlavi manyingi ya ntima a matilweni ku ba moya wa wukulu, ku va ku sungula ku na mpfula leyikulu. Hi wugamu, a ndlala yi hela! Xana a swikazratu hinkwaswu swa Eliya a swi helile? Hi ta swi vona ka dondzro leyi landzrelaka.