Yehovha A Tiyise Eliya

Loko Yezabele a twa leswi humeleliki vaprofeta va Bali, a hlundzruka ngopfu swinene. A va a zrumela dzrungula ka Eliya a ku: ‘Mundzruku u ta fa ku fana ni vaprofeta va Bali.’ Hiloko Eliya a txhava ngopfu swinene a va a tsrutsruma a ya mananga. Eliya a khongota ka Yehovha a ku: ‘Yehovha a na ha gwenti, ni tsrhiki ni fa.’ Leswi Eliya a a kazralile, a khomiwa hi wuzrongo a va a yetlela hansi ka nsinya.

Kutani ku tlhasa ntsrumi yi mu pfuxa yi ku: ‘Pfuka u da.’ Hiloko Eliya a pfuka a vona pawu dzra ku hisa ni hotsro ya mati. Kutani a da ni ku nwa a gama a tlhela a yetlela. A ntsrumi yi tlhela yi mu pfuxa, kutani yi mu byela yi ku: ‘Dana, u fanela ku kuma ntamu hikusa wa ha ta famba mpfhuka wa ku leha.’ Kutani Eliya a tlhela a da. Hi ku landzrela, a yendzra ku dzringana 40 wa masiku, wusiku ni nhlikanhi, a za ya tlhasa a Nhaveni ya Horebe. Loko a tlhasile, a nghena ndzreni ka mhakwa a va a yetlela. Kutani Yehovha a vutisa Eliya a ku: ‘U yentxa yini lani?’ Hiloko Eliya a hlamula a ku: ‘A Vaisrayele a va xi hetisisanga xidumbiso lexi va ku yentxeliki xone. Va gilhite maaltari, va dlaya vaprofeta vaku kutani swoswi va djula ku ni dlaya na mine.’

Kutani Yehovha a byela Eliya leswaku a huma mhakweni a ya yima nhaveni. Hiloko Yehovha a kombekisa ntamu wake. Ku sungula, hi ku yentxa leswaku ku ba moya wa wukulu ngopfu swinene wu khaluta hi le mhakweni. Ntsrhaku ka leswo, hi ku yentxa leswaku ku va ni ku tsrekatsreka ka misava ku tlhela ku va ni ndzrilo. Hi wugamu, Eliya a yingela zritu na dzri vulavulela hansi. Hiloko a funeketa nhloko hi bantxi a va a huma a mhakweni. Loko Yehovha a mu vutisa leswaku ha yini a tsrutsrumile, Eliya a hlamula a ku: ‘Ne sala wuswanga.’ Yehovha a mu byela a ku: ‘A u wuswaku, ka ha ni kolomu ka 7.000 wa vhanu a Israyele lava va ha tamaka va ni gandzrela. Famba u ya tota Elixa leswaku a ku siva, a va muprofeta.’ Ntsrhaku ka leswo, Eliya a famba a ya yentxa leswi Yehovha a mu zrumiki swone. Wene ke, u swi vonisa kuyini, xana Yehovha a ta ku pfuna loko u mu yingiseta? Ina, a ta ku pfuna! A hi voneni leswi swi nga humelela hi nkama lowu a ku nga ni mpfula.