Yehovha A Sizrelele Yesu

Ka tlhelo dzra le wuxeni dzra Israyele a ku ni vhanu lava a va kholwa leswaku a tinyeleti ti nga va kongomisa. Ka wusiku byin’wana, vavanuna va kukazri lava a va tsrhama mbangwini wolowo va vone ntxhumu wa ku fana ni nyeleti leyi phatimaka na wu famba a mpfhukeni. Hiloko va wu landzrelela va za va ya tlhasa a Yerusalema. Loko va tlhase a Yerusalema va sungule ku vutisela vhanu va ku: ‘A kwini ntsrongwana lweyi a taka va hosi ya Vayuda? Hi tele ku ta ta mu khinsamela.’

Loko Heroda lweyi a a li hosi a Yerusalema, a twa hi ta hosi leyimpshwa a swi mu nyonxisanga. Xileswo a vitana vaprista a va vutisa leswi: ‘Xana ntsrongwana lweyi a taka va hosi a ta pswaliwa kwini?’ A vaprista va mu byela leswi: ‘A vaprofeta va hlaye leswaku a a ta pswaliwa Betlehema.’ Kutani Heroda a vitana vavanuna lava a va ta hi le tikweni dzra le Wuxeni, a va byela a ku: ‘Fambani a Betlehema mi ya djuletela ntsrongwana lweyo, loko mi mu kumile buyani mi ta ni byela lomu a kumekaka kone akuva na mine ni ta ya mu khinsamela.’ Kambe Heroda a o hemba.

A nyeleti yi tlhela yi sungula ku famba, kutani a vavanuna lavayani va yi landzrelele va za va ya tlhasa a Betlehema. Hiloko a nyeleti yi tlhasa yi yima henhla ka yindlu leyi ntsrongwana a a li ka yone. Kutani vavanuna lavayani va nghena va va va kuma Yesu ni mamana wake Mariya. Hiloko va mu khinsamela va va va mu nyika swihiwa swa woru, muzri wa ku nun’hwela ni mira. Xana i Yehovha lweyi a  kongomisiki vavanuna lavayani akuva va ya tlhasa lomu Yesu a a li kone? Nikutsrongo!

Ka wusiku byolebyo, Yehovha a byela Yosefa a lozrweni a ku: ‘Heroda a djula ku dlaya Yesu, xileswo teka Mariya na Yesu mi tsrutsruma mi ya a Egipta. Tsrhamani kohala ku ya tlhasa loko ni mi byela leswaku mi tlhelela.’ Hi ku kahlula Yosefa a teka ndangu wake va tsrutsruma va ya Egipta.

Yehovha a byela vavanuna lava a va pfa hi le wuxeni leswaku va nga ha tlheleli ka Heroda. Loko Heroda a xiya leswaku vavanuna lavayani a va ha tlhelelanga kwake a kwata ngopfu swinene. Leswi Heroda a kalaka a nga ku tivanga lomu Yesu a a li kone, a zrumela leswaku ku dlayiwa swidjahatana hinkwaswu swa le Betlehema leswi a swi ni ntanga ya Yesu. Kambe Yesu a nga dlayiwanga hikusa kutani a a le Egipta.

Hi ku famba ka nkama Heroda a fa, kutani Yehovha a byela Yosefa a ku: ‘Swoswi mi nga tlhelela a Israyele.’ Hiloko Yosefa, Mariya kun’we na Yesu va tlhelela a Israyele, va va va ya tsrhama a doropeni dzra Nazareta.