Nkama Lowu Yesu Na A Ni 12 Wa Malembe

Yosefa na Mariya a va tsrhama a Nazareta, kun’we na Yesu ni vanavu vambeni. Yosefa a a tizra swanga muvatli akuva a wundla ndangu wake nakone a a wu dondzrisa mayelanu na Yehovha ni milawu yake. A ndangu wa Yosefa minkama hinkwayu a wu ya a sinagogeni akuva wu ya gandzrela Xikwembu Nkulukumba, nakone lembe ni lembe a wu ya a Yerusalema akuva wu ya tlangela Paxkwa.

Na Yesu a ni 12 wa malembe, yene, vapswele vake kun’we ni vamakwavu, va teke liyendzro dzra ku ya a Yerusalema. A doropa dzra Yerusalema a dzri tale hi vhanu lava a va ya tlangela Paxkwa. Loko va hetile ku tlangela Paxkwa, Yosefa na Mariya va teke liyendzro va tlhelela kaya na va yanakanya leswaku Yesu a le ka ntlawa wa vhanu lava a va famba na vone. Kambe loko va fambe va mu djuletela a xikazri ka maxaka ni lava a va va tiva, a va mu kumanga.

Yosefa na Mariya va tlhelele a Yerusalema va ya mu djuletela ku dzringana masiku mazrazru kambe a va nga mu kumi. Hiloko va ya mu djuletela a tempeleni, va va va ya mu kuma na a tsrhame a makazri ka vadondzrisi na a yingiseta ha hombe leswi a va swi dondzrisa ni ku va hamba swivutiso. A vadondzrisi va hlamalisiwe ngopfu swinene ha Yesu lakakuva va sungula ku mu hamba swivutiso. Phela a va nyonxisiwa hi tinhlamulo ta Yesu nakone a va tlhela va swi xiya leswaku Yesu a yi twisisa ha hombe Milawu ya Yehovha.

Yosefa na Mariya a va kazrateke ngopfu lakakuva Mariya a byela Yesu a ku: ‘N’wananga, hi fambe hi ku djuletela mimbangwini hinkwayu, a u li kwini?’ Yesu a mu hlamula a ku: ‘A mi swi tivi leswaku ni fanela ku va ndlwini ka Papayi wanga?’

Kutani Yesu a tlhelela a Nazareta kun’we ni vapswele vake. Yosefa a dondzrise Yesu a ntizro wa ku vatla. Xana Yesu a a li mhunu wa matsrhamela muni na a ha li ntsrongo? Loko a ye a kula, a tame a va ni wutlhazri nakone a a nyonxeliwa ha Xikwembu Nkulukumba ni hi vhanu.