Yesu Ni Wansati Wa Musamariya

Ntsrhaku ka loko ku khalute Paxkwa, na Yesu ni vadondzrisiwa vake va tlhelela a Galileya, va khalute he Samariya. Loko va li kusuhi ni doropa dzra Sikari, Yesu a yime ka mbangu lowu a wu vitaniwa xihlovo xa Yakobe, nakone loko a li ku wiseni ka xihlovo xolexo, vadondzrisiwa vake va ye doropeni akuva va ya xava swakuda.

Hiloko ku tlhasa wansati lweyi a a ta ku keni ka mati, kutani Yesu a mu byela a ku: ‘Ni kombela mati ya ku nwa.’ Wansati lweyo a hlamula a ku: ‘Ha yini u vulavula na mine, phela mine ni Musamariya. A Vayuda a va vulavuli ni Vasamariya.’ Kambe Yesu a ku: ‘Loko a wo swi tiva leswaku u vulavula na mani, a u ta ni kombela mati nakone mine a ni ta ku nyika mati ya wutomi.’ Kutani wansati lweyo a vutisa Yesu a ku: ‘Xana u djula ku hlaya yini? Nambi xikelelu xinene a u na xone.’ Kutani Yesu a mu hlamula a ku: ‘Lweyi a nwaka mati lawa ni taka mu nyika wone, a nge he ti tlhela a twa tozra ni siku ni dzrin’we!’ Kutani wansati lweyo a mu byela a ku: ‘Hosi, ni nyiki mati lawo.’

Kutani Yesu a gama a mu byela leswi: ‘Famba u ya vitana nuna waku, u buya na yene lani xihloveni.’ Kambe wansati a ku: ‘A ni na nuna.’ Xileswo Yesu a mu byela leswi: ‘Leswi u swi hlayaka i ntiyiso, hikusa u txhate 5 wa makhambi nakone wanuna lweyi u nga na yene swoswi, a u txhatanga na yene.’ Hiloko wansati a byela Yesu a ku: ‘Hosi, na swi vona leswaku u muprofeta, a Vasamariya va kholwa leswaku hi nga swi kota ku gandzrela Xikwembu Nkulukumba ka nhava leyi, kambe a Vayuda va kholwa leswaku swi ngo koteka ku mu gandzrela a Yerusalema ntsena. Ni dumba leswaku loko Mesiya a tlhasa a ta hi dondzrisa ndlela leyinene ya ku gandzrela.’ Ntsrhaku ka leswo, Yesu a byela wansati lweyo wa Musamariya leswi a a ngi ngi sama a swi byela mhunu, a ku: ‘Hi mine Mesiya.’

Hiloko wansati lweyo a tlhela hi ku tsrutsruma a ya ka doropa dzrake a va a byela Vasamariya a ku: ‘Ni yanakanya leswaku ni kume Mesiya. Yene a tiva hinkwaswu mayelanu na mine. Buyani mi ta mu vona!’ A hiloko va mu landzra ku ya tlhasa xihloveni, va va va yingiseta Yesu loko a dondzrisa.

Vasamariya va zrambe Yesu leswaku a tsrhama ka doropa dzravu. Kutani Yesu a dondzrise kohala ku dzringana masiku mabidzri, nakone vhanu vanyingi va kombise lipfumelo kwake. Kutani va byela wansati wa Musamariya va ku: ‘Ntsrhaku ka loko hi yingisete wanuna lweyi, ha dumba leswaku hi yene muhuluxi wa misava!’