Yesu A Basisa Tempele

Hi malanga ya lembe dzra wu 30 N.Y., Yesu a ye a Yerusalema nakone vhanu vanyingi va yile a doropeni ledzro akuva va ya tlangela Paxkwa. Loko va li ku hambeni ka fexta, a va nyikela magandzrelo ya swihazri a tempeleni. Van’we va buye ni swihazri swavu kasi vambeni a va swi xava ko Yerusalema.

Hiloko Yesu a nghena tempeleni, a vona vhanu na va xavisa swihazri, a va tiya va tizrisa mbangu lowu Yehovha a a gandzreliwa ka wone akuva va ganya mali yinyingi! Xana Yesu a yangulise kuyini? Yesu a nyenyetseke ngopfu lakakuva a hamba nkhavi hi ku tizrisa pindzra a va a hlongola tihamba ni tihomu hi wone, a patsre ni ku hangalasa mimenza ya vatxintxisi va mali kutani a mali yi wetetela hansi yi hlwanyekela. Kutani Yesu a byela lava a va xavisa matuva a ku: ‘Susani mintxhumu yenu lani! Tsrhikani ku yentxa yindlu ya Papayi wanga yi va bazara.’

Lava a va li tempeleni va hlamalisiwe hi leswi Yesu a swi yentxiki. A vadondzrisiwa vake va dzrimuke wuprofeta mayelanu na Mesiya lebyi a byi kombisa leswaku Mesiya a a ta hisekela yindlu ya Xikwembu Nkulukumba.

Ntsrhaku ka malembe mazrazru, hi lembe dzra wu 33 N.Y., Yesu a tlhele a basisa tempele hi khambi dzra wubidzri. Yesu a nga zanga a pfumelile leswaku vhanu va dzrela yindlu ya Papayi wake.