Diyavulosi A Dzringa Yesu

Ntsrhaku ka loko Yesu a babatisiwile, a moya wa ku xwenga wu yentxe leswaku a ya mananga. Yesu a hete 40 wa masiku na a nga di ntxhumu, xileswo a a twa ndlala ngopfu swinene. Hiloko Diyavulosi a ya dzringa Yesu a ku: ‘Loko u li n’wana wa Xikwembu Nkulukumba, byela mazribye lawa ma ndzruluka ma va mapawu.’ Kambe Yesu a hlamula hi ku tizrisa Matsralwa a ku: ‘Ku tsraliwile, a mhunu a nga fanelanga a hanya hi pawu ntsena, kambe a fanela ku hanya ni hi zritu dzrin’wana ni dzrin’wana ledzri humaka non’wini wa Yehovha.’

Hi ku landzrela Diyavulosi a tlhela a dzringa Yesu, a mu byela a ku: ‘Loko u li n’wana wa Xikwembu Nkulukumba, titxukumeteli hansi hikusa ku tsraliwe leswi: A ta zrumela tintsrumi take ti ta ku khamukela.’ Kambe Yesu a tlhela a mu hlamula hi ku tizrisa Matsralwa a ku: ‘U nga txhuki u dzringa Yehovha Xikwembu Nkulukumba waku.’

Ntsrhaku ka leswo, Sathana a mu komba mimfumu hinkwayu ya misava ni ku phatima ka yone, a mu byela a ku: ‘Ni ta ku nyika mintxhumu leyi hinkwayu loko wo khinsama kan’we u ni gandzrela.’ Kutani Yesu a mu hlamula a ku: ‘Suka Sathana! Hikusa ku tsraliwe leswi: U fanela ku gandzrela Yehovha Xikwembu Nkulukumba waku, u tizrela yene ntsena.’

Xileswo Diyavulosi a famba, a hiloko ku buya tintsrumi ti ta nyika Yesu swakuda. Ku sukela kolanu Yesu a sungula ku zrezra madzrungula lamanene ya Mfumu wa Xikwembu Nkulukumba, ku nga ntizro lowu a a zrumeliwe ku ta ta wu yentxa lani misaveni. A vhanu a va swi zrandzra leswi Yesu a a va zrezrela swone, a va patsra ni ku mu landzrelela lani a a ya kone.