Yesu A Va Mesiya

Yohane a a zrezra a ku: ‘Ku ni lweyi a taka ntsrhaku kwanga nakone a ni ntamu ku ni tlula.’ Nkama lowu Yesu a a ni 30 wa malembe, a suke a Galileya a ya Nambyeni wa Yordani, ku nga lomu Yohane a a tolovela ku babatisa vhanu kone. Yesu a a djula leswaku Yohane a mu babatisa, kambe Yohane a te: ‘A ni nge ku babatisi, hi mine ni fanelaka ku babatisiwa ha wene.’ Yesu a hlamula Yohane a ku: ‘Yehovha a djula leswaku wene u ni babatisa.’ Hiloko va nghena Nambyeni wa Yordani, kutani Yohane a nyuveta Yesu a matini.

Hi nkama wolowo a matilo ma pfuleka, kutani a moya wa ku xwenga wa Xikwembu Nkulukumba wu xikela henhla ka Yesu na wu fana ni tuva, hiloko Yehovha a vulavula na a li tilweni a ku: ‘U N’wananga lweyi a zrandzrekaka; ni ku yamukelile!’

Loko moya wa Yehovha wu xikele ka Yesu wu yentxe leswaku a va Kriste kumbe Mesiya. Swanga Mesiya, Yesu kutani a a lulamele ku hetisisa ntizro lowu Yehovha a mu zrumeliki wone.

Ntsrhaku ka loko Yesu a babatisiwile a ye mananga lani a nga heta 40 wa masiku. A gama a tlhela a ya vulavula na Yohane. Loko a ya a mu tsrhindzrekelela, Yohane a ku: “Vonani, Xihambana xa Xikwembu Nkulukumba lexi susaka xidoho a misaveni!” Yohane a hlaye leswo hikusa a a djula leswaku vhanu hinkwavu va swi tiva leswaku Yesu a a li Mesiya. Xana wa swi tiva leswi humeleliki Yesu loko a li mananga? Hi ta swi vona ka dondzro leyi landzrelaka.