Yohane Mubabatisi A Lulamisela Ndlela

Loko Yohane, n’wana wa Zakariya na Elizabeti a kulile, a ve muprofeta. Yehovha a hlawule Yohane akuva a byela vhanu leswaku Mesiya a a li ku teni. Yohane a a nga dondzrisi a masinagogeni ni le madoropeni kambe a a dondzrisa a tintlhaveni. A vhanu a va ta hi le Yerusalema ni le Yudeya akuva va ta ta dondzrisiwa hi Yohane. A a va dondzrisa leswaku akuva va nyonxisa Xikwembu Nkulukumba a va fanela ku tsrhika ku yentxa mintxhumu ya ku biha. Xileswo, vanyingi a va tisola va va va babatisiwa hi Yohane a Nambyeni wa Yordani.

Yohane a a hanya hi mintxhumu yitsrongo. A a yambala mpahla leyi hambiwiki hi voya bya kamela nakone a a da mintete ni wulombe bya nhova. A vhanu a va swi djula ku mu tiva ha hombe Yohane, nambi Vafarisi ni Vasaduki lava a va tikulisa va yile va ya mu vona. Hiloko Yohane a va byela a ku: ‘Mi fanela ku txintxa mahanyela yenu mi va mi tisola. Mi nga pimisi leswaku mi hlawulekile hi leswi mi tibyelaka leswaku mi vana va Abrahamu. Leswo a swi hlayi swone leswaku mi vana va Xikwembu Nkulukumba.’

Vhanu vanyingi va ye ka Yohane va ya mu vutisa va ku: ‘Xana hi fanela ku yentxa yini akuva hi nyonxisa Xikwembu Nkulukumba?’ Kutani Yohane a va hlamula a ku: ‘Loko mi ni swiyambalu swibidzri nyikani xin’we lweyi a kalaka a nga li na xone.’ Xana wa swi tiva leswaku ha yini Yohane a hlaye leswo? A a djula ku dondzrisa leswaku akuva hi nyonxisa Xikwembu Nkulukumba hi fanela ku zrandzra vhanu van’wana.

Yohane a byele vahakelisi va tinemba a ku: ‘Ku djuleka mi dumbeka mi tlhela mi nga kanganyisi mhunu.’ Kasi a masotxha a ma byela leswi: ‘Mi nga hembi nakone mi nga pfumeli ku xaviwa.’

A Vaprista ni Valevhi va vutisa Yohane va ku: ‘Hi wene mani? A vhanu hinkwavu a va djula ku swi tiva.’ Kutani Yohane a va hlamula a ku: ‘Hi mine lwa huwelelaka a mananga, ni kongomisa vhanu ka Yehovha hi lani muprofeta Ezaya a hlayiki ha kone.’

A vhanu a va swi zrandzra leswi Yohane a a va dondzrisa swone. Vhanu vanyingi a va tivutisa leswaku Yohane a a li yene Mesiya kumbe im-him. Kambe a va hlamula a ku: ‘Ku ni lweyi a ni tlulaka, nakone a ha ta futsrhi a ni ntamu ku ni tlula, nakone a swi ni faneli nambi ku tlhantlha masandaliya yake. Mine ni mi babatisa hi mati kambe yene a ta mi babatisa hi moya wa ku xwenga.’