Yesu A Yentxa Mahlolana Manyingi

Yesu a te lani misaveni akuva a ta zrezra madzrungula lamanene ya Mfumu wa Xikwembu Nkulukumba. Yehovha a mu nyike moya wa ku xwenga akuva a kota ku yentxa mahlolana, ku yentxela leswaku a kombisa leswi a taka swi yentxa swanga Hosi. A a ni wuswikoti bya ku hanyisa mixaka hinkwayu ya mavabyi. Kun’wana ni kun’wana lomu a a ya kone a a teliwa hi vhanu lava vabyaka a va a va hanyisa. A a hanyisa va ku fa matihlo, tindleve, va ku limala nambi lava a va xanisiwa hi mademona. Ntsena hi ku khumba ponta ya mpahla yake a swi koteka kuva mhunu a daheka. A vhanu a va landzra Yesu hinkwaku lomu a a ya kone. Nambi hi minkama leyi a a djula ku va wuswake a wisa, a nga zanga a va hlongolile.

Siku dzrin’wana, na Yesu a li mutini wa kukazri va buyise wanuna mun’we lweyi a a limalile, kambe a muti a wu tale ngopfu hi vhanu lakakuva a swi nga koteki kuva wanuna lweyo a nghenisiwa, kutani va gwavula swa ku fulela hi swone va mu xikisa hi lani Yesu a a li kone. Yesu a byela wanuna lweyo a ku: ‘Sekeleka u famba!’ Hiloko a sekeleka, kutani vhanu va hlamala ngopfu swinene!

Siku dzrimbeni loko Yesu a nghena ka doropa dzra kukazri, a huweleliwa hi 10 wa vavanuna lava a va ni nhlokonho, na va yime he kule, va ku: ‘Yesu, hi pfuni!’ A minkameni yoleyo, lava a va ni nhlokonho a va nga pfumeleliwi ku va kusuhi ni vhanu van’wana. Kutani Yesu a va byela leswaku va ya tempeleni, ku nga leswi Nawu wa Yehovha a wu hlaya swone, leswaku lava va dahiwiki mavabyi ya nhlokonho va fanela ku swi yentxa. Na va ha li ndleleni ya ku ya a tempeleni, vavanuna lavo va daheka. Loko mun’we ka lava nhlokonho a xiya leswaku a a dahekile, a tlhela akuva a ya tlangela Yesu ni ku dzrumisa Xikwembu Nkulukumba. Ka lava 10 ko va yene ntsena lweyi a tlheliki a ya tlangela Yesu Kriste.

A ku ni wansati wa kukazri lweyi a a vabya ku dzringana 12 wa malembe, a a kazratekile nakone a a djula ku dahiwa. Leswi a ku tale hi vhanu, a kunyulutela hi le xikazri kwavu a va a khumba ponta ya mpahla ya Yesu, kutani a tekela ku daheka. Yesu a gama a vutisa a ku: ‘I mani a nga ni khumba?’ Hiloko wansati lweyo a sungula ku txhava ngopfu swinene, a gama a ya ka Yesu a ya mu byela ntiyiso. Kambe Yesu a mu txhavelela a ku: ‘N’wananga, famba hi ku zrula!’

A ku ni wanuna wa kukazri lweyi a a vitaniwa Yayiro, a ye ka Yesu a tlhasa a mu kombela a ku: ‘Na ku kombela, buya kaya kwanga hikusa xin’hwanyatana xanga xi vabya ngopfu.’ Kambe na Yesu a nga si tlhasa kaya ka Yayiro, a xin’hwanyatana xi fa. Loko Yesu a tlhasa, a kuma leswaku ku ni vhanu va vanyingi lava a va yela ku ya txhavelela ndangu. A hi loko Yesu a va byela a ku: ‘Mi nga dzrileni hikusa a xin’hwanyatana xe yetlela ntsena.’ Kutani Yesu a khoma voko dzra xin’hwanyatana a ku: ‘N’hwanyana, pfuka!’ O na ku hlaya leswo, a xin’hwanyatana xi tekela ku sekeleka xi sungula ku fambafamba. Kutani Yesu a byela vapswele va xin’hwanyatana lexo akuva va xi nyika swakuda. Wa yi yanakanya ndlela leyi vapswele va xin’hwanyatana lexo va titwiki ha yone?