Yesu A Hlawula 12 Wa Vapostola

Ntsrhaku ka loko Yesu a zrezre ku dzringana lembe ni hamfu, a a fanela ku teka xiboho xa lisima swinene! Xana i vamani lava a a ta va hlawula leswaku va tizrisana na yene? I vamani lava a a ta va wupfisa leswaku va sala va zrangela bandla dzra wukriste? Akuva a teka xiboho lexo Yesu a a ta vilela mpfunu wa Yehovha, xileswo a ye nhaveni na a li wuswake a tlhasa a khongota wusiku hinkwabyu. Loko byi xile a hlengeleta valandzreli vake a va a hlawula 12 wa vone akuva va ta va vapostola vake. Wa ha ma dzrimuka mavito yavu? Hi lawa: Petro, Andreya, Yakobe, Yohane, Filipi, Bartolomewu, Tomasi, Matewu, Yakobe n’wana wa Alifewu, Tadewu, Simoni na Yudasi Iskariyota.

Hinkwavu va 12 a va fambafamba na Yesu. Ntsrhaku ka loko a va wupfisile, Yesu a va zrume kuva va ya ku zrezreni na va li wuswavu. Yehovha a va nyike wuswikoti bya ku hlongola mademona ni bya ku daha mavabyi.

Yesu a vitane vapostola vake swanga vanghanu vake nakone a a va dumba. A vafarisi a va va dzrela vapostola hi leswi a va nga dondzranga ka swikole swa swiyimu xa le henhla, kambe Yesu a a va wupfisile akuva va hetisisa ntizro lowu a va nyikiki wone. A vadondzrisiwa a va ta va na Yesu ka minkama ya lisima a wuton’wini byake, ya ku fana ni nkama lowu a a ta dlayiwa ha wone nambi ka wa ku pfuxiwa kwake. Ku fana na Yesu, vanyingi ka vapostola vake a va li va le Galileya. Van’we kwavu a va txhatile.

A vapostola a va nga hetisekanga xileswo a va pfa yentxa swihoxo. Minkama yimbeni a va vulavula mintxhumu na va nga pimisanga ha hombe, va pfa va teka swiboho leswi hoxekiki, va nga lehisi mbilu nakone a va tsrhamela ku holova hi leswaku a ku li mani wa lisima makazri kwavu. Nambitanu, a va li vhanu lavanene lava zrandzraka Yehovha. Hi vone a va ta va masungulu ya bandla dzra wukriste ntsrhaku ka loko Yesu a tlhelele tilweni.