Yesu A Khomiwa

Yesu ni vapostola vazrazru va ye Nhaveni ya Minhlwazri, a a li xikazri ka wusiku nakone a ku ni n’weti. Loko va tlhasa a jardim dzra Getsemani, Yesu a byela vapostola a ku: “Salani kola mi tama mi zrindzra.” Yesu a tsrhindzreka kulenyana na vone kutani a khinsama, na a kazrateke ngopfu a khongota ka Yehovha a ku: “A ku yentxeki ku zrandzra kwaku.” Kutani Yehovha a zrumela ntsrumi akuva yi ya tiyisa Yesu. Loko Yesu a tlhelela ka vapostola vake, a kuma vapostola lavazrazru na va yetlelile, hiloko a va byela a ku: ‘Pfukani, a hi nkama wa ku yetlela lowu, a nkama wu tlhasile wa kuva ni nyikeliwa mavokweni ya valala vanga.’

Na swi nga tekanga nkama, Yudasi a tlhase ka jardim dzra Getsemani na a zrangela ntlawa wa vhanu lava tameliki swipada ni tinhonga. A a ku tiva lomu a a ta mu kuma kone Yesu hikusa a va tolovela ku ya ka jardim ledzro. Yudasi a byele masotxha leswaku a a ta ma komba Yesu. Xileswo Yudasi a kongoma Yesu kutani a mu byela leswi: ‘Xawani Mudondzrisi’, kutani a mu n’qunta. Yesu a ku: ‘Yudasi, u ni wonga hi ku ni n’qunta?’

Yesu a vutisa lava buyiki na Yudasi a ku: “Mi djuletela mani?” Va hlamula va ku: “Hi djuletela Yesu wa le Nazareta.” Kutani Yesu a ku: “Hi mine lweyi.” Hiloko valala va tlhela he ntsrhaku, va wa hansi. Yesu a tlhela a va vutisa a ku: “Mi djuletela mani?” Va tlhela hlamula va ku: “Hi djuletela Yesu wa le Nazareta.” Hiloko Yesu a ku: ‘Ni mi byelile leswaku hi mine lweyi, tsrhikani vavanuna lava va famba.’

Loko Petro a vona leswi a swi yentxeka a teka xipada a tsrema ndleve ya wanuna lweyi a vitaniwaka Malku, lweyi a a li nandzra wa muprista lwenkulu. Kambe Yesu a khumba ndleve ya Malku a va a mu daha. Ntsrhaku ka leswo Yesu a byela Petro a ku: ‘Tlhelisa xipada mbangwini wa xone, hikusa loko u lwa hi xipada u ta dlayiwa hi xipada.’ Kutani masotxha ma khoma Yesu ma mu tsrimba mavoko, kambe a vapostola vake va tsrutsruma. A masotxha ma teka Yesu ma mu yisa ka Anasi muprista lwenkulu. Kutani Anasi a hamba Yesu swivutiso, ntsrhaku ka leswo a mu yisa ka muprista lwenkulu, lweyi a a vitaniwa Kayafasi. Kutani i yini leswi yentxekeliki vapostola va Yesu?