Petro A Yala Yesu

Na Yesu a ni vapostola vake ka kwartu dzra le henhla a va byela leswi: ‘Hinkwenu mi ta ni tsrutsruma ka wusiku lebyi.’ Kambe Petro a ku: ‘Mine im-him, nambiloko hinkwavu va ngo ku tsrutsruma, mine a ni nge ti za ni ku tsrutsruma.’ Kambe Yesu a byela Petro a ku: ‘Na nkuku wu nga si na yimba, wene u ta va na u hlaye kazrazru leswaku a u ni tivi.’

Loko masotxha ma teke Yesu ma mu yisa kaya ka Kayafasi, a vapostola vanyingi va mu tsrutsrumile. Kambe vapostola vabidzri va mu landzrile na va li xikazri ka xitsrhungu. Mun’we wavu a a li Petro, nakone a nghene mutini wa Kayafasi a va a tsrhama a wozra ndzrilo. Na Petro a ha le ku wozreni ka ndzrilo, a nandzra wa xisati wa Kayafasi a mu vonile a va a hlaya leswi: ‘Na ku tiva! Wene a u na Yesu.’

Kambe Petro a mu byela leswi: ‘Im-him, a ni nga li na yene, futsrhi a ni swi tivi ni leswaku u vulavula ha mani!’ Kutani Petro a kongoma xipfalwini, kambe a nandzra mun’wana wa xisati a byela vhanu a ku: ‘Wanuna lweyi a a na Yesu.’ Hiloko Petro a mu hlamula a ku: ‘Mine ni ku mu tiva a ni mu tivi Yesu.’ Kutani wanuna wa kukazri na yene a ku: ‘Nakunene wene u mun’we wa vone! Swi tikomba hi mavulavulela yaku, u Mugalileya ku fana na Yesu.’ Kambe Petro a hlambanya a ku: ‘Ni ku mu tiva Yesu lweyi mi vulavulaka ha yene a ni mu tivi!’

Hi nkama wolowo a nkuku wu yimba. Petro a vona Yesu loko a ndzruluka a mu lavisa. Petro a dzrimuka mazritu ya Yesu, kutani a huma handle a ya dzrila hi xiviti.

Na ku yentxeka leswo, a huvo ya Sanedri yi tlhanganile a kaya ka Kayafasi akuva yi yavanyisa Yesu. Vavanuna lava kutani a va teke xiboho xa ku dlaya Yesu, kambe a va ha djuletela wumboni bya ku kombisa leswaku Yesu a tlule nawu, o va ku, a va byi kumanga hikusa Yesu a a ngi ngi sama a tlula nawu. Kutani Kayafasi a vutisa Yesu hi ku kongoma a ku: ‘Xana u n’wana wa Xikwembu Nkulukumba?’ Yesu a hlamula a ku: ‘Ina, ni yene.’ Hiloko Kayafasi a ku: ‘A ha ha vileli wumboni byin’wana, yene a zruke Xikwembu Nkulukumba!’ A huvo hinkwayu yi pfumelelana yi ku: ‘Wanuna lweyi a faneliwa hi ku fa.’ Kutani va mu ba, va mu thukela mazri va tlhela va mu funeketa wuso. Nakone va mu be hi swibakela na va ku: ‘Leswi u nga muprofeta hi byeli leswaku i mani a ku biki!’

Loko byi xile, a huvo ya Sanedri yi tlhanganile nakone yi tlhele yi vutisa Yesu yi ku: ‘Xana u n’wana wa Xikwembu Nkulukumba? Kutani Yesu a hlamula a ku: ‘N’wine hi ku kongoma mi hlayile leswaku ni yene.’ Xileswo va hlaye leswaku Yesu a ni nandzru wa kuva a zruke Xikwembu Nkulukumba. Ntsrhaku ka leswo va mu teka va mu yisa ka muti wa Pontiyu Pilatu lweyi a a li govhernadori wa Muroma. Xana i yini leswi landzreliki? Hi ta swi vona ka dondzro leyi landzrelaka.