Yesu A Humelela Ka Vaphasi Va Tihlampfi

Ntsrhaku ka loko Yesu a humelele ka vapostola, Petro a ye phasa tihlampfi ka lwandle dzra le Galileya. A fambe na Tomasi, Yakobe, Yohane ni vadondzrisiwa lavan’wana. Va zama ku phasa tihlampfi wusiku hinkwabyu kambe a va nga kumi ntxhumu.

Hi mundzruku ka kone mixweni, va vona wanuna wa kukazri na a yime nkingeni wa lwandle. Kutani wanuna lweyo a huwelela a ku: ‘Mi phasile?’ Va mu hlamula va ku: “Im-him!” A gama a ku: “Txukumetelani nkukutu hi tlhelo dzra xinene dzra boti.” Hiloko vadondzrisiwa va yentxa hi lani a va byeliki ha kone. Kutani loko va koka nkukutu va xiya leswaku a wu tale hi tihlampfi. A tihlampfi a ti li tinyingi ngopfu lakakuva va hluleka ni ku koka nkukutu va wu nghenisa a botini! Hi nkama wolowo Yohane a swi gungula leswaku wanuna lwiyani a a li Yesu. Kutani a ku: “I Hosi!” Hi ku kahlula, Petro a titxukumetela a matini a va a hlambeta ku ya tlhasa nkingeni wa lwandle. A vadondzrisiwa lavan’wana va mu landzra na va famba hi boti.

Loko vadondzrisiwa va tlhasa a nkingeni wa lwandle va vona pawu ni hlampfi na yi woxiwa a ndzrilweni. Kutani Yesu a byela vadondzrisiwa vake leswaku va buyisa tihlampfi tin’wana akuva ti woxiwa. A va Yesu a ku: ‘Buyani hi da.’

Ntsrhaku ka loko va game ku fihlula, Yesu a vutisa Petro a ku: ‘Petro, xana u ni zrandzra ngopfu ku tlula ku phasa tihlampfi?’ Petro a hlamula a ku: ‘Hosi, wa swi tiva leswaku na ku zrandzra!’ Yesu a ku: “Phamela tihamba tanga.” Yesu a tlhela a mu vutisa a ku: ‘Petro, xana wa ni zrandzra?’ Petro a mu hlamula a ku: “Ina Hosi, wa swi tiva leswaku na ku zrandzra.” Hiloko Yesu a mu byela leswaku a byisa swihambana swake. Yesu a tlhela a mu vutisa hi khambi dzra wuzrazru a ku: ‘Petro, xana wa ni zrandzra?’ Petro a xukuvala a va a hlamula a ku: “Hosi, u tiva mintxhumu hinkwayu; wa swi tiva leswaku na ku zrandzra.” Kutani Yesu a mu byela a ku: “Phamela swihambana swanga.” A tlhela a mu byela a ku: “Tama u ni landzrela.”