Ku Pfuxiwa Ka Yesu

Ntsrhaku ka loko Yesu a file, wanuna wa kukazri lweyi a a ganye ngopfu nakone a a vitaniwa Yosefa, a ya ka Pilatu a ya kombela leswaku a mu pfumelela ku xixa a ntsrumbu wa Yesu a mhandzrini. Yosefa a teka ntsrumbu wa Yesu a wu tsrondzriyela hi panu ya linyu leyi a yi totiwe mafuzra ya ku nun’hwela, a va a wu lahla ka sizra ledzri a dzra ha li nyiwana. A gama a pfala nyangwa wa sizra hi zribye dzra dzrikulu. Hiloko vaprista lavakulu va byela Pilatu va ku: ‘Hi txhava leswaku a vadondzrisiwa va Yesu va nga ya sizreni va ya yiva ntsrumbu wake va gama va ku a pfuxiwile ku feni.’ Kutani Pilatu a ku: ‘Lemani zribye dzra nyangwa wa sizra mi tlhela mi dzri vonelela.’

Ntsrhaku ka masiku mazrazru, vavasati va kukazri va ya sizreni na ka ha li mpundzru kambe va tlhasa va kuma leswaku a zribye dzri susiwile. Kutani ntsrumi leyi a yi li ndzreni ka sizra yi byela vavasati lava yi ku: ‘Mi nga txhavi, Yesu a pfuxiwile. Fambani mi ya byela vadondzrisiwa vake akuva va ya tlhangana na yene a Galileya.’

Mariya Magadala a famba hi ku tsrutsruma a ya djuletela Petro na Yohane, nakone loko a va kumile a va byela leswi: ‘Ku ni lweyi a tekiki ntsrumbu wa Yesu!’ Hiloko Petro na Yohane va tsrutsruma va ya sizreni. Loko va vona leswaku a ntsrumbu wa Yesu a wu nga ha li kone a sizreni, va muka.

Loko Mariya a tlhelela sizreni a vona tintsrumi tibidzri na ti le ndzreni ka sizra, kutani Mariya a byela tintsrumi a ku: ‘A ni ku tivi lomu va yi yisiki kone hosi yanga.’ Hiloko Mariya a vona wanuna wa kukazri, a va a pimisa leswaku i jardineru. Kutani Mariya a vutisa wanuna lweyo a ku: ‘Xana u yi yisi kwini Hosi yanga?’ Hiloko wanuna lweyo a ku: “Mariya!” Kutani Mariya a swi xiya leswaku wanuna lwiyani a a li Yesu, a va a huwelela a ku: “Mudondzrisi!” Kutani a mu khoma. A hi loko Yesu a mu byela leswi: ‘Famba u ya byela vamakwezru leswaku u ni vonile.’ Mariya a famba hi ku tsrutsruma a ya byela vadondzrisiwa leswaku a vone Yesu.

Hi siku dzroledzro, a vadondzrisiwa vabidzri a va suka Yerusalema va kongoma Emawusi. Hiloko wanuna wa kukazri a sungula ku longoloka na vone a va a va vutisa leswaku a va bula ha yini. A vadondzrisiwa va mu hlamula va ku: ‘A u si swi yingela leswi humeleliki? Ka masiku mazrazru lama khalutiki a vaprista lavakulu va lelete leswaku Yesu a dlayiwa, kambe swoswi vavasati van’wana va hlaya leswaku Yesu awa hanya.’ Kutani wanuna lweyo a vutisa a ku: ‘A mi swi kholwi leswi swi hlayiwiki hi vaprofeta? Hikusa va hlaye leswaku Yesu a ta fa, kambe ntsrhaku ka masiku mazrazru a ta pfuxiwa.’ A ya mahlweni a va tlhamuxela Matsralwa. Kutani loko va tlhasa Emawusi, a vadondzrisiwa va kombela wanuna lweyo leswaku a tsrhama na vone wusiku lebyo. Na va nga si lalela, wanuna lweyo a hamba xikhongoto, kutani a vadondzrisiwa va swi xiya leswaku wanuna lweyo i Yesu. Kambe swa kola ni kola Yesu a nyamalala!

Hiloko vadondzrisiwa lavabidzri va suka hi ku kahlula va kongoma a Yerusalema ka yindlu leyi a vapostola a va tlhangane ka yone, va tlhasa va va byela hinkwaswu leswi humeleliki. Na va li ka yindlu leyo, Yesu a humelela a mahlweni ka hinkwavu. A ku sunguleni a vapostola a va kholwanga leswaku a a li Yesu. Kutani Yesu a va byela leswi: ‘Vonani mavoko yanga, ni khumbani mi swi vona leswaku hi mine. Ku tsraliwe leswaku Kriste a ta pfuxiwa ku feni.’