Janeru

Loko Yesu a vone mamana lweyi a a li ku dzrileni, a mu twele wusiwana. (Luk. 7:13) Yesu a nge gamela ka ku mu twela wusiwana ntsena wansati lwiyani kambe a swi kombise ni hi swiyentxo. A vulavule naye hi ndlela ya ku mu txhavelela a ku: “U nga dzrili.” Kutani a yentxe xa kukazri akuva a mu pfuna. A pfuxe n’wanake a va a mu “nyikela ka mamana” wakwe. (Luk. 7:14, 15) Hi nga dondzra yini ka hlolana ledzri Yesu a dzri yentxiki? Hi dondzra leswaku hi fanela ku kombisa ntwelawusiwana ka vhanu lava luzekeliwiki hi vazrandzriwa vavu. Ku fana na Yesu, hi nga va ni wuxiyaxiya ni ku kombisa ntwelawusiwana ka lava feliwiki. Hi nga ha hlaya kumbe ku yentxa ntxhumu wa kukazri lowu taka va pfuna kumbe ku va txhavelela. (Amapr. 17:17; 2 Kor. 1:3, 4; 1 Pet. 3:8) Mazritunyana matsrongo kumbe swiyentxo switsrongo swi nga ha va ni ntlhamuxelo lowukulu kwavu. Xihondzro Xa Ku Zrindzra 04/2023 pp. 5-6 §§ 13-15

Nambiloko a tive leswaku munghanu wake a a ha li ku fa, swi teke masiku mabidzri akuva Yesu a yendzra a ya Betaniya. Loko Yesu a tlhasa Betaniya, kutani a swi yentxa muni wa masiku na Lazaru a file. Kutani ha yini Yesu a teke nkama lowu hinkwawu? Hikusa handle ka ku pfuna munghanu wake, a a djula ku yentxa ntxhumu lowu a wu ta yisa lidzrumu ka Xikwembu Nkulukumba. (Yoh. 11:6, 11, 17) Dzrungula ledzri dzri tlhela dzri hi nyika dondzro ya lisima mayelanu ni wunghanu. Yanakanya hi leswi: Ndzrava leyi Marta na Mariya va yi zrumeliki ka Yesu, a yi nga li ya ku kombela leswaku a ya Betaniya kambe a va djula ku mu tivisa leswaku a munghanu wake awa vabya. (Yoh. 11:3) Handle ka leswo, Yesu a a tava a swi kotile ku pfuxa Lazaru na a li kule. Nambitanu, a hlawuli ku ya a Betaniya akuva a ta ya va ni vanghanu vake, Marta na Mariya. Xana u ni munghanu lweyi a fanaka na Yesu, lweyi a navelaka ku ku pfuna nambiloko u nga mu kombelanga? Nakunene munghanu yelweyo a ta ku pfuna ka xiyimu xin’wana ni xin’wana nambiloko u le ‘a makhombyeni’. (Amapr. 17:17) Ku fana na Yesu, na hine hi nga va vanghanu va matsrhamela lawa ka van’wana! Xihondzro Xa Ku Zrindzra 04/2023 p. 10 §§ 10-11

Loko hi le ka swiyimu swa ku kazrata hi nga ha yanakanya leswaku a misava leyimpshwa leyi Yehovha a yi dumbisiki a yi nga ti txhuka yi tlhasile. Xana leswo swi djula ku hlaya leswaku lipfumelo dzrezru dzri tsranile? Im-him a hi swone! Yanakanya hi xikombiso lexi landzrelaka: Hi nkama wa wuxika lani ku titimetaka ngopfu, hi nga ha tibyela leswaku a malanga a ma ti tlhasa, kambe ha swi tiva leswaku a swi nge yentxeki kuva malanga ma nga tlhasi. Hi ndlela leyi fanaka, loko hi hele ntamu, hi nga ha tibyela leswaku a misava leyimpshwa a yi nga ti za yi tlhasile. Kambe loko hi ni lipfumelo ledzri tiyiki hi ta tiyiseka leswaku a swidumbiso swa Xikwembu Nkulukumba swi ta hetiseka. (Amaps. 94:3, 14, 15; Heb. 6:17-19) Loko hi ni ku tiyiseka loko hi ta tama hi teka ku gandzrela Yehovha na ku li ntxhumu wa lisima a wuton’wini byezru. Swi djula hi tlhela hi va ni lipfimelo ledzri tiyiki akuva hi kota ku zrezra. Vanyingi va yanakanya leswaku “madzrungula lamenene” mayelanu ni misava leyimpshwa, ma xonge ngopfu lakakuva a ma nge vi ntiyiso. (Mat. 24:14; Ezek. 33:32) Kambe u nga pfumeleli ku kutxeteliwa hi mayakanyela ya vhanu lavo. Akuva hi tingawula mayanakayela lawo, swi djula hi tiyisa lipfumelo dzrezru. Xihondzro Xa Ku Zrindzra 04/2023 p. 27 §§ 6-7; p. 28 § 14

Xana u ke u ganaganeka leswaku Yehovha awa swi hlamula swikhongoto swaku? Loko u ke u titwa hi ndlela leyo a wu wuswaku. Vamakwezru vanyingi va hlaya leswaku va ke va va na kone ku ganaganeka koloko ngopfungopfu loko va kumane ni swikazratu. Loko hi kumana ni swikazratu swi nga ha hi kazratela ku xiya ndlela leyi Yehovha a hlamulaka ha yone swikhongoto swezru. Ha yini hi nga dumbaka leswaku Yehovha awa swi hlamula swikhongoto swa malandzra yake? A Bibele dzri hi tiyisekisa leswaku Yehovha awa hi zrandzra ni leswaku hi va lisima kwake. (Hag. 2:7; 1 Yoh. 4:10) Xileswo, a hi zramba kuva hi tsrhindzrekela kwake hi xikhongoto. (1 Pet. 5:6, 7) Yehovha a swi djula ngopfu ku hi pfuna ku va ni wuxaka bya le kusuhi na yene ni ku hi pfuna ku lavisana ni swikazratu swezru. A Bibeleni hi kuma wudzrunguli byinyingi lebyi vulavulaka hi ndlela leyi Yehovha a swi hlamuliki ha yone swikhongoto swa malandzra yake. Xana ku ni xikombiso xa kukazri lexi xi ku buyelaka a miyanakanywini? Xihondzro Xa Ku Zrindzra 05/2023 p. 8 §§ 1-4

Mariya a a ni wuxaka bya le kusuhi na Yehovha. A lipfumelo dzrake a dzri nga tiseketeli ka Yosefa. A a ma tiva ha hombe matsralwa. A a tlhela a tinyika nkama wa ku yanakanyisisa. (Luk. 2:19, 51) Handle ka ku ganaganeka, ku va Mariya a tikazratele ku va munghanu wa Yehovha swi mu pfune kuva nsati lwenene. Namunhla vavasati vanyingi va tikazratela ku yetisela Xikombiso xa Mariya. Hi xikombiso, Makwezru wa xisati lweyi a vitaniwaka Emiko a li: “Na ni nga si txhata, a ni tihambele xiyimiso xanga xa moya. Kambe ntsrhaku ka loko ni txhatile, a nuna wanga hi yene lweyi a a khongota ni ku hlela wugandzreli bya ndangu. Ni xiye leswaku a ni nga ha na xiyimiso xa moya. A ni yimela nuna wanga akuva a ni yentxela hinkwaswu kambe ni game ni vona leswaku lweyi a a fanela ku tiyisa wuxaka byanga na Yehovha a hi nuna wanga kambe hi mine hi ku kongoma. Kutani swoswi ni tinyika nkama wa kuva ni va kun’we na Yehovha hi ku khongota, ku dondzra Bibele ni ku tlhela ni yanakanyisisa hi leswi ni swi dondzraka.” (Gal. 6:5) Vavasati, tamani mi tiyisa wuxaka byenu na Yehovha hi ndlela leyo, vanuna venu va ta va ni swivangelo swa ku tama va mi kulungela ni ku tama va mi zrandzra.—Amapr. 31:30. Xihondzro Xa Ku Zrindzra 05/2023 p. 22 § 6

Hine a hi pswaliwanga na hi txhava Yehovha kambe swi djula hi dondzra ku yentxa leswo. Yin’we ya tindlela ta ku yentxa leswo i ku lavisisa ntumbuluku. Loko hi vona ‘mintxhumu leyi tumbuluxiwiki’ ha Yehovha kumbe ntumbuluku, hi xiya wutlhazri byake, ntamu wake ni lizrandzru ledzri a nga na dzrone ha hine. Kutani leswo swi kulisa ndlela leyi hi mu zrandzraka ni ku mu hlonipha ha yone. (Rom. 1:20) Yin’we ya tindlela ta ku kombisa leswaku ha mu txhava Yehovha i ku khongota kwake nkama ni nkama. Loko hi ya hi khongota ka Yehovha a ta ya a va wa xivizri kwezru. Loko hi khongota ka Yehovha hi kombela ntamu wa ku tiyisela, hi va na hi dzrimuka ndlela leyi a nga ni ntamu ha yone. Loko hi tlangela Yehovha hi kola ka xitizrulo xa N’wanake, hi dzrimuka ndlela leyi a hi zrandzraka ha yone nakone loko hi kumana ni xikazratu xa kukazri kutani hi khongota ka Yehovha hi kombela leswaku a hi pfuna ku huma ka xikazratu lexo, hi dzrimuka wutlhazri byake. Swikhongoto swa ku fana ni leswi swi yengesela ndlela leyi hi mu hloniphaka ha yone Yehovha, swi tlhela swi tiyisa ku tiyimisela kwezru ka ku va hi nga yentxi ntxhumu lowu wu nga honaka wuxaka byezru na Yehovha. Xihondzro Xa Ku Zrindzra 06/2023 p. 15 §§ 6-7

Ko va Yehovha ntsena lweyi a nga ni mfanelo ya ku bekela vhanu vake milawu nakone milawu leyo yi nabyalile. Hi xikombiso, a Huvo leyi Zrangelaka ya le dzaneni dzra ku sungula yi khanele hi mintxhumu yizrazru leyi vakriste va fanelaka ku yima va tiyile ka yone. 1) Kuva va ngagandzreli swifaniso kambe va gandzrela Yehovha ntsena, 2) ku hlonhipha ngati ni 3) ku yingeseta milawu ya Bibele mayelanu ni ku va hi nga tikhomi hi ndlela ya ku biha. (Mint. 15:28, 29.) Xana vakriste va nga yingeseta Yehovha ka mintxhumu leyizrazru leyi kongomiki hi ndlela yini? Hi kuva va gandzrela ni ku yingiseta Yehovha ntsena. Yene a lelete Vaisrayele leswaku va gandzrela yene ntsena. (Deut. 5:6-10) Loko Yesu a dzringiwa hi Sathana, a tekele ku swi beka livaleni leswaku hi fanela ku gandzrela Yehovha ntsena. (Mat. 4:8-10) Xileswo, a hi gandzreli swifaniso swa wukhongoti. Hine a hi gandzreli mhunu. Hi xikombiso, muzrangeli wa wukhongoti, wa politika, mutlangi wa swa ku tiyisa mizri lweyi a nga ni ndhuma kumbe mutxhayi. Hine hi gandzrela Yehovha a nga yene lweyi a “tumbuluxiki mintxhumu hinkwayu”.—Mpful. 4:11. Xihondzro Xa Ku Zrindzra 07/2023 pp. 14-15 §§ 3-4

Misava ya Sathana yi nghene hi nhloko ka ku tikhoma hi ndlela ya ku biha hi tlhelo dzra tinkuku ni pornografiya. (Efe. 4:19) Xileswo, hi fanela ku txhava Xikwembu Nkulukumba ni ku fambela kule ni mintxhumu ya ku biha. Ka Amaproverbia ndzrima 9, hi dondzra mayelanu ni vavasati vabidzri, wa ku tlhazriha ni wa ku phunta. Mun’wan ni mun’wana wavu a zramba lava pfumalaka wutlhazri kumbe ‘lwa pfumalaka vutivi’. Swo fana ni loko va ku: ‘Tanani, n’wi ta da swakuda swanga.’ (Amapr. 9:1, 4-6) A mabindzru ma nga ha va lama hambaniki hi ku ya hi xizrambu lexi mhunu a taka xi yamukela. A hi voneni xizrambu lexi a ‘wansati wa wuphukuphuku’ a xi hambaka. (Amapr. 9:13-18.) Ni tingana a nga natu ta ku zramba lava pfumalaka wutivi a ku: ‘Hambukelani halenu’ hi tikholisa. Kambe he wani mabindzru? ‘Vafi va kone.’ Hi biwa ndleve mayelanu ni wansati wa ‘ngwavavana’ ni wansati lweyi a ‘nyungumisaka’. Nakone hi tlhela hi biwa ndleve ka leswaku ‘a yindlu yakwe yi kazramele ku fa.’ (Amapr. 2:11-19) Ka buku dzra Amaproverbia 5:3-10 hi byeliwa swin’wana mayelana ni wansati wa ‘ngwavavana’ nakone dzri li ‘a milenge yakwe mi xikela a ku feni’. Xihondzro Xa Ku Zrindzra 06/2023 pp. 21-22 §§ 6-7

Vakulu va fanela ku beka xikombiso lexinene a mhakeni ya ku yanakanyela. (1 Tim. 3:2, 3) Hi xikombiso, nkulu wa kukazri a nga fanelanga ku yimela leswaku mavonela yake ma va wone nkama ni nkama ma yamukeliwaka hi leswi yene a nga nkulu hi ntanga ka vakulu van’wana. Awa swi tiva leswaku a moya wa Yehovha wu nga pfuna nkulu mun’wana ni mun’wana akuva a nyikela mavonela lawa ma taka pfuna kuva ku tekiwa xiboho lexinene. Loko vakulu vanyingi va pfumelelani ni xiboho xa kukazri lexi kalaka xi nga lwisani ni minsinya ya milawu ya Bibele, a nkulu lweyi a yanakanyelaka awa xi seketela xiboho lexo nambi loko xi nga fambisani ni ku zrandzra kwake. Vakriste lava yanakanyelanaka va yamukela matovoko manyingi. Hi xikombiso, hi ni wunghanu lebyi tiyiki ni vamakwezru nakone leswo swi tisa ku zrula a bandleni. Hi ni ku nyonxa ni mukhandlu wa ku tiva vhanu va ku siyanasiyana ni wumhunu lebyi hambaniki. Nakone swa hlamalisa ku tiva leswaku nambi leswi ku nga ni ku hamba loku hinkwaku, hinkwezru hi gandzrela Yehovha hi wumun’we. A xa lisima ku tlula hinkwaswu i ku nyonxa loku hi nga na kone hi ku tiva leswaku hi yetisela Yehovha lweyi minkama hinkwayu a yanakanyelanaka ni ku nabyala. Xihondzro Xa Ku Zrindzra 07/2023 p. 25 §§ 16-17

Daniyele a a dondzra wuprofeta hi nkongometo lowunene, akuva a tiva ntiyiso. Nakone Daniyele a a titsrongohata, a a swi tiva leswaku Yehovha a a to mu pfuna ku twisisa wuprofeta ntsena loko a tama a tsrhindzrekela kusuhi na yene ni kuva a mu yingiseta. (Dan. 2:27, 28) Handle ka leswo, Daniyele a kombise leswaku awa titsrongohata hikusa a a dumba mpfunu wa Yehovha. (Dan. 2:18) Tlhantakubidzri, Daniyele a a dondzra ha hombe. A a kambisisa swiyenge swa Bibele leswi a swi li kone a nkameni wake. (Yer. 25:11, 12; Dan. 9:2) Xana hi nga mu yetisela hi ndlela yini Daniyele? Dondzra hi nkongometo lowunene. Xana u dondzra wuprofeta bya Bibele hi kuva u djula ku tiva ntiyiso? Loko nhlamulo a li ina, Yehovha a ta ku pfuna. (Yoh. 4:23, 24; 14:16, 17) Van’we va dondzra Bibele hi nkongometo wa ku kuma xa kukazri akuva va kholwisa vambeni leswaku a dzri huhuteliwanga hi Xikwembu Nkulukumba. Xileswo, va ti vona na va ni mfanelo ya ku timbekela milawu mayelanu ni leswi swi lulamiki kumbe leswi bihiki va va va hanya hi milawu yoleyo. Kutani, hi fanela ku dondzra Bibele hi nkongometo lowunene. Xihondzro Xa Ku Zrindzra 08/2023 p. 9 §§ 7-8

Ku tidzringanisa ni vambeni swi nga hi heta ntamu. (Gal. 6:4) Loko hi zrandzra ku tidzringanisa ni vambeni hi nga ha sungula ku va ni matsroho ni ku phikisana ni van’wana. (Gal. 5:26) Loko hi yentxa leswo, a swi nge ti hi fambela ha hombe nakone ‘a ku lavisela loku hlwelaka ku vavisa mbilu’. Yanakanya ndlela leyi swi hetanaka ntamu ha yone ku tsrhamela ku lavisela ntxhumu lowu hi tivaka leswaku a hi nge txhuki hi wu tlhaselela! (Amapr. 13:12) Loko hi yentxa leswo, hi nga ha hela ntamu nakone hi nga ha tsrhika ku tsrutsruma ka mpalisanu wa wutomi. U nga yimeli ku yentxa mintxhumu leyi tlulaka leyi Yehovha a yi yimeliki kwaku. Yehovha a nga yimele leswaku u mu nyika leswi u ngeke naswu. (2 Kor. 8:12) Nakone dzrimuka leswaku Yehovha a nga tsrhameli ku dzringanisa leswi u swi yentxaka ni leswi van’wana va swi yentxaka. (Mat. 25:20-23) Yene a wu nyika lisima ntizro lowu u mu yentxelaka wone na swi sukela a mbilwini, lipfumelo dzraku ni ku tiyisela kwaku. Xihondzro Xa Ku Zrindzra 08/2023 p. 29 §§ 10-11

Yehovha a hlamule xikombelo xa Samisoni nakone a mu hambele nhlovo ya mati hi hlolana. Ntsrhaku ka loko Samisoni a nwe mati ‘a hika dzrake dzri tlhela dzri buya, a tlhatlhamuka’. (Abaṭ. 15:19) Swi tikomba na xihlovo lexi a xa ha li kone hi nkama lowu muprofeta Samuwele a huhuteliwiki ku tsrala buku dzra Abaṭemi. Loko Vaisrayele va lavisa xihlovo lexiyani xa mati, minkama hinkwayu a va ta dzrimuka leswaku loko va dumba Yehovha a a ta va pfuna akuva va hlula xikazratu xin’wana ni xin’wana. Na hine hi fanela ku djuletela mpfunu wa Yehovha swi nge na mhaka wutlhazri, wuswikoti lebyi hi nga ha vaka hi li na byone kumbe leswi kutani hi swi yentxhiki a ntizrweni wa Yehovha. Swo djula hi titsrongahata ni ku pfumela leswaku hi to kota ku yentxa leswi Yehovha a hi kombelaka swone loko hi mu dumba. Swanga hi leswi Samisoni a tlheliki a kuma ntamu ntsraku ka loko a nwe mati lawa Yehovha a mu nyikiki wone, na hine hi nga kuma ntamu hi tlhelo dzra moya loko hi londzrovota malulamiselo hinkwawu ya moya lawa Yehovha a hi yentxelaka wone.—Mat. 11:28. Xihondzro Xa Ku Zrindzra 09/2023 p. 4 §§ 8-10

Xana hi nga yentxa yini loko mhunu a khanela ku biha hi Yehovha kun’we ni Bibele? Hi fanela ku khongota ka Yehovha hi kombela moya wake ni wutlhazri akuva hi hlamula hi ndlela ya ku zrula. Kambe xana hi nga yentxa yini loko hi xiya leswaku a hi yangulanga hi ndlela leyi nga yone? Hi nga tlhela hi khongota ni ku yanakanyisisa hi leswi hi nga swi yentxaka ka khambi ledzri landzrelaka. Loko hi yentxa leswo, Yehovha a ta hi nyika moya wake wa ku xwenga a tlhela a hi pfuna ku tikhoma ni ku va lava zruliki. Tindzrimana tinyingi ta le Bibeleni ti nga hi pfuna ku khanela hi ndlela ya ku zrula ka swiyimu swa ku kazrata. Moya wa ku xwenga wu nga hi pfuna ku dzrimuka tindzrimana leto. (Yoh. 14:26) Hi xikombiso, minsinya ya milawu leyi kumekaka ka buku dzra Amaproverbia yi nga hi pfuna ku tama hi zrula. (Amapr. 15:18.) Buku ledzri dzri tlhela dzri hi pfuna ku vona leswaku ha yini swi li swa lisima ku va lavazruliki ka swiyimu swa ku kazrata.—Amapr. 10:19; 17:27; 21:23; 25:15. Xihondzro Xa Ku Zrindzra 09/2023 p. 15 §§ 6-7

Mupostola Petro a a swi tiva leswaku ku nge khale a a ta fa. Nkama hinkwawu lowu va wu hetiki a ntizrweni wake hi ku dumbeka, a ve na Yesu Kriste ka ntizro wa ku zrezra, a sungule ku zrezra ka mimbangu ya ku siyanasiyana nakone a tizre swanga xizro xa huvo leyi zrangelaka. Kambe ntizro ka Petro a wu nge si hela. Kolomu ka 62 ku ya ka 64 N.Y., a huhuteliwe ku tsrala mapapela mabidzri ku nga buku dzra 1 Petro ni 2 Petro. (2 Pet. 1:13-15) Nkama lowu Petro a huhuteliwiki ku tsrala mapapela lawa, vamakwezru a va kumana ni “swikazratu swa ku siyanasiyana”. (1 Pet. 1:6) Vavanuna lava a va ni makungu ya ku biha a va zama tindlela ta ku ntxhimisa bandla hi tindondzro ta madzrimi ni mahanyela lama kalaka ma nga yamukeleki a bandleni. (2 Pet. 2:1, 2, 14) Vakriste lava a va tsrhama Yerusalema a va li kusuhi ni “wugamu bya mintxhumu hinkwayu”, leswi liki, Varoma a va ta hlasela doropa dzra Yerusalema ni ku helisa mfumu wa Xiyuda wa nkama luwani. (1 Pet. 4:7) Handle ka ku ganaganeka, mapapela mabidzri lawa Petro a ma tsraliki ma pfune vakriste ku tiva leswi a va fanela ku swi yentxa akuva va lulamela swikazratu leswi a swa ha ta. Xihondzro Xa Ku Zrindzra 09/2023 p. 26 §§ 1-2

Ku fana na Yesu, hakanyingi hi dondzra ku yingiseta loko hi kumana ni swiyimu swa ku kazrata. Hi xikombiso, a ku sunguleni ka ntungu wa COVID-19, hi nyikiwe nkongomiso wa leswaku hi fanela ku yima ku tlhangana ka Tiyindlu Ta Wugandzreli ni ku famba hi zrezra hi muti ni muti. Xana swi ku kazratelile ku landzra nkongomiso lowo? Nambiloko swi ku kazratelile, u yingisetile nakone ku yingiseta koloko ku sizrelele wutomi byaku, swi yentxe leswaku bandla dzri va ni wumun’we nakone u nyonxise Yehovha. Swoswi, hinkwezru hi lulamele ku yamukela minkongomiso leyi hi taka nyikiwa yone hi nkama wa nhlomulu lowukulu. Nakone ku yingiseta koloko hi kone ku taka huluxa wutomi byezru! (Yb. 36:11) Hi yingiseta Yehovha hikusa ha mu zrandzra nakone hi djula ku mu nyonxisa. (1 Yoh. 5:3) A hi nge swi koti ku hakela mintxhumu hinkwayu leyinene leyi Yehovha a hi yentxeliki yone. (Amaps. 116:12) Kambe hi nga swi kota ku yingiseta Yehovha kun’we ni lava hi zrangelaka. Loko hi yentxa leswo, hi ta va na hi kombisa leswaku hi tlhazrihile. Nakone mhunu lweyi a tlhazrihiki a nyonxisa mbilu ya Yehovha.—Amapr. 27:11. Xihondzro Xa Ku Zrindzra 10/2023 p. 11 §§ 18-19

Loko a o va ni tovoko dzra ku khanela ni ntsrumi, xana a u ta swi yingela leswi a yi ta ku byela swone? Namunhla, a ntsrumi yi khanela ni vhanu va “matiko hinkwawu, tinxaka hinkwatu, tindzrimi hinkwatu, ni tinhlonge hinkwatu”. Yi li yini? Yi li: “Txhavani Xikwembu Nkulukumba mi mu dzrumisa, . . . gandzrelani Lweyi a hambiki matilo ni misava.” (Mpful. 14:6, 7) Yehovha i Xikwembu Nkulukumba mun’we wa ntiyiso lweyi vhanu hinkwavu va fanelaka ku mu gandzrela. Hine hi mu tlangela ngopfu hi kuva a hi nyike tovoko dzra ku mu gandzrela a tempeleni dzrake dzra moya! Xana i yini tempele dzra moya hi ntshimantshima nakone hi nga byi kuma kwini wutsrhokotsrhoko mayelanu ni tempele ledzri? Tempele dzra moya a hi muyaku wa kukazri. Kambe swi patsra hinkwaswu leswi Yehovha a hi yentxeliki swone, leswi seketeliwiki ka gandzrelo dzra xitizrulo xa Yesu, akuva vhanu va kota ku mu gandzrela. Mupostola Pawulo a swi tlhamuxele ha hombe leswo ka papela ledzri a dzri tsraleliki vakriste va Vaheberu lava a va tsrhama Yudeya. Xihondzro Xa Ku Zrindzra 10/2023 p. 24 §§ 1-2

Hi 522 N.N.Y., a valala va Vayuda va swi kotile ku yimisa ntizro wa ku pfuxeta Tempele dzra Yehovha. Kambe Zakariya a va tiyisekise leswaku Yehovha a a ta tizrisa moya wake wa ku xwenga akuva a va susela swikazratu leswo. Hi 520 N.N.Y., hosi Dariyosi a pfumelele Vayuda kuva va tama va yaka Tempele a tlhela a va nyika mali ni vhanu akuva va va pfuna. (Ezr. 6:1, 6-10) Yehovha a dumbise vhanu vake leswaku a a ta va pfuna loko va zrangisa ntizro wa ku yaka tempele. (Hag. 1:8, 13, 14; Zek. 1:3, 16) Hi ku pfuniwa hi vaprofeta, a Vayuda va tlhele va sungulisa ku pfuxeta Tempele hi 520 N.N.Y., nakone va hete ku yaka na ku nga si na hela ntlhanu wa malembe. Leswi Vayuda va zrangisiki ku zrandzra ka Xikwembu Nkulukumba nambiloko va kumana ni swikazratu, Yehovha a va seketelile. Xileswo va gandzrele Yehovha na va nyonxile.— Ezr. 6:14-16, 22. Xihondzro Xa Ku Zrindzra 11/2023 p. 15 §§ 6-7

Vhanu vanyingi va same va swi twa ku khaneliwa hi Abrahamu, kambe a va tivi swinyingi ha yene. Kambe hine hi tiva swinyingi mayelanu na yane. Hi xikombiso, ha swi tiva leswaku Abrahamu a vitaniwe “papayi wa hinkwavu lava nga ni lipfumelo”. (Rom. 4:11) Swi nga ha yentxeka u tivutisa leswi: ‘Xana ni nga swi kota ku va ni lipfumelo ledzri tiyiki ku fana na Abrahamu?’ Ina, swa koteka. Yin’we ya tindlela ta kuva hi va ni lipfumelo dzra ku fana ni dzra Abrahamu i kuva hi dondzra hi xikombiso lexi a hi siyeliki xone. Ntsrhaku ka loko a yamukele xileleto xa Xikwembu Nkulukumba, Abrahamu a zruzre ka mbangu lowu a a tsrhama ka wone a ya tsrhama ka mbangu wa le kule nakone a hanye ka matende ku dzringana malembe manyingi. Nakone, a a tiyimisele ku nyikela n’wanake lweyi a zrandzrekaka Izaki swanga gandzrelo. Hinkwaswu leswo, swi kombise leswaku Abrahamu a a ni lipfumelo. Lipfumelo ledzro, ledzri a dzri kombisiki hi mintizro, dzri yentxe leswaku Xikwembu Nkulukumba a mu yamukela swanga munghanu wake. (Yak. 2:22, 23.) Yehovha a djula leswaku hinkwezru hi va vanghanu vake. Xileswo, a huhutele Pawulo na Yakobe leswaku va tsrala xikombiso xa Abrahamu a Bibeleni. Xihondzro Xa Ku Zrindzra 12/2023 p. 2 §§ 1-2

Vamakwezru va xisati, dondzrani ku vulavula ha hombe. I swa lisima akuva mukriste a tiva ku vulavula ha hombe ni van’wana. A mhakeni leyi, mudondzrisiwa Yakobo a hi nyike xitsratsriyu xa lisima, hi ku hlaya mazritu ya tsralwa dzra namunhla. Loko u va yingiseta ha hombe van’wana loko va vulavula, u kombisa leswaku wa va twela van’wana. (1 Pet. 3:8) Loko u nga tiyiseki leswaku u swi twisisile leswi munhu mun’wana a swi hlayaka kumbe ndlela leyi a titwaka ha yone, hamba swivutiso leswi fanelekaka. U gama u tinyika nkama wa ku yanakanyisisa na u nga si khanela. (Amapr. 15:28) Tivutise leswi: ‘Leswi ni taka swi hlaya i ntiyiso nakone swi ta mu tiyisa? Swi ta kombisa wunene ni leswaku na mu hlonipha?’ Dondzra ka vamakwezru va xisati lava wupfiki lava yingisetaka va tlhela va khanela hi ndlela leyinene. (Amapr. 31:26.) Xiyisisa ndlela leyi va vulavulaka ha yone. Ku vulavula ha hombe ni vhanu van’wana swi ta ku pfuna ku va ni vanghanu lavanene ni ku va ni kuzrula ni vhanu van’wana. Xihondzro Xa Ku Zrindzra 12/2023 p. 21 § 12

Namunhla, Yehovha a nga ha tizrisa maxaka, vanghanu kumbe vakulu va bandla akuva va hi tiyisa. Nambitanu, loko hi lavisana ni swiyimu swa ku kazrata, hi zrandzra ku tsrhama wuswezru nambi ku khanela ni mhunu a hi swi nyonxeli. Matitwela lawa i ya ntumbuluku. Hi nga wu yamukelisa kuyini mpfunu wa Yehovha? Zama ku tipatsra ni vambeni, u nga tsrhami wuswaku. Loko hi tsrhama wuswezru, hi nga ha sungula ku yanakanya hi swikazratu leswi hi kumanaka na swone, nakone ku tsrhamela ku yanakanya hi leswo swi nga ha yentxa leswaku hi teka swiboho leswi hoxiki. I ntiyiso leswaku hinkwezru ku ni nkama lowu hi djulaka ku tsrhama wuswezru ngopfungopfu loko hi li ka xiyimu xa ku kazrata. Nambitasu, loko hi tolovela ku tsrhama wuswezru hi ta kumeka kule ni vhanu, vhanu lava Yehovha a va tizrisaka leswaku va hi seketela. Kutani pfumela ku pfuniwa hi maxaka yaku, vanghanu vaku ni vakulu va bandla. Va vone na va li ndlela leyi Yehovha a yi tizrisaka leswaku a ku pfuna.—Amapr. 17:17; Eza. 32:1, 2. Xihondzro Xa Ku Zrindzra 01/2024 p. 24 §§ 12-13

Vanaziri va dumbise kuva va nga tsremeti misisi. Leyo a ku li ndlela ya ku kombisa leswaku va tibeka hansi ka Yehovha. Kambe lexi vavisaka hi leswaku, ku ve ni nkama ka matimu ya Israyele lani Vanaziri va kalaka va nga hloniphiwanga ni ku seketeliwa. Minkama yin’wana, swi nga yentxeka swi djule xixixi akuva Munaziri a hetisisa xidumbiso xake a tlhela a va lweyi a hambaniki. (Amo. 2:12) Hi ku va hi hlawula ku yingiseta Yehovha, vhanu van’wana va swi xiya leswaku hi hambanile na vone. Swi djula xixixi akuva hi byela vhanu a xikole ni le ntizrweni leswaku hi Timboni ta Yehovha. Nkama lowu a swiyimu ni swiyentxo swa vhanu va misava leyi swi yaka swi pfisa, swi ta ya swi hi kazratela ku hanya hi minsinya ya milawu ya Bibele ni ku byela van’wana madzrungula lamanene. (2 Tim. 1:8; 3:13) Minkama hinkwayu dzrimuka leswaku hi ‘tsrhavisa mbilu [ya Yehovha]’ loko hi xixixi hi va lava hambaniki ni vhanu lava kalaka va nga mu tizreli.—Amapr. 27:11; Mal. 3:18. Xihondzro Xa Ku Zrindzra 02/2024 p. 16 § 7; p. 17 § 9

Vona ndlela leyi vamakwezru va bandla dzra le Roma a va hambane ha yone. A makazri kwavu a ku ni Vayuda lava a va kule hi Nawu wa Moxe kambe hi tlhelo dzrin’wana a ku ni vamatiko lava a va kulisiwe hi ndlela leyi hambaniki ngopfu swinene. Vakriste van’wana a va li swikazrawa kasi van’wana a va li lava ntsrhunxekiki. Swi nga yentxeka van’wana a va li vinyi va swikazrawa. Kambe xana vakriste va swi kotise kuyini ku hlula ku hambana loku ni ku tama va tiyisa lizrandzru ledzri a va li na dzrone? Mupostola Pawulo a kutxe vakriste leswaku va ‘yamukelananani.’ Xana a a djula ku hlaya yini hi mazritu lawa? A zritu dzra Xigrika ledzri ndzruluteliwiki dzri va “yamukelananani” dzri tlhamuxela ku yamukela mhunu kumbe ku kombisa malwandla, ku nga ha va loko u yendzrela mhunu a kaya kwake kumbe ku pfumela leswaku mhunu wa kukazri a va munghanu waku. Hi xikombiso, Pawulo a byele Filemon leswaku a a fanela ku ‘mu yamukela hi ndlela leyinene’ Onezimu, lweyi a a li xikazrawa xake lexi xi mu balekiki. (Film. 17) Kasi Akila na Prisila va yamukele Apolosi lweyi a a ni wutivi byitsrongo mayelanu ni wukriste nakone ‘va mu teke va famba na yene’. (Mint. 18:26) A matsrhan’wini ya ku pfumelela leswaku ku hambana kwavu ku va tsravukanisa, vakriste lavayani va swi kotile ku hlula ku hambana koloko va va va yamukelanana. Xihondzro Xa Ku Zrindzra 07/2023 p. 6 § 13

Xivangelo lexikulu lexi hi yentxaka hi tinyiketela ka Yehovha hi leswaku ha mu zrandzra. A lizrandzru ledzro a hi matitwela ya nkamanyana. Kambe dzri tiseketele ka “wutivi bya ntiyiso” ni “wutlhazri hinkwabyu kun’we ni ku twisisa ka moya”, leswi liki mintxhumu hinkwayu leyi u yi dondzriki ha Yehovha ni ku zrandzra kwake leswi yentxiki leswaku lizrandzru dzraku ha yene dzri kula. (Kol. 1:9) Xidondzro xaku xa Bibele xi ku yentxe u tiyiseka leswaku 1) Yehovha i mhunu wa hakakunene, 2) Bibele i Zritu dzra Yehovha ledzri huhuteliwiki, ni 3) leswaku a tizrisa nhlengeletanu yake akuva a hetisisa ku zrandzra kwake. Lava tinyiketelaka ka Yehovha va ni wutivi bya Xikwembu Nkulukumba nakone va hanya hi ku pfumelelana ni milawu ya Yehovha. Va tikazratela ku byela van’wana leswi va swi dondzraka a Bibeleni. (Mat. 28:19, 20) Lizrandzru dzravu ha Yehovha dzri ye dzri kula, nakone va djula ku gandzrela Yehovha hi mbilu yavu hinkwayu. Xana u titwa hi ndlela leyo? Xihondzro Xa Ku Zrindzra 03/2024 pp. 4-5 §§ 6-8

Abigayili a a txhate na Nabali nakone Bibele dzri hlaya leswaku yene a a li wanuna wa ku nonon’hwa nakone a nga ni mona. (1 Sam. 25:3) Swi nga yentxeka swi mu kazratelile Abigayili ku hanya ni wanuna wa ku tsrhamisa xileswo. Xana Abigayili a djuletele tindlela ta ku hambana na Nabali? A ve ni mukhandlu wa ku yentxa leswo loko Davhida, lweyi a a ta va hosi ya Israyele, a djule ku dlaya Nabali lweyi a mu zruketeliki. (1 Sam. 25:9-13) Abigayili a a ta va a tsrutsrumile a tsrhika Davhida a dlaya Nabali. A matsrhan’wini ya leswo, a sivele kuva Davhida a dlaya Nabali. (1 Sam. 25:23-27) I yini lexi mu susumeteliki ku yentxa leswo? Abigayili a a mu zrandzra Yehovha nakone a a dzri hlonipha lulamiselo dzra mutxhatu ledzri simekiwiki hi Yehovha. Yene a a swi tiva leswaku ka Yehovha a mutxhatu wu xwengile, xileswo a a djula ku nyonxisa Yehovha. Swi nga yentxeka ku ve leswo swi mu susumeteliki ku yentxa hinkwaswu akuva a huluxa nuna wake ku patsra ni lava a a tsrhama na vone. Hi ku kahlula a ye sivela kuva Davhida a nga dlayi Nabali. Xihondzro Xa Ku Zrindzra 03/2024 pp. 16-17 §§ 9-10

Xana ku ni vhanu va kukazri a bandleni dzraku lava tikazratelaka ku hanya hi mintxhumu yitsrongo akuva va yentxa leswi yengetelekiki a ntizrweni wa Yehovha? Xana u tiva vampshwa va kukazri lava tikazratelaka ku va lava hambaniki ni vhanu van’wana a xikole nambiloko swi kazrata ku yentxa leswo? Xana u tiva mhunu wa kukazri lweyi a dondzraka Bibele kumbe makwezru lweyi a tamaka a dumbeka nambiloko a kanetiwa hi maxaka? Tiyimiseli ku yentxa hinkwaswu leswi u nga swi kotaka akuva u va tiyisa ni ku va tlangela hi xixixi lexi va xi kombisaka ni hi ntizro lowu va wu yentxelaka Yehovha. (Film. 4, 5, 7). Yehovha awa tiyiseka leswaku hi swi djula hi mbilu hinkwayu ku mu nyonxisa ni leswaku hi tiyimisele ku tikazratela ku hanya hi ku pfumelelana ni xidumbiso xezru. A hi nyika lisima hi ku hi pfulela mukhandlu wa ku hlawula ku mu komba leswaku ha mu zrandzra. (Amapr. 23:15, 16) A hi tiyimiseleni ku tama hi tizrela Yehovha, hi mu yentxela hinkwaswu leswi hi nga swi kotaka hi mbilu ya ku swi zrandzra. Xihondzro Xa Ku Zrindzra 02/2024 p. 18 § 14; p. 19 § 16

Zama ku yanakanya hi mhaka leyi: Hi le ndzreni ka lembe dzra 29 N.Y., hi loko Yesu a sungula ntizro wake a misaveni. Yesu ni mamana wake, Mariya, va zrambiwe ka nkhuvu wa mutxhatu ka doropa dzra Kana. Mariya a li ku pfuniseni ka ku bekisa vazambiwa. Loko nkhuvu wu ya wu famba, ku hela vhinyu, ku nga xiyimu lexi a xi ta yentxa va ndangu kun’we ni vatekani va khomiseka tingana. Kutani hi ku kahlula Mariya a ya ka Yesu kutani a mu byela leswi: “A va ha na vhinyu.” (Yoh. 2:1-3) Kutani Yesu a yentxe yini? A ndzrulute mati ma va “vhinyu ledzrinene” hi ndlela ya hlolana. (Yoh. 2:9, 10) Ledzri ku ve hlolana dzra ku sungula ka mahlolana manyingi lawa Yesu a ma yentxiki loko a li lani misaveni. A yentxe mahlolna manyingi ni ku pfuna vhanu vanyingi. Hi xikombiso, khambi dzrin’wana Yesu a phamele 5.000 wa vavanuna hi ku tizrisa hlolana. Ntsrhaku, ka xiyentxakalu xin’wana a phamele 4.000 wa vavanuna hi hlolana, lani loko hi patsra nhlayu hinkwayu ya vavanuna, vavasati ni vana yi nga dzringanaka kolomu ka 27.000 wa vhanu. (Mat. 14:15-21; 15:32-38) Ka swiyentxakalu leswo ha swibidzri, Yesu a tlhele a daha vhanu vanyingi lava a va vabya.—Mat. 14:14; 15:30, 31. Xihondzro Xa Ku Zrindzra 04/2023 p. 2 §§ 1-2

Loko hi humeleliwa hi swa ku kazrata, hi nga ha titwa na hi hele ntamu hi tlhelo dzra nyana ni dzra matitwela ku dzringana masiku ya kukazri. Ku fana na Eliya, swi nga ha hi kazratela ku sekeleka, ho djula ku yetlela ntsena. (1 Tih. 19:5-7) Hi nga ha djula mpfunu wa Yehovha akuva hi tama hi mu tizrela hi khinkhi. Ka swiyimu leswo, Yehovha a hi dumbisaka leswaku a ta hi pfuna hi ku ya hi tsralwa dzra namunhla. Hosi Davidha a wu vonile mpfunu lowo. Loko a lwisana ni swikazratu ni valala, yene a mu byele leswi Yehovha: ‘A voko dzraku dzra xinene dzri ndzri tiyisile.’ (Amaps. 18:35) Hakanyingi Yehovha a tizrisa vhanu van’wana akuva va hi pfuna. Hi xikombiso, loko Davhida a titwa na a hele ntamu, kuve munghanu wake Yonathani lweyi a mu yendzreliki akuva a mu txhavelela ni ku mu tiyisa. (1 Sam. 23:16, 17) Hi ndlela leyi fanaka, Yehovha a tizrise Elixa akuva a pfuna Eliya.—1 Tih. 19:16, 21; 2 Tih. 2:2. Xihondzro Xa Ku Zrindzra 01/2024 pp. 23-24 §§ 10-12

Yehovha a ni malwandla nakone a hanana ngopfu. Matsrhamalea lawa ma kombisa ‘wutlhazri’ bya ntiyiso lebyi byi yimelaka wansati lweyi ku khaneliwaka ha yene ka Amaproverbia ndzrima 9. A wundzrunguli byi kombisa leswaku wansati lweyi wa ku fanekisela a lulamisele nyama, a patsrinyeta wuvhinya ni ku lulamisela tafula a ndlwini kwake. (Amapr. 9:2) Handle ka leswo, hi ku ya hi tindzrimana 4 na 5: ‘[A yimela wutlazri] ku lava pfumalaka ku yanakanya, a li : Tanani, n’wi da swakuda swanga.’ Ha yini hi fanela ku ya a ndlwini ya wutlhazri ni ku da swakuda leswi wansati lweyi a swi nyikelaka? Yehovha a djula leswaku a vanake va va ni wutlhazri ni ku sizrelelaka. A nga djuli hi dondzra hi ndlela ya ku vavisa, leswi liki a hi nga ti tsrhamela ku tisola kumbe ku hlatiyela hi swidoho swezru. Hi leswo swi yentxaka Yehovha ‘a bekisela lava ku lulama ku kateka’. (Amapr. 2:7) Loko hi mu zrandzra Yehohva hi ta yentxa hinkwaswu akuva hi mu nyonxisa. Hi ta yingiseta swilayu swa wutlhazri hi tlhela hi nyonxa hi ku swi tizrisa a wuton’wini byezru.—Yak. 1:25. Xihondzro Xa Ku Zrindzra 06/2023 p. 23 §§ 14-15

Nambiloko hi nga koti ku yentxa hinkwaswu a ntizrweni wa Yehovha, hi nga tiyiseka leswaku Yehovha a yi nyika lisima mintizro hinkwayu leyi hi yi yentxaka akuva hi mu nyonxisa. Hi swi tivisa kuyini leswo? A masikwini ya Zakariya, Yehovha a byele muprofeta wake leswaku a hamba ngiyana hi woru ni prata leswi zrumeliwiki hi Vayuda lava a va li Babilona. (Zek. 6:11) A “ngiyana” leyi a yi tava xidzrimuxo xa swihananu swavu swa ku tizrandzrela. (Zek. 6:14) Hi nga tiyiseka leswaku Yehovha a nge te yi dzrivala minzamu yezru ya ku mu tizrela nambiloko hi kumana ni swikazratu. Handle ka ku ganaganeka ha ha ta tama hi kumana ni swikazratu a masikwini lawa ya wugamu, nakone xiyimu xa ha ta tama xi bindzra. (2 Tim. 3:1, 13) Kambe, a swi djuli hi kazrateka ku tlula mpimu. Dzrimuka mazritu lawa Yehovha a ma byeliki vhanu vake a masikwini ya Hagayi, lama liki: ‘Hikusa ndzri na n’wine . . . n’wi nga txhaveni.’ (Hag. 2:4, 5) Na hine hi nga tiyiseka leswaku Yehovha a ta va na hine nkama lowu hi yentxaka hinkwaswu leswi hi nga swi kotaka akuva hi yentxa ku zrandzra kwake. Xihondzro Xa Ku Zrindzra 11/2023 p. 19 §§ 20-21

Loko Yehovha a e swi djula inhaka a nga pfumelelanga leswaku swihoxo swa mupostola Petro swi tsraliwa a Bibeleni. Kambe swi tsraliwile a Bibeleni, ha yini? Hi nkongometo wa ku hi dondzrisa swa kukazri. (2 Tim. 3:16, 17) Ku dondzra hi wanuna lweyi, lweyi a a ni ku tsrana kun’we ni matitwela ya ku fana ni yezru, swi ta hi pfuna ku twisisa leswaku Yehovha a nga yimelanga kuva hi yentxa mintxhumu hi ndlela ya ku hetiseka. Lexi Yehovha a xi djulaka i ku va hi nga kazrali, kambe hi tama hi tikazrata nambiloko hi va ni ku tsrana ka kukazri. Ha yini swi vileleka ku va hi tiyisela? Hikusa nambiloko kutani hi hlule ku tsrana ka kukazri, swi nga yentxeka hi ku famba ka nkama hi tlhela hi wela ka ku tsrana koloko. Nambitanu, a hi heli ntamu kambe hi tama hi tikazrata akuva hi yampswisa. Hinkwezru hi txhuka hi hlaya kumbe ku yentxa ntxhumu wa kukazri lowu hi ku famba ka nkama hi gamaka hi tisola. Kambe a xa lisima i ku va hi nga kazrali hikusa Yehovha a to hi pfuna kuva hi yampswisa ntsena loko hi nga kazrali. (1 Pet. 5:10) A ntwela wusiwana lowu Yesu a wu kombisiki ka Petro nambileswi a yentxiki swihoxo wu nga hi pfuna ku tama hi tizrela Yehovha. Xihondzro Xa Ku Zrindzra 09/2023 pp. 20-21 §§ 2-3

I ntiyiso leswaku Yesu a a tava a mu dahile Lazaru, kambe a a djula ku yentxa ntxhumu wa ku hlamalisa ngopfu swinene. A dumbise a ku: “Makwenu a ta pfuka.” A tlhele a ku: “Hi mine ku pfuka ni wutomi.” (Yoh. 11: 23, 25) Ina, Yesu a a yamukele ntamu ka Xikwembu Nkulukumba wa ku pfuxa lava fiki. A pfuxe xin’hwanyatana xa kukazri lexi a xa ha ku fa, a tlhela a pfuxa ni xidjahatana lexi swi nga ha yentxekaka xi pfuxiwe hi siku ledzri xi fiki ha dzrone. (Luk. 7:11-15; 8:49-55) Kambe swi li yini ha Lazaru, lweyi kutani a ku khaluta mune wa masiku na a file nakone ntsrumbu wake a wu sungule ku bola? Xana Yesu a a ta swi kota ku mu pfuxa? Tiyanakanyi na u li kohala u hlalela leswi yentxekaka. Mariya na Marta va kumana na Yesu. Mariya a phindha leswi Marta a swi hlayiki, a ku: “Hosi, loko a wu li kone lani, makwezru inaka a nga fanga.” (Yoh. 11:32) Loko a vone ni ku twa Mariya ni van’wana na va dzrila, Yesu a khumbekile, hi ku twelavanghanu vake na yene a sungula ku dzrila. A a ku tiva ha hombe ku vavisa loku mhunu a ku twaka loko a luzekeliwa hi lweyi a mu zrandzra. Nakunene, a a hlunyela ku helisa ku vaviseka loku a va ku twa! Xihondzro Xa Ku Zrindzra 04/2023 pp. 10-11 §§ 12-13