Loko U Feliwa Hi Muzrandzriwa Waku

“Ni hohloke mazrambu loko makwezru lwenkulu a file swa kola ni kola. Ka tihweti leti landzreliki a ni pfa ni mu dzrimuka nakone a ni twa ku vavisa, ingi no tlhaviwa hi mukwana a mbilwini. Minkama yimbeni a ni hlundzruka, ni tivutisa leswi: ‘Ha yini makwezru a file?’ A ni tlhela ni tisola hi ku kala ni nga hetanga nkama wa ku tala na yene.”—Vanessa, wa le Austrália.

LOKO u feliwe hi mhunu lweyi u mu zrandzraka, na wene u nga ha va u twe ku vaviseka, xivundzra ni gome. N’waninkama u hlundzrukile, u titwe nandzru kumbe u txhavile. Nambi hi ku tivutisa leswaku ndje swa ha siza ku tama u hanya u nga ha va u tivutisile.

Kambe ku dzrila a swi djuli ku hlaya swone leswaku wo va xin’wanana. Swi komba leswi a wu mu zrandzrisa xiswone lweyi a fiki. Kambe, xana swi kone leswi nga ku pfunaka ku pumba ku tlhaveka koloko?

LESWI NGA KU PFUNAKA KU PUMBA KU VAVISEKA

Hi swone leswaku ku vaviseka loku u ku twaka ku nga yentxa ingi a ku nge ti khaluta. Kambe u nga txhaveleleka hi ku tizrisa mpfunu lowu landzrelaka:

DZRILA

Madzrilela ya vhanu ma hambana, na wone nkama lowu va wu hetaka na va dzrila wa hambana. Kambe ku dzrila ku nga ku pfuna ku pumba ku vaviseka loku u ku twaka. Vanessa, lweyi ku khaneliwiki ha yene, a li: “A swo dja ni dzrila akuva ni pumba ku vaviseka loku a ni ku twa.” Sofia, lweyi a nga feliwa hi makwavu waxisati swa kola ni kola, a li: “Ku dzrimukela leswi yentxekiki swi vavisa swinene. Swi fana ni loko u pfula xilondzra u xi hlampswa. A swi tiyiseleleki, kambe swi yentxa xilondzra xi hola.”

PFULELA VAMBENI XIFUVA

Swa twisiseka leswaku hi minkama yimbeni u ta djula ku va wuswaku. Kambe ku dzrila i ntxhumu lowu bindzraka ngopfu ku wu zrwala wuswaku. Jared, wa 17 wa malembe, lweyi a feliwiki hi papayi, a li: “A ni byela vambeni leswi a ni titwisa xiswone. Na dumba leswaku swin’wana a swi nga twali, kambe ku bula hi swone swi ve swinene ngopfu.” Janice, lweyi ku khaneliwiki ha yene ku sunguleni, a yengesela a bindzru dzrin’wana a ku: “Ku bulela vambeni swi ni txhavelele ngopfu swinene. Ni vone leswaku a va ni twisisa nakone a ni va nga na xivundzra.”

PFUMELA KU PFUNIWA

Dotori wa kukazri a li: “Loko mhunu lwa feliwiki a pfumela ku pfuniwa hi vanghanu ni maxaka hi nkama lowu a ha ka ku feliwa, swoswo swi mu pfuna ku tiyisela ni ku pumba ku vaviseka kwakwe.” Byela vanghanu leswi u navelaka leswaku va ku pfuna ha swone; swi nga yentxeka va djula ku ku pfuna kambe va nga swi tivi leswaku va nga yentxisa kuyini.—Amaproverbia 17:17.

KOMBELA NKULUKUMBA A KU PFUNA

Tina a li: “Loko nkatanga a file hi kankru swa kola ni kola, ni titwe na ni lahlekeliwe hi mhunu lweyi a ni mu byela xa mbilu. Kutani ni sungule ku byela Xikwembu Nkulukumba swikazratu swanga ni ku vilela kwanga. Mixo wun’wana ni wun’wana a ni khongota ni kombela leswaku a ni nyika ntamu wa ku kota ku tiyisela siku hinkwadzru. A ni nge swi koti ni ku hlaya makhambi ya ku tala lawa Xikwembu Nkulukumba a ni pfuniki ka wone.” Tarsha, lweyi a feliwiki hi mamana na a ni 22 wa malembe, a li: “Ku dondzra Bibele hi swone a swi ni nyika ntamu siku ni siku! A swi ni pfuna ku kuma ntxhumu wa wunene wa ku pimisa ha wone.”

PIMISA HI NKAMA LOWU LAVA FIKI VA TAKA PFUXIWA

Tina a yengetele a ku: “A ku sunguleni, a dumbo dzra ku pfuka ka vafi a dzri nga ni txhaveleli hikusa a ni djula nkatanga nkama wolowo—vananga na vone a va djula tatana wavu. Kambe swoswi ku khaluta 4 wa lembe nakone ni khomelela swinene ka dumbo ledzro. Hi dzrone dzri ni nyikaka ntamu. Ni tiyanakanya na ni tlhela ni mu vona nakone ku yentxa leswo swa ni zrulisa nakone swi ni yentxa ni nyonxa.”

Nakunene, ku vaviseka kwaku a ku nge ti tekela ku b’ohla. Nambitanu, leswi humeleliki Vanessa swi nga ku tiyisa. A li: “A ku sunguleni u vona ingiki ku vaviseka kwaku a ku nge ti khaluta, kambe hakatsrongo-tsrongo u ta vona leswaku ka khaluta.”

Dzrimuka leswaku nambi loko xivundzra lexi u nga naxu xi nga khaluti, swa ha siza ku hanya. Hi ku pfuniwa hi Xikwembu Nkulukumba, u nga ha swi kota ku nyonxa xikan’we ni vanghanu ni ku va ni wutomi lebyi nga ni nkongometo. Handle ka leswo, ku nga li khale Xikwembu Nkulukumba a ta pfuxa lava fiki. A djula leswaku u tlhela u kumana ni vazrandzriwa vaku. Kutani a ku vaviseka loku u nga naku u nga ha ti ku twa ni siku ni dzrin’we!

Tindzrimana Ta Bibele Leti Nga Ku Pfunaka

Xikwembu Nkulukumba awa yi vona minyembeti yaku.

Mun’we wa vatsrali va Bibele a hlaye leswi ka Xikwembu Nkulukumba: ‘A minyembeti yanga mi hlengeletiwi khuwaneni dzraku; A mi tsraliwanga bukwini dzraku xana?’—Amapsalma 56:8.

Dzrilela ka Xikwembu Nkulukumba.

‘Ndzri bika ku xaniseka kwanga mahlweni ka [Xikwembu Nkulukumba]. . .Ndzra dzrila ku wene, Yehovha.’a—Amapsalma 142:2, 5.

U nga ha tlhela u mu vona lweyi u mu zrandzraka.

‘Ku ta va ni ku pfuka ka lava ku fa.’—Amintiṛo 24:15.

Xikwembu Nkulukumba a dumbisa ku pfuxa vhanu va ntsrandzra-vahlayi lava fiki, nakone a swi djula ngopfu swinene ku yentxa leswo.b—Yob 14:14, 15.

a Hi ku ya hi Bibele, Yehovha i vito dzra Xikwembu Nkulukumba.

b Akuva u dondzra swinʼwana mayelanu ni ku pfuka ka vafi, vona dondzro 6 ya xibukwana lexi liki Madzrungula Lamanene Ya Xikwembu Nkulukumba! lexi humexiwiki hi Timboni ta Yehovha nakone xi kumekaka akuva u xi xixa hi mahala ka www.jw.org/rng.