Loko U Vona Ingiki A Swa Ha Sizi Ku Hanya

Adriana, wa le Brasil, a li: “A ni nga swi koti ku susa mimpimiso leyo. Xileswo, a ni vona leswaku swa yampswa ni tisunga.”

XANA u sama u vaviseka lakakuva u vona leswaku swa yampswa u tisunga? Loko swi li tanu, n’waninkama wa mu twisisa ha hombe Adriana. A a xanisiwa hi mavabyi ya ku hlatiyela lokukulu, lawa a ma mu yentxa a tsrhama na a vavisekile nakone a nga ha voni dumbo. A xipiritana va kume leswaku a a vabya hi gome ledzrikulu.

Vona xikombiso xin’wana xa wanuna wa le Japão va liki i Kaoru, lweyi a a hlayisa vapswele lava vabyaka ni lava duhwaliki. A li: “Hi nkama wolowo, a ni kamiwe swinene a ntizrweni. Ku be nkama ni nga ha swi naveli ni swakuda nakone a ni nga ha byi kumi ha hombe wuzrongo. Ni hetelele ni pimisa leswaku a xa ku yampswa a ku li ku fa.”

Wanuna mun’wana wa le Nigéria, lweyi va liki i Ojebode, a li: “Nkama hinkwawu a ni tsrhama na ni vavisekile lakakuva ni dzrila. Xileswo a ni djula ku tisunga.” Lexi nyonxisaka hi leswaku Ojebode, Kaoru na Adriana a va gamelanga ku tisunga. Kambe lexi vavisaka hi leswaku vhanu va kolomu ka 800.000 va tisunga lembe dzrin’wana ni dzrin’wana.

LOMU HI NGA WU KUMAKA KONE MPFUNU

Ku tala ka lava tisungaka i vaxinuna nakone vanyingi ka vone va ve ni tingana ta ku kombela mpfunu. Yesu a te lweyi a vabyaka hi yene a djulaka dotori. (Luka 5:31) Xileswo, loko u ni mimpimiso ya ku tisunga, u nga dani ku kombela mpfunu. Vanyingi lava a va vabya hi gome ledzrikulu va vone leswaku vadotori va nga va pfuna ku lwa ni mavabyi lawo. Ojebode, Kaoru na Adriana va djule mpfunu wa vadotori nakone namunhla va titwa na swi yampswa swinene.

Akuva va daha mavabyi ya gome, vadotori va nga ha tizrisa muzri, swilayu leswi nga ku pfunaka kumbe ha swibidzri. Lava nga ni mavabyi lawa va vilela ku lehiseliwa mbilu ni ku pfuniwa hi ndangu wavu ni vanghanu. Kambe munghanu lwenkulu lweyi mhunu a nga vaka na yene i Yehovha Xikwembu Nkulukumba, lweyi a nyikaka mpfunu lowukulu hi ku tizrisa Zritu dzrakwe, ku nga Bibele.

XANA SWA KOTEKA KU NTSRHUNXEKA HI KU HELELA?

Hakanyingi, lava nga ni gome ledzrikulu va vilela wudaho lebyi hetaka nkama wa ku tala. Handle ka leswo, ku djuleka va dondzra tindlela ta ku hanya ni mavabyi yavu hi ku txintxa leswi a va hanyisa xiswone khale. Kambe loko u li ni mavabyi lawa, u nga va ni ku dumba loku Ojebode a nga na kone hi wumundzruku. A li: “A ni wu voni nkama wa ku vona Ezaya 33:24 na a hetiseka, loko ku nga ha vi ni mun’we lwa taka ku: ‘Ndzra vabya.’” Ku fana na Ojebode, pimisa hi xidumbiso xa Xikwembu Nkulukumba xa ku tisa ‘misava lemimpshwa’, lani ku ‘vaviseka’ ku nga ha tiki va kone. (Apfuletelo 21:1, 4) Xidumbiso lexo xi tlhamuxela leswaku mavabyi hinkwawu ya mbilu ni ya ku hlatiyela ma ta hela. Ku vaviseka loku u ku twaka u nga ka u ha nga ku dzrimuki ni siku ni dzrin’we, nakone ku nga ka ku nga ha buyeli a miyanakanywini yaku.—Ezaya 65:17.

Tindzrimana Ta Bibele Leti Nga Ku Pfunaka

Xikwembu Nkulukumba awa swi vona leswi u titwisaka xiswone.

‘Hikusa, mine Yehovha, ndzri Xikwembu Nkulukumba waku lwa tiyisaka voko dzraku dzra xinene, lwa ku byelaka: U nga txhave, ndzri ta ku pfuna.’—Ezaya 41:13.

Yehovha a twisisa matitwela yezru ku tlula mhunu mun’wana ni mun’wana, nakone a djula ku hi pfuna.

Yanakanyisisa hi Zritu dzra Xikwembu Nkulukumba.

‘[Eliya] a tikombelela ku fa, a ku: . . .Swoswi, Yehovha, susa hika dzranga.’—1 Tihosi 19:4.

Ojebode a li: “Ku yanakanyisisa hi Zritu dzra Xikwembu Nkulukumba swi ni pfunile. Ni vone leswaku muprofeta Eliya na yene a same a titwa ku fana na mine.”

Dondzra ka swikombiso swa le Bibeleni.

Yesu a byele Petro a ku: ‘Ni ku khongotelelile leswaku a ku pfumela kwaku ku nga heli.’—Luka 22:32.

Ntsrhaku ka loko a yale Yesu kazrazru, Petro a vaviseke ngopfu lakakuva a dzrile a nga khongoteleki. Kaoru a li: “Yehovha na Yesu a va ni mhaka ni matitwela ya Petro ntsrhaku ka hinkwaswu leswi a swi yentxiki. Ku yanakanyisisa hi leswo swi ni tiyise swinene.”

Ku vaviseka loku u ku twaka u nga ka u ha nga ku dzrimuki ni siku ni dzrin’we, nakone ku nga ka ku nga ha buyeli a miyanakanywini yaku.—Ezaya 65:17