“Swoswi Na Wu Zrandzra Ntizro Wa Nsimu!”

NI LAHLEKELIWE HI KU TSRHAVA

Lexi xi vavisaka, hi leswaku a nkama lowu na ni ni kolomu ka 13 wa malembe, a wuxaka byanga na Yehovha byi ye byi hola. A ni vona na ingi vadondzrikulozri va ni ntsrhunxeko ku ni tlula. Xileswo, na mine a ni navela ku va ni ntsrhunxeko lowu fanaka. A ni titwa na ni siveliwa hi vapswele vanga ni mintizro ya wukriste, nakone a ni vona mintizro ya moya na yi bindzra swinene. Nambi leswi a ni ngi ngi sama ni ganaganeka ka leswaku Xikwembu Nkulukumba a kone, ni sungule ku titwa na ni nga ha li kusuhi na Yehovha.

Kambe leswi a ni nga swi djuli ku hola hi ku helela hi tlhelo dzra moya a ni ya nsin’wini akuva ni hetisisa nawu. Kambe a swi nga pfi mbilwini, loko ni ya ku zrezreni a ni nga tilulamiseli, xileswo, a swi ni kazratela ku sungula mabulu ni ku ya mahlweni ni bulu. Hi mhaka ya leswo, a ni nge na timpinda kumbe swidondzro, kutani leswo swi yengeteli ku va ni nga ha nyonxi hi ntizro wa nsimu. Kutani a ni tivutisa leswaku ‘ha yini van’wana va yentxa ntizro lowu vhiki ni vhiki, wheti ni wheti’?

Loko ni tlhanganisi 17 wa malembe, a ni djula ku titsrhamela wuswanga akuva ni va ni ntsrhunxeko. Xileswo, ni longele mintxhumu yanga ni va ni zruzra ni ya a Austrália. Leswo swi va vavise ngopfu vapswele vanga. A va zron’weka swinene ha mine, kambe a va yanakanya leswaku a ni ta tama ni mu tizrela Yehovha.

A Austrália, a wuxaka byanga na Yehovha byi ye byi hola. Ni sungule ku lovha mintlhanganwini. Ni tipatsre ni vampshwa va kukazri lava a va fana na mine, lava siku dzrin’we a va li mintlhanganwini kambe ka wusiku lebyi landzrelaka a va ya nwa va tlhela va kina a madixkoteka. Loko ni dzrimuka, a ni nga yimanga mbangu wun’we, a ni li xihlayelamfuzrini ne misaveni. Kambe a ni nga titwi na ni nyonxile ka matlhelo ha mabidzri.

NDONDZRO YA LISIMA LEYI A NI NGA YI YIMELANGA

Na ku khaluti malembe mabidzri, ni tive makwezru wa kukazri wa xisati lweyi na a nga swi tivi a ni pfuniki kuva ni pimisa leswaku kasi wutomi byanga a byi ya kwini. Ka muti lowu a ni tsrhama ka wone a hi li 6 wa vamakwezru va xisati lava kalaka va nga txhatanga, nakone hi zrambe mulaviseli wa muganga ni nsati wakwe, Tamara, akuva va tsrhama kaya kwezru ku dzringana vhiki. Nkama lowu nuna wakwe a a langusela timhaka ta bandla, Tamara a tsrhame na hine, van’hwanyana, hi bula hi va hi hlekelela. Leswo a swi nyonxisa ngopfu. Nakone a a li mhunu wa mahleko. A swi nabyala ku bulisana na yene. Swi ni nyonxise ngopfu ku vona mhunu lweyi a zron’wekaka hi mintxhumu ya moya nakone hi nkama wun’we a nyonxile swinene.

Tamara i mhunu lweyi a nyonxiki ngopfu swinene. A lizrandzru dzrakwe hi xihlayelamfuzri ni nsimu dzri kutxa ngopfu swinene. A a nyonxa ngopfu hi ku yentxela Yehovha leswi a nga swi kotaka, na kasi mine a ni nga nyonxi hi ku tizrela Yehovha ntsena kuva ni hetisisa nawu. Vonela dzrinene ni ku nyonxa loku a a li na kone swi byi khumbi ngopfu wutomi byanga. Xikombiso xakwe xi ni yentxe ni pimisa hi mazritu ya kukazri lama nga ntiyiso, lama liki: Yehovha a djula hi mu tizrela hi ‘ku nyonxa’ ni “hi ku yimbelela”.—Ps 100:2.

NDLELA LEYI NI TLHELIKI NI SUNGULA KU ZRANDZRA NSIMU HA YONE

A ni djula ku va ni ku nyonxa ka ku fana ni loku Tamara a a li na kone, kambe akuva leswo swi koteka, a swi djula ni yentxa ku txintxa lokukulu. Swi teki nkama, kambe ni yentxe ku txintxa ha katsrongokatsrongo. Ni sungule ku va ni tilulamisela na ni nga si na ya nsin’wini, nakone minkama yin’wana a ni tizra swanga phayona dzra ku pfunisa. Leswo swi ni pfune kuva ni nga ha txhavi ni kuva ni tiyiseka hi leswi a ni swi dondzrisa. Leswi a ni tizrisa ngopfu Bibele a nsin’wini, ni kume ku nyonxa a ntizrweni wa ku zrezra. Xileswo, a ni hlwelanga ku teka wuphayona bya ku pfunisa hi nkama lowu nga pimiwangakiki.

Ni sungule ku hamba wunghanu ni vamakwezru va tintanga ta ku siyanasiyana, lava a va yentxa leswi va nga swi kotaka a ntizrweni wa Yehovha na va nyonxile. Xikombiso xavu lexinene xi ni pfune kuva ni vona leswi a ni fanela ku swi zrangisa a wuton’wini byanga nakone ni sungule ku dondzra Bibele siku ni siku. Ni sungule ku nyonxa ngopfu swinene hi ntizro wanga wa nsimu nakone ni sungule ku tizra swanga phayona dzra nkama hinkwawu. Hi khambi dzra ku sungula, ntsrhaku ka loko ku khalute malembe ya ku tala, ni titwe na ni nyonxile ni tlhela ni titwa na ni li kaya a ndzreni ka bandla.

NI KUME MUNGHANU WA NKAMA HINKWAWU LWEYI A NGA PHAYONA

Lembe ledzri landzreliki, ni tivi Alex, mhunu lwenene, lweyi a a zrandzra Yehovha ni ntizro wa nsimu. A a tizra swanga nandzra wa wutizreli nakone a tizre 6 wa malembe swanga phayona. Mfuzri Alex a tizre ka nsimu leyi nga ni xivileleko lexikulu a Malawi hi nkama wa kukazri. A Malawi, a tive vazrumiwa lava viki xikombiso lexinene ku yene nakone va mu kutxe ku tama a zrangisa ku tizrela Yehovha a wuton’wini byakwe.

Hi 2003, mine na Alex hi txhatile, nakone hi tame hi va ka ntizro wa nkama hinkwawu. Hi ve ni tindondzro tinyingi ta ku hlamalisa nakone Yehovha a hi tovokise hi tindlela tinyingi ta ku siyanasiyana.

YEHOVHA A HI TOVOKISE NGOPFU SWINENE

Hi 2009, hi zrambiwe ku ya tizra a Timor-Leste, ka tiko dzritsrongo ledzri nga kusuhi ni Indonésia. Hi tale hi ku hlamala hi tlhela hi txhava hi nkama wun’we. Ntsrhaku ka ntlhanu wa tiwheti, hi tlhase a doropankulu a Dili.

Ku zruzra kwezru swi djule hi txintxa mahanyela. Swi djuli hi titoloveta mahanyela, lidzrimi, swakuda ni matsrhamela lamampshwa. A nsin’wini, a hi kumana ni vhanu lava a va xaniseka hi kola ka wusiwana, ku va va nga dondzranga ni ku xanisiwa. A hi tlhela hi vona vhanu vanyingi lava a va bindzriwa hi ku xaniseka hi le nyameni ni le miyanakanywini, loku vangiwiki hi yimpi ni wugevengu.a

A ntizro wa nsimu a wu hlamalisa! Hi xikombiso khambi dzrimbeni ni tive xinw’hanyatana xa 13 wa malembe, lexi a xi tsrhama na xi nga nyonxanga, lexi vitaniwaka Maria.b A xa ha ku luzekeliwa hi mamana wa xone malembenyana ntsrhaku, nakone a swi kala ku va xi vona papayi wa xone. Ku fana ni vatsrongwana vanyingi va ntanga yakwe, Maria a a nga swi tivi leswaku i mpswini leswi a a fanela ku swi yentxa a wuton’wini byakwe. Ni dzrimuka leswaku siku dzrin’wana a dzrilili loko a tlhamuxela ndlela leyi a a titwa ha yone. Nambitanu, a ni nga swi twisisi leswi a a swi hlaya hikusa a ni nga si na swi kota ha hombe ku khanela lidzrimi dzrakwe. Ni khongote ka Yehovha ni kombela ku va a ni pfuna ku va ni mu tiyisa, nakone ni sungule ku dondzra tsralwa dzra kukazri akuva ni mu txhavelela. Ntsrhaku ka malembenyana, ni vone ndlela leyi xihlayelamfuzri xi txintxiki mapimisela, matsrhamela ni wutomi bya Maria. A babatisiwile, nakone swoswi a tifambisela swidondzro swakwe swa Bibele. Namunhla, Maria a ni ndangu wukulu wa moya lani a titwaka na a zrandzriwa.

Yehovha a wu tovokisile ntizro wa ku zrezra a Timor-Leste. Nambi leswi vazrezri vanyingi va babatisiwiki ndzreni ka 10 wa malembe ya wugamu, vanyingi va tizra swanga maphayona ya nkama hinkwawu, malandzra ya wutizreli ni vakulu. Van’wana va tizra a RTO nakone va pfunisa ku humexeni ka swakuda swa moya hi lidzrimi dzra muganga wolowo. Swi ni nyonxise ngopfu ku va twa na va yimbelela a mintlhanganwini, ku va vona na va n’wayitela ni ku vona ku kula kwavu hi tlhelo dzra moya.

A NI NGA SWI YANAKANYI LESWAKU NI NGA VA NI WUTOMI BYA KU NYONXISA HI NDLELA LEYI

A xiyavelo xezru a Timor-Leste a xi hambane swinene ni wutomi lebyi a hi hanya byone a Austrália, kambe a ni tisoli, hikuva ni nyonxe swinene. Minkama yimbeni a hi khwela xapa ledzri taliki swinene hi vhanu, dzri tlhela dzri pakela tihlampfi ta ku woma ni swidjumba swa mintxhumu ya le masin’wini leyi a yi xavisiwa ka bazara dzra mbangu wolowo. Masiku mambeni, a hi fambisa xidondzro ka xiyindlwana lexi hisaka, lexi a xi nga semendheliwanga hansi nakone a ku tsrutsrumatsrutsruma tihuku. Nambi leswi a hi langutana ni swikazratu, minkama ya ku tala a ni ti byela leswi: ‘Leswi swa hlamalisa hakunene!’

Loko ni langusa ntsrhaku, ni va tlangela swinene vapswele vanga hi leswi va yentxiki hinkwaswu leswi va nga swi kotaka akuva va ni dondzrisa tindlela ta Yehovha ni kuva va ni pfunile, nambi nkama lowu ni langutaniki ni swikazratu a wumpshweni byanga. Ni vone mazritu ya Amaproverbia 22:6 na ma hetiseka wuton’wini byanga. Mamana na Papayi wa tikhuza swinene ha mine na Alex. Va nyonxa hi ku hi vona hi tizrisiwa ha Yehovha. Ku sukela hi 2016, hi tizra swanga valaviseli va muganga ka nsimu ya zrwavi dzra Australásia.

A swi kholwisi leswaku malembe ntsrhaku a ni vona ntizro wa ku zrezra na wu bindzra. Swoswi ni swi zrandzra swinene ku zrezra! Swoswi na swi twisisa leswaku nambi loko swiyimu swa wutomi swi pfana swi txintxatxintxa, ku nyonxa ka xihlayelamfuzri, hi ku kuma ntsena hi ku tizrela Xikwembu Nkulukumba hi mbilu hinkwayu. Ku hlaya ntiyiso, a 18 wa malembe ya wugamu lawa ni ma hetiki na ni tizrela Yehovha kun’we na Alex ma vi wone ya ku nyonxisa a wuton’wini byanga. Swoswi na wu twisisa ntiyiso wa mazritu ya mupsalma Davhida loko a byela Yehovha a ku: ‘Kutani lava titsrhavelaka ku wene hinkwavu va ta tsrhava; va va va tsrhavisisa hi masiku hinkwawu . . . Kutani lava zrandzraka vito dzraku va ta tinyonxela ku wene.’—Ps 5:11.