1921 Ku Khaluta Dzana Dzra Malembe

KA Xihondzro Xa Ku Zrindzra xa 1 ka Janeru wa 1921 hi xinghiza ku hambiwe xivutiso lexi ka swidondzri swa Bibele: “He wini ntizro lowu wu hi yimeliki lembe ledzri?” Xihondzro lexo xi nyikele nhlamulo hi ku tsrhaha ndzrimana ya Ezaya 61:1, 2, leyi va dzrimuxiki a ntizro wa ku zrezra. Leyi liki: ‘Yehovha a ndzri totile akuva ndzri dzrungulela lava ku nabyala madzrungula lamanene . . . , ni ku hlaya lembe ledzra wunene bya Yehovha ni siku dzra ku tidzrihisela ka Xikwembu Nkulukumba wezru.’

VAZREZRI LAVA NGA NI XIXIXI

Akuva swi hetisisa ntizro wa ku zrezra, Swidondzri swa Bibele a swi fanela ku va ni xixixi. A swi fanela ku zrezra ‘madzrungula lamanene’ ka lava ku lulama ni ‘siku dzra ku tidzrihisela’ ka lavamfani.

Makwezru John Hoskin, lweyi a a tsrhama Canadá a nyikele wumboni hi xixixi nambi leswi a a kanetiwa. Hi 1921 a kume muzrezri wa kukazri wa Mumetodixta. Makwezru John a sungule ku bulisana na yene hi hlaya leswi: ‘Hi fanela leswaku hi va ni mabulu lama nyonxisaka hi Bibele, nakone nambi loko hi nga pfumelelani ka timhaka ta kukazri hi nga yima ku bula hi tlhela hi tama hi va vanghanu.’ Kambe a hi swone leswi yentxekiki. Makwezru John a li: “A he bulisana nkamanyana wutsrongo hi loko muzrezri lwiyani wa mumetodixta, a ba xipfalu hi ntamu ngopfu ntamu swinene lakakuva ni yanakanya leswaku a vidru dzra xipfalu a dzri ta pandzreka.”

Kutani muzrezri wa mumetodixta a bonga a ku: “Ha yini u nga yi ka lava kalaka va nga li vakriste.” Makwezru John a nga hlayanga ntxhumu, kambe na a famba a pimise leswi, Vhela a ni vulvula ni mhunu wa ku a hi mukriste.

Siku ledzri landzreliki loko a li ku txhumayeleni a kezrekeni dzrake, muzrezri lwiyani a khaneli ku biha hi makwezru John. Loko a dzrimukela makwezru John a a li: “A byeli vhanu va le kezrekeni dzrake leswaku mine a ni li muhembi lwenkulu lweyi a samiki a mu vona a doropeni ledzriyani nakone a ni faneliwa hi ku fa.” Leswo a swi mu godolisanga makwezru John, a tame a zrezra nakone a ve ni mabindzru lamanene. Makwezru john a li: “Luwani wu ve nkama lowunene ngopfu wa ku zrezra, vhanu vambeni a mbangwini wolowu va hlaye leswi: “Ha swi tiva leswaku u mhunu wa Xikwembu Nkulukumba.” Nakone va ni nyike mintxhumu ya kukazri leyi a ni yi vilela.

XIDONDZRO XA XIMHUNU NI XIDONDZRO XA NDANGU

Akuva Swidondzri swa Bibele swi pfuna vhanu kuva va twisisa Bibele ku yampswa, a swi humexa swivutiso ni tinhlamulo leti sekeliwiki a Bibeleni, ka Revhixta ledzri swoswi dzri vitaniwaka Pfukani! A ku ni xiyenge lexi a xi ni swivutiso leswi vapswele a va ta swi kambisisa ni vanavu. Vapswele a va fanela ku vutisa vanavu swivutiso leswo ni ku va pfuna akuva va kuma tinhlamulo ta kone a Bibeleni. Swivutiso swa ku fana ni lexi liki: “Xana Bibele dzri ni mabuku mangani?” a xi pfuna vana akuva va va ni tindondzro ta masungulo. Kasi swivutiso swimbeni swa ku fana ni lexi liki: Xana mukriste mun’wana ni mun’wana wa ntiyiso a fanela ku yimela leswaku a ta langutana ni ndzringo wa ku xanisiwa hi ndlela ya kukazri? a xi lulamisela vampshwa akuva va va vazrezri lava nga ni xixixi.

Handle ka leswo a ku ni xiyenge lexi a xi ni swivutiso ni tinhlamulo leswi a swi pfuna lava nga ni wutivi lebyi yengetelekiki hi Bibele. A va ta kuma tinhlamulo ka vholumi dzra ku sungula Estudo das Escrituras. Vhanu vanyingi va dondzre swinyingi ka swiyenge leswo, kambe ku tivisiwe leswaku a swiyenge leswo a swi nge he te humesiwa. I yini lexi yentxiki kuva ni ku txintxa koloko?

BUKU LEDZRIMPSWHA

Buku ledzri liki *A Harpa de Deus*

Kartawu ledzri a dzri kombisa matluka lawa a ma fanela ku dondzriwa

Kartawu ledzri nga ni swivutiso

Vamakwezru lava a va zrangela ntizro hi nkama wolowo, va xiye leswaku ndlela leyinene ya ku dondzrela mhunu Bibele, i ku dondzra mhaka ha yin’we ha yin’we. Xileswo, hi Novhembru wa 1921 ku humexiwe buku ledzri liki A Harpa de Deus. Loko mhunu wa kukazri lwa nyonxelaka a yamukela buku ledzro, a a tsralisiwa ka kursu ledzri a dzri vitaniwa Estudo Bíblico da Harpa. Ka kursu ledzro, mhunu a a tidondzrela ha wuswake, nakone a a dondzra mayelanu ni “kungu dzra Xikwembu Nkulukumba dzra ku nyika vhanu wutomi lebyi nga helikiki”. A swi yentxisiwa kuyini leswo?

Loko mhunu a pfumela ku nyikiwa buku a a nyikiwa ni kartawu dzra kukazri. A kartawu ledzro a dzri hlaya leswaku i matluka mangani lawa mhunu a a fanela ku ma dondzra vhiki ledzro. Ka vhiki ledzri landzrelaka a a nyikiwa kartawu dzrimbeni ledzri a dzri ni swivutiso leswi yelanaka ni matluka lawa a a fanele a madodzra. Hi wugamu a kartawu a dzrimu komba matluka lawa a a fanela ku ma dondzra ka vhiki ledzri landzrelaka.

Ka vhiki dzrin’we ndzreni ka 12 wa mavhiki, mhunu lweyo a a yamukela kartawu ledzri pfaka ka dzrin’we dzra mabandla dzra le kusuhi ni lani a tsrhamaka kone. Hi ntolovelo a makartawu a ma nyikeliwa hi lava kuliki hi ntanga ni lava a va nga swi koti ku zrezra hi muti ni muti. Hi xikombiso, Anna Gardner wa le Estados Unidos, a te: “Makwezru wanga wa xisati Thayle a a limalile, kambe a kote ku yentxa leswi yengetelekiki loko ku humexiwe buku ledzri liki A Harpa de Deus. Vhiki ni vhiki a a zrumela makartawu lawa a ma ni swivutiso.” Loko mhunu wa kukazri a heta kursu dzrake a a yendzreliwa hi makwezru mun’we akuva a pfuniwa ku twisisa leswi yengetelekiki hi Bibele.

Thayle Gardner ka xitsrhamu xa lava ku limala

NTIZRO LOWU A WU LI MAHLWENI

A ku heleni ka lembe, makwezru Joseph Franklin Rutherford a zrumele papela dzra kukazri ka mabandla hinkwawu. A papela ledzro a dzri ku: “A lembe ledzri ku nyikeliwe wumboni mayelanu ni Mfumu hi ndlela leyikuku ku tlula malembe man’wana.” Na a yanakanya hi wumundzruku, makwezru Rutherford a tlhele a hlaya leswi: “Ka ha ni ntizro wukulu wu fanelaka ku yentxiwa. Kutxa vambeni akuva va patsreka ka ntizro lowu.” Handle ka ku ganaganeka Swidondzri swa Bibele swi xi landzrile xilayu lexo. Nakone hi 1922 swi zrezre dzrungula dzra Mfumu hi xixixi ni hi ndlela leyikulu ngopfu.

Vanghanu Lava Nga Ni Xixixi

Swidondzri swa Bibele swi kombane lizrandzru hi ku va swi pfunana. A swi li vanghanu lava nga ni xixixi ‘a makhombyeni’. Xikombiso lexi landzrelaka xi swi beka a livaleli leswo.—Pr 17:17.

Hi wawubindzri, 31 ka Mayu wa 1921, a doropeni dzra Tulsa, Oklahoma, a Estados Unidos, ku yentxeke leswi hi ku famba ka nkama swi tiviwiki swanga Massacre de Tulsa. Hinkwaswu swi sungule loko wanuna wa kukazri lweyi a nga mulandi a yisiwe djele na va hlaya leswaku a be wansati wa kukazri lweyi a nga mulungu. Ntsrhaku ka leswo, vavanu va valungu lava tlhasaka 1.000 va lwisane ni ntlawa wumbeni wa valandi, lowu a wu li wutsrongo. Hi ku kahlula ku lwisana koloko ku hangalakile a mungangeni hinkwawu wa Greenwood, lani ku tala ka vhanu lava a va tsrhama kone a va li valandi. Ku tlula 1.400 wa mimbangu ya ku xavisela ka yone kun’we ni mimiti ku yiviwile ku tlhela ku hisiwa. Wudzrunguli byi hlaya leswaku 36 wa vhanu va file, kambe swi nga yentxeka leswaku a nhlayu ya ntiyiso ya vhanu lava fiki a ve 300.

Makwezru Richard Joseph Hill, mun’we wa Swidondzri swa Bibele, lweyi a nga mulandi a dzrungule leswi yentxekiki: “Ka wusiku lebyi ku yentxekiki hasahasa, hi tlhanganile hi lani a hi tolovele ku yentxa ha kone. Loko mintlhanganu yi helile hi twe swibalesa. Nambi loko hi ye u yetleleni a swibalesa a swa ha twala.” Kambe hi wawuzrazru, 1 ka Junyu ni mixo a xiyimu a xi bindzra swinene. Makwezru Richard a tlhela a ku: “Vhanu va kukazri va ni byele leswaku loko ni djula ku sizreleleka a ni fanela ku ya ka predu dzra kukazri dzra mfumu.” Kutani makwezru Richard, nsati wake kun’we ni vanake va tsrutsrumele ka predu dzra kukazri dzra mfumu, a Tulsa. Ka predu dzroledzro kutani a ku ni 3.000 wa vavanuna ni vavasati va valandi lava a va sizreleliwile hi masotxha, lawa a ma vitaniwile akuva ma yimisa a hasahasa.

Hi nkama wolowo, Arthur Claus, lweyi a a li mulungu a teke xiboho lexi a xi djula xixixi. A li: “Loko ni tive leswaku a ku ni mintlawa leyi a yi yiva ni ku hisa mimiti a Greenwood, ni vone swi yampswa ku ta kamba nakulozri wanga wa lisima Richard.”

Arthur Claus a dondzrisaka bandla dzra 14 wa vatsrongwana hi ku tizrisa buku ledzri liki A Harpa de Deus

Loko makwezru Arthur a tlhase kaya ka makwezru Richard, a kume vhizinyu lweyi a nga mulungu na a khome xibalesa. Vhizinyu lweyo, lweyi a a li munghanu wa makwezru Richard a pimise leswaku Arthur a a li mun’we wa lava a va yiva ni ku hisa mimiti. Kutani a hlaya leswi: “U yentxe yini kaya ka Richard?”

Arthur a li: “Loko nhlamulo yanga a yi nga mu nyonxisanga wanuna lwiyani a a ta ni balesela. Kutani ni mu byele leswaku ni munghanu wa makwezru Richard ni leswaku ni sama ni ya kaya kwake makhambe manyingi.” Arthur kun’we ni vhizinyu lwiyani va kote ku sizrelela muti wa makwezru Richard.

Ntsrhaku ka nkamanyana, Arthur a gungule leswaku makwezru Richard ni ndangu wake a va li ka predu dzra kukazri dzra mfumu. Kambe Arthur a byeliwe leswaku a valandi lava a va li mbangwini lowo a vo to huma ntsena loko a vo kuma papela ledzri a dzri sinariwe hi muzrangeli wa masotxha, ku nga Barret. Arthur a te: “Swi kazrate ngopfu ku vulavula ni muzrangeli wa masotxha. Loko ni mu byela leswi a ni navela ku swi yentxa a ni vutise leswi: ‘Xana u ta wu sizrelela ndangu lowu u tlhela u wu hlayisa?’ Ni vhele ni ku ina.”

Ntsrhaku ka loko va mu pfumelelile, Arthur a ye lomu Richard a a li kone. Loko Arthur a kombe papela ka musotxha, a musotxha a te: “Swa hlamalisa, u kume mpfumelelo wa muzrangeli wezru! A wu swi tiva leswaku u mhunu wa ku sungula lweyi a kumaka mpfumelelo wa ku humexa mhunu lani?” Ntsrhaku, musotxha lwiyani a djuletele ndangu wa makwezru Richard a va a wu kuma. Hinkwavu va manyani ka movha wa makwezru Arthur nakone va mukile.

Arthur a yentxe hinkwaswu a nga swi kotaka akuva a sizrelela ndangu wa makwezru Richard. Xixixi xake kun’we ni lizrandzru dzrake dzri hlamalise vhanu vambeni. Arthur a li: “Vhizinyu lweyi a pfuniki ku sizrelela muti wa makwezru Richard a sungule ku va ni xitxhavu hi vhanu va Xikwembu Nkulukumba. Nakone vhanu vanyingi va nyonxele ntiyiso hikusa va vone leswaku vhanu va Xikwembu Nkulukumba a va na xihlawuhlawu.”