Xana A Buku Dzra Apfuletelo Dzri Byi Khumba Hi Ndlela Yini Wumundzruku Byaku?

1. He xini xiboho xa lisima lexi vhanu hinkwavu va fanelaka ku xi teka?

A VHANU va fanela ku teka xiboho xa lisima. Xana va ta hlawula Yehovha swanga Hosi ya ku lulama ya wuyaku hinkwabyu kumbe va ta hlawula ku yima ni nala wake, Sathana Diyavulosi? Kambe tlhelo ledzri va taka dzri hlawula dzri ta kombisa leswaku va fanela ku kuma wutomi lebyi nga helikiki kumbe im-him. (Mt 25:31-33, 46) A ‘nhlomulweni lowukulu’, va ta fungeliwa ku huluka kumbe ku helisiwa.—Mpf 7:14; 14:9-11; Ezk 9:4, 6.

2. a) Xana Ba-Heberu 10:35-39 yi hi kutxa ku yentxa yini? b) Xana buku dzra Apfuletelo dzri nga hi pfunisa kuyini?

² Dondzra Ba-Heberu 10:35-39. Loko u hlawule ku seketela Mfumu wa Yehovha, u teke xiboho xa wutlhazri. Kutani u swi djula ngopfu ku pfuna vambeni ku teka xiboho lexi fanaka. Akuva leswo swi koteka, u nga ha tizrisa dzrungula dzra buku dzra Apfuletelo akuva u va pfuna. A buku ledzri dzri tlhamuxela leswi taka humelela lava fulazrelaka Yehovha, dzri tlhela dzri hi komba matovoko lawa ma taka yamukeliwa hi lava seketelaka hi ku dumbeka a wuhosi bya Yehovha. I swinene kuva hi dondzra hi mintiyiso leyi ya lisima, hikusa swi ta tiyisa ku tiyimisela kwezru ka ku tama hi tizrela Yehovha. Handle ka leswo hi nga tizrisa leswi hi swi dondzriki akuva hi pfuna van’wana ku teka xiboho xa ku tizrela Yehovha ni ku ya mahlweni va yentxa leswo.

3. He swini swivutiso leswi hi taka swi hlamula ka xidondzro lexi?

³ Ka xidondzro lexi, hi ta kambisisa swivutiso leswi: Xana lava seketelaka wuhosi bya Xikwembu Nkulukumba va ta kuma yini? I yini leswi taka yentxekela lava hlawulaka ku seketela xihazri xa libungu lexi ku vulavuliwa ha xone ka buku dzra Apfuletelo?

LESWI TAKA YENTXEKELAKA LAVA DUMBEKAKA KA YEHOVHA

4. He wini ntlawa lowu mupostola Yohane a wu voniki na wu li na Yesu a tilweni?

⁴ Ka xivono xa kukazri, mupostola Yohane a vone mintlawa yibidzri leyi seketelaka wuhosi bya Yehovha yi va yi yamukela wutomi lebyi nga helikiki. A ntlawa wa ku sungula wu vumbiwa hi 144.000 wa vhanu. (Mpf 7:4) Va hlawuliwe kola misaveni akuva va ya va vafumi na Yesu Kriste a matilweni. Vone kun’we na Yesu, va ta fuma misava. (Mpf 5:9, 10; 14:3, 4) A xivonweni lexo, Yohane a va vone na va yime na Yesu a tilweni, a nhaveni ya Siyoni.—Mpf 14:1.

5. Ku ta yentxeka yini hi lava saliki va ntlawa wa lava 144.000?

⁵ Ku sukela a nkameni wa vapostola ku ta ta tlhasa namunhla, ka ha hlawuliwa vhanu akuva va hamba ntlawa wa lava va 144.000. (Lk 12:32; Ro 8:17) Yohane a byeliwe leswaku ku ta va ntsena nhlayu yitsrongo ya vahlawuliwa lava taka va na va ha hanya a masikwini ya wugamu. ‘Lava saliki’ va ta yamukela ‘xifungo’ xa wugamu, kumbe ku fungiwa ka wugamu loku kombisaka leswaku va yamukeleka ka Yehovha na nhlomulo lowukulu wu nga si sungula. (Mpf 7:2, 3; 12:17) Hi nkama wa nhlomulo lowukulu, lava saliki ka lava 144.000 va ta tekiwa va ya tilweni akuva va ya va ni lavan’wana lava kutani va yamukeliki hakelo dzravu. Va ta va tihosi kun’we na Yesu a Mfun’wini wa Xikwembu Nkulukumba.—Mt 24:31; Mpf 5:9, 10.

6-7. a) He wini ntlawa wumbeni lowu Yohane a wu voniki nakone hi dondzra yini mayelanu na wone? b) Ha yini Apfuletelo ndzrima 7 yi li ya lisima ka lava va saliki ni lava xitsrhungu lexikulu?

⁶ Ntsrhaku ka ku vona ntlawa wa lava yaka tilweni, Yohane a vona ‘xitsrhungu lexikulu’. Ku hambana ni lava 144.000, ntlawa lowu i wukulu swinene lakakuva a nga kone lwa nga kotaka ku wu hlaya. (Mpf 7:9, 10) I yini leswi hi swi dondzraka mayelana na vone? Yohane a byeliwe leswi: ‘Lava, hi lava pfaka nhlomulweni lowukulu, va hlampswiki minkhantxhu yavu, va mi basisa hi ngati ya Hambana.’ (Mpf 7:14) Lava ‘xitsrhungu lexikulu’, lava taka huluka ka nhlomulo lowukulu, va ta tikholisa hi matovoko ya ku nyonxisa kola misaveni.—Ps 37:9-11, 27-29; Pr 2:21, 22; Mpf 7:16, 17.

⁷ Xana ha yi vona ndlela leyi hi patsrekaka ha yone ka dzrungula ledzri kumekaka ka Apfuletelo ndzrima 7, kumbe mufoto lowu hi kombiwaka wone? Handle ka ku ganaganeka ha yi vona. Nakunene, a ta va nkama wa ku nyonxisa ngopfu swinene ka mintlawa ha yibidzri leyi tizrelaka Xikwembu Nkulukumba hi ku dumbeka! Hi ta nyonxa ngopfu swinene hi kuva hi hlawule ku seketela wuhosi bya Yehovha! I yini swin’wana leswi a buku dzra Apfuletelo dzri hi byelaka swone mayelanu ni nhlomulo lowukulu?—Mt 24:21.

LESWI TAKA YENTXEKELA LAVA FULAZRELAKA XIKWEMBU NKULUKUMBA

8. Xana nhlomulo lowukulu wu ta sungulisa kuyini nakone vhanu va ku tala va ta khumbekisa kuyini?

⁸ Hi lani hi swi voniki ha kone ka nhlokomhaka leyi khalutiki, a swizro swa politika swi ta ndzrulukela Babilona Lwenkulu, ku nga wukhongoti hinkwabyu bya madzrimi. (Mpf 17:16, 17) Leswo hi swone swi taka yentxa leswaku ku sungula nhlomulo lowukulu. Kambe xana swi ta yentxa vhanu vanyingi va djula ku tizrela Yehovha? Im-him. Kambe a matsrhan’wini ya leswo, Apfuletelo ndzrima 6 yi kombisa leswaku hi nkama wolowo, lava nga tizrelikiki Yehovha va ta djuletela nsizrelelo ka politika ni ka vafambisi va swa mabindzru va misava leyi lava fanisiwaka ni tinhava. Swanga hi leswi va taka kala va nga yimi ni Mfumu wa Xikwembu Nkulukumba, Yehovha a ta va vona swanga vaxandzruki.—Lk 11:23; Mpf 6:15-17.

9. I yini leswi taka yentxa vhanu va Xikwembu Nkulukumba va va lava hambaniki ni vhanu van’wana hi nkama wa nhlomulo lowukulu, nakone i yini leswi taka va yentxekela hi mhaka ya leswo?

⁹ Ku hlaya ntiyiso, hi nkama wa nhlomulo lowukulu swi ta voneka leswaku malandzra ya ku dumbeka ya Yehovha ma hambanile ni vhanu van’wana. A to va vone ntsena ntlawa lowu taka tama wu tizrela Yehovha, lowu taka kala wu nga seketeli ‘xihazri’. (Mpf 13:14-17) Hi mhaka ya ku dumbeka kwavu ka Yehovha, va ta hlundzrukeliwa hi lava va kalaka va nga tizreli Yehovha. Leswo swi ta yentxa leswaku mintlawa ya matiko yi hlasela vhanu va Xikwembu Nkulukumba a misaveni hinkwayu. Bibele dzri vitana nhlaselo lowo dzri ku i Gog wa Magog.—Ezk 38:14-16.

10. Hi lani swi kombisiwaka ha kone ka Apfuletelo 19:19-21, xana Yehovha a ta yentxa yini loko vhanu vake va hlaseliwa?

¹⁰ I yini leswi Yehovha a taka swi yentxa loko a vona nhlaselo lowo? Ali: ‘A ku lebya kwanga ku ta tlhantuka.’ (Ezk 38:18, 21-23) A ndzrima 19 ya buku dzra Apfuletelo, yi tlhamuxela leswi taka gama swi yentxeka. Yehovha a ta zrumela N’wanake akuva a sizrelela vhanu vake ni ku helisa valala vake. ‘Mabutsrhu ya le tilwini’, ku nga tintsrumi ta ku dumbeka kun’we ni lava 144.000, va ta tipatsra na Yesu akuva va lwa na Gog wa Magog. (Mpf 17:14; 19:11-15) Xana yimpi leyo yi ta gamisa kuyini? Vhanu hinkwavu ni tinhlengeletanu leti pfukelaka Yehovha, va ta heliseliwa wugamu!—Dondzra Apfuletelo 19:19-21.

MUTXHATU LOWU TAKA VA KONE NTSRHAKU KA YIMPI

11. He wini ntxhumu wa ku hlawuleka lowu taka yentxeka swa nga xiyenge xa lisima ka buku dzra Apfuletelo?

¹¹ Xana wa yi yanakanya ndlela leyi lava ku dumbeka va ta ka titwa ha yone hi ku va va hulukile loko ku helisiwa valala va Xikwembu Nkulukumba? Nakunene, a ta va nkama wa ku nyonxisa ngopfu swinene! Nambi leswi ku ta ka va ni nkulungwana wa ku nyonxa a tilweni loko ku helisiwa Babilona Lwenkulu, ku ni ntxhumu wun’wana lowu taka buyisa ku nyonxa lokukulu. (Mpf 19:1-3) Nakunene ntxhumu wolowo, i xiyenge xa lisima ngopfu swinene ka buku dzra Apfuletelo ku nga ‘vukati bya Hambana’.—Mpf 19:6-9.

12. Hi lani swi kombisiwaka ha kone ka Apfuletelo 21:1, 2, a ta va wini nkama wa wukati bya Hambana?

¹² Xana wukati lebyo byi ta yentxeka hi nkama muni? Hinkwavu lava 144.000 va ta va tilweni na yimpi ya Armagedon yi nga si sungula. Kambe lowo a nga ti va wone nkama wa wukati bya Hambana. (Dondzra Apfuletelo 21:1, 2.) A wukati bya Hambana byi ta va ntsrhaku, a wugan’wini bya yimpi ya Armagedon na valala hinkwavu va Xikwembu Nkulukumba va helisiwile.—Ps 45:3, 4, 13-17.

13. Xana wukati bya Hambana byi tlhamuxela yini ka lava va patsrekaka ka byone?

¹³ Xana wukati bya Hambana byi tlhamuxela yini ka lava patsrekaka ka byone? Swa nga hi leswi wukati byi tlhanganisaka wanuna ni wansati, wukati lebyo bya ku fanekisela byi tlhanganisa Yesu Kriste ni lava 144.000, ku nga mutekiwa wake. Xiyentxakalu lexi xa lisima, xi ta sungula Mfumu lowumpshwa lowu taka fuma misava ku dzringana 1.000 wa malembe.—Mpf 20:6.

DOROPA DZRA KU XWENGA NI WUMUNDZRUKU BYAKU

14-15. Xana Apfuletelo ndzrima 21 yi fananisa lava 144.000 na yini? (Vona xifaniso lexi nga ka kapa.)

¹⁴ Hi ku landzrela, Apfuletelo ndzrima 21 yi fananisa lava 144.000 ni doropa dzra ku xonga swinene ledzri vitaniwaka ‘Yerusalem Lowumpshwa’. (Mpf 21:2, 9) A masungulu ya doropa ledzro ma hambiwe hi 12 wa mazribye, lawa ka wone ku tsraliwiki ‘khume dzra mavito na mavito mabidzri ya vapostola lava khume na vabidzri va Hambana’. Ha yini leswo swi mu khumbile Yohane? Hikusa a vone vito dzrake na dzri tsraliwe ka dzrin’we dzra mazribye wolawo. Nakunene, ledzro i tovoko!—Mpf 21:10-14; Ef 2:20.

¹⁵ A ku na doropa ledzri nga fanisiwaka ni doropa ledzro dzra ku fanekisela. Dzri ni xitaratu lexi hambiwiki hi woru, 12 wa tinyangwa ta maperola, ni makhumbi lawa ma yakiwiki ma tlhela ma xongisiwa hi mazribye ya lisima, ma tlhela ma va ni mimpimu leyi dzringanaka hi ku helela. (Mpf 21:15-21) Kambe ku ni ntxhumu wumbeni lowu Yohane a wu voniki. Twana leswi Yohane hi ku landzrela a hi byelaka swone, a li: ‘A tempele dzrone a ndzri dzri vonanga ku wone, hikusa Hosi Xikwembu Nkulukumba wa ntamu hinkwawu hi yone tempele dzra wone, na yone Hambana. A muti a wu pfumali dambu na hweti akuva swi vaninga ku wone, hikusa ku phatima ka Xikwembu Nkulukumba ka wu vaninga, nakone a Hambana hi motsre wa wone.’ (Mpf 21:22, 23) Lava vumbaka Yerusalema Lwemumpswha va ta va na Yehovha hi ku kongoma. (Hb 7:27; Mpf 22:3, 4) Xileswo, Yehovha na Yesu hi vone tempele dzra doropa ledzro.

16. I yini leswi taka yentxekela vhanu hi nkama wa Mfumu wa Xikwembu Nkulukumba wa 1.000 wa malembe?

¹⁶ Swi nyonxisa swinene ka vatotiwa ku yanakanyisisa hi dumbo dzravu. Nambi lava nga ni dumbo dzra ku hanya kola misaveni va fanela ku khumbeka hi doropa ledzri. Hi nkama wa Mfumu wa Xikwembu Nkulukumba wa 1.000 wa malembe, Yerusalema Lwemumpswha a ta buyisa matovoko manyingi la misaveni. Yohane a vone matovoko lawo na ma xika swanga “nfula wa mati ya vutomi”. Nakone ka matlhelo ha mabidzri ya mfula kumbe nambu, a ku ni minsinya ya wutomi leyi humesaka mihandzru ‘ya ku holisa matiko’. (Mpf 22:1, 2) Vhanu hinkwavu lava taka hanya nkameni lowo, va ta buyeliwa hi mintxhumu hinkwayu leyo leyinene. Nakone lava yingisetaka Yehovha va ta ya va hetiseka ha katsrongokatsrongo. A ku nga ha ti va ni wa ku vabya, wa ku twa ku vavisa nakone a ku nga ha ti va ni minyembeti ya xidzrilo.—Mpf 21:3-5.

17. Hi lani swi kombisiwaka ha kone ka Apfuletelo 20:11-13, i vamani lava ta ka tikholisa hi matovoko hi nkama wa Mfumu Xikwembu Nkulukumba wa 1.000 wa malembe?

¹⁷ I mani lwa taka tikholisa hi mintxhumu hinkwayu leyi leyinene? Ku ta buyeliwa vhanu hinkwavu va xitsrhungu lexikulu lava taka huluka a Armagedon, ni vana lava nga ha pswaliwaka a misaveni leyimpshwa. Kambe Apfuletelo ndzrima 20 yi tlhela yi dumbisa leswaku lava fiki va ta pfuxiwa. (Dondzra Apfuletelo 20:11-13.) ‘Valulami’ lava fiki khale ku patsra ni ‘lavamfani’ lava fiki na va nga tivi ntxhumu ha Yehovha va ta pfuxiwa akuva va tlhela va hanya kola misaveni. (Min 24:15; Yh 5:28, 29) Xana leswo swi tlhamuxela leswaku hinkwavu lava fiki va ta pfuxiwa hi nkama wa Mfumu wa Xikwembu Nkulukumba wa 1.000 wa malembe? Im-him. He xini xiboho xa lisima lexi vhanu hinkwavu va fanelaka ku xi teka? Lava va yaliki ku tizrela Yehovha na va nga si fa va nge te pfuxiwa. Va ve ni mukhandlu nakone va swi kombisile leswaku a va faneleki ku hanya a misaveni leyi nga Paradeyisi.—Mt 25:46; 2Te 1:9; Mpf 17:8; 20:15.

KU DZRINGIWA KA WUGAMU

18. Xi ta va xini xiyimu xa vhanu lani misaveni a ku heleni ka 1.000 wa malembe?

¹⁸ A ku heleni ka 1.000 wa malembe, hinkwavu lava taka va na va hanya la misaveni, va ta va na va hetisekile. A ka ha na lwa taka xaniseka hi kola ka xidoho xa Adamu. (Ro 5:12) A xidoho xa Adamu xi ta va xi heliseliwe wugamu, hi ndlela leyo lava taka va na va hanya lani misaveni va ta va na va ni wutomi bya ku hetiseka a ku heleni ka 1.000 wa malembe.—Mpf 20:5.

19. Ha yini ku dzringiwa ka wugamu ku vileleka?

¹⁹ Ha swi tiva leswaku Yesu a nga pfumelanga ku hlohloteliwa hi Sathana akuva a tsrhika ku dumbeka kwake. A tame a dumbeka nambiloko a dzringiwa. Kambe xana vhanu hinkwavu lava taka va na va hetisekile va ta tsrhama na va dumbekile nambiloko Sathana a va dzringa? Mun’wana ni mun’wana a ta tihlamulela xivutiso lexi loko Sathana a ta ntsrhunxiwa swa nkamanyana a xikheleni xa ku yenta a ku heleni ka 1.000 wa malembe. (Mpf 20:7) Lava taka dumbeka hi nkama wa ku dzringiwa ka wugamu, va ta kuma wutomi lebyi nga helikiki nakone va ta tikholisa hi ntsrhunxeko wa ntiyiso. (Ro 8:21) Lava taka tipatsra na Sathana a ku xandzrukeni kwake, va ta heliseliwa wugamu, vone, Sathana kun’we ni mademona yake.—Mpf 20:8-10.

20. Xana wuprofeta lebyi kumekaka ka buku dzra Apfuletelo byi ku khumba hi ndlela yini?

²⁰ Xana u titwisa kuyini hi kuva hi kambisise buku dzra Apfuletelo hi ndlela ya ku katsrakanya? Xana a swi khumbi ku vona ndlela leyi u patsrekaka ha yone ka wuprofeta lebyi? Xana leswo a swi ku yentxi u djula ku pfuna van’wana akuva na vone va patsreka ka wugandzreli bya ku xwenga bya Xikwembu Nkulukumba? (Mpf 22:17) Leswi miyanakanyu yezru ni timbilu tezru swi khumbekiki hi swiyentxakalu swa nkama lowu taka, leswi hlamalisaka, handle ka ku ganaganeka hi susumeteleka ku hlaya mazritu ya mupostola Yohane loko a te: “Amen. Tana, Hosi Yesu.”—Mpf 22:20.