4. Xana Hi Vumbeliwe Leswaku Hi Xaniseka?

Ha Yini Swi li Swa Lisima Ku Tiva Nhlamulo?

Nhlamulo ya xivutiso lexo yi khumba ndlela leyi hi byi vonaka ha yone wutomi.

Yanakanyisisa Hi Leswi

Xana swa twala ku va Xikwembu Nkulukumba a tumbuluxa misava ya ku xonga a gama a hamba vhanu akuva va xaniseka?

Loko vhanu vanyingi va vona ku xaniseka hinkwaku loku nga kone, va sungula ku ganaganeka mayelanu na Xikwembu Nkulukumba. Va sungula ku yanakanya leswaku 1) Xikwembu Nkulukumba a nga na ntamu wa ku helisa ku xaniseka, leswaku 2) Xikwembu Nkulukumba a nga na mhaka ni ku xaniseka kwezru, kumbe leswaku 3) Xikwembu Nkulukumba a nga kone.

Xana mimpimiso leyo i yinene?

AKUVA U TIVA SWIN’WANA

Vona vídeo ledzri liki I Yini Leswi Nga Hi Kholwisaka Leswaku Bibele Dzri Khanela Ntiyiso?, ka jw.org.

Leswi Bibele Dzri Swi Hlayaka

Xikwembu Nkulukumba a nga hi vumbelanga leswaku hi xaniseka.

Xikwembu Nkulukumba a djula kuva hinkwezru hi nyonxa.

‘A ku na leswi tlulaka ku titsrhavela ni ku tikumela tindjombo a ku hanyeni kwavu. Naswone i xinyiko xa Xikwembu Nkulukumba leswaku mhunu a da, a nwa, a titsrhavela ntizrweni wakwe hinkwawu.’—EKLESIASTA 3:12, 13.

Xikwembu Nkulukumba a nyike vatekani va ku sungula hinkwaswu leswi a va swi vilela akuva va nyonxa.

Xikwembu Nkulukumba a a nga swi djuli leswaku vana vavu va xaniseka.

‘Xikwembu Nkulukumba a ku ku vone: belekanani n’wi yandzra, n’wi tata misava.’—GENESIS 1:28.

Vatekani va ku sungula va hlawule ku ka va nga yingiseti Xikwembu Nkulukumba.

Hi kola ka leswo, va tivitanele ku xaniseka vone vinyi ni ku xaniseka ka vana vavu.

‘Ha mhunu mun’we a xihono xi nga nhingena misaveni, ni hi xo xihono ka nhingeni ku fa, hi swoswo a ku fa ku tlulele vhanu hinkwavu hi leswi hinkwavu va nga hona.’—BA-LE-ROMA 5:12.a

A hi vumbiwanga akuva hi hanya na hi nga na milawu ya Xikwembu Nkulukumba.

Ku fana ni leswi mhunu a nga vumbiwangakiki akuva a hanya hansi ka mati, Yehovha a nga hambanga vhanu akuva va tifuma.

‘A Mhunu lwe a fambaka a nga na ku lulamisa mavangwa yakwe.’—YEREMIYA 10:23.

Xikwembu Nkulukumba a nga swi nyonxeli ku vona vhanu na va xaniseka.

Xileswo, a hi nyika swilayu leswi hi pfunaka ku va ni wutomi lebyinene, lebyi ngeke na swikazratu swinyingi.

‘Mawaku! ingiki u nga yingiseta swileleto swanga! A ku zrula kwaku a nha ku ta va swanga hi nambu.’—EZAYA 48:18.

a A Bibeleni, zritu ledzri liki ‘xihono’ kumbe ‘xidoho’ dzri tlhamuxela swiyentxo swa ku biha swa mhunu nakone dzri tlhela dzri tlhamuxela xiyimu xa wudoho lexi vhanu va xi kumiki ka Adamu na Evha.