Djula Ku Tiva Ntiyiso

Xikazratu

Lexi vangaka xihlawuhlawu minkama yinyingi i ku va vhanu va nga tivi dzrungula hinkwadzru hi mhaka ya kukazri kumbe va kholwa mhaka ya madzrimi. Vona swikombiso leswi landzrelaka:

Van’wamabindzru vambeni va ni vonela ledzri hoxekiki dzra leswaku vavasati a va faneleki ku tizra hi mitxhini kumbe makomputadori.
A Europa Medieval, a va-Yuda a va lumbetiwa leswaku a va txhela muzri swihloveni ni leswaku a va txhotxhela mavabyi. Hi nkama wa mfumu wa Vanazi, a va-Yuda va tlheli va lumbetiwa swimbeni. A va hlaya leswaku vone a va vanga swikazratu swa timali a Alemanha. Hinkwaswu leswo swi yentxi leswaku va kombisiwa xihlawuhlawu, lexi xa ha vonekaka hi mpimu wa kukazri ku ta tlhasa namunhla.
Vhanu vanyingi va pimisa leswaku vhanu lava va nga ni wulema va tsrhama na va kwatile kumbe va khunguvanyekile.

Vhanu lava kholwaka ka madzrimi wolawo va djuletela swikombiso swa kukazri akuva va tiyimelela ka xihlawuhlawu xavu. Nakone loko mhunu a nga pfumelelani na vone va hlaya leswaku a nga na mhaka ni ntxhumu.

Leswi Bibele Dzri Swi Hlayaka

“A hi swinene ku va mhunu a pfumala wutivi.”—AMAPROVERBIA 19:2, TRADUÇÃO DO NOVO MUNDO.

Xana hi dondzra yini? Loko hi nga tivi ntiyiso wa mhaka, swi nga hi yentxa hi teka swiboho leswi hoxekiki. Loko hi kholwa hinkwaswu leswi hi swi yingelaka, a matsrhan’wini ya ku djuletela ku tiva ntiyiso, hi nga ha yavanyisa vhanu hi ndlela leyi hoxekiki.

Xana Bibele Dzri Hlohlotela Xihlawuhlawu?

Van’wana va hlaya leswaku Bibele dzri hlohlotela xihlawuhlawu. Kambe i mpswini leswi dzri swi hlayaka hakunene?

Hinkwezru hi huma ka mhunu mun’we: Xikwembu Nkulukumba ha mhunu ‘mun’we ntsena a yentxi a tinxaka hinkwatu ta vhanu’.—Amintiṛo 17:26, Testamente Ledrimpswha Ni Mapsalma.
Xikwembu Nkulukumba a nga na xihlawuhlawu: ‘Xikwembu Nkulukumba a nga langusi wuso. Kambe a tikweni dzrin’wana ni dzrin’wana lweyi a mu txhavaka ni ku tizra swa ku lulama, iwa yamukeleka ku yene.’—Amintiṛo 10:34, 35.
Xikwembu Nkulukumba a lavisa leswi hi nga xiswone ndzreni, ku nga li leswi hi nga xiswone handle: ‘Mhunu a lavisa leswi vonekaka le handle, kambe Yehovha a lavisa mbilu.’—1 Samuel 16:7.a

a Yehovha i vito dzra Xikwembu Nkulukumba hi ku ya hi Bibele.

Xana Ku Tiva Ntiyiso Swi Hi Pfuna Hi Ndlela Yini?

Loko hi tiva ntiyiso hi vhanu a hi nge ti kholwa ka madzrimi lawa va ma hlayaka mayelanu na vone. Nakone loko hi gungula ntiyiso hi vhanu va kukazri swi ta hi nabyalela kuva hi hlula xihlawuhlawu lexi hi nga naxu.

Leswi Yentxekeliki Van’wana: Jovica (Europa)

Jovica, lweyi hi khaneliki ha yene a ku sunguleni, a kule na a yingela mintxhumu ya ku biha mayelanu ni ntlawanyana wa kukazri wa vhanu. A vhanu va muganga wakwe, minongonoko ya televhizawu ni madzrungula a ma khanela ku biha hi vhanu lavo. Jovica a li: “Ni sungule ku va ni xihlawuhlawu hi vhanu va ntlawa wolowo nakone a ni tiyimelela a mhakeni leyo.”

“Ntsrhaku, loko ni ye wusotxhweni ni sindzriseke ku tsrhama ni vhanu va ntlawa wolowo. Hi ku famba ka nkama, ni ye ni va tiva ku yampswa. Ni sungule ku dondzra lidzrimi dzravu ni ku yingiseta tinsimu tavu. Hi wugamu, ni ye ni va tiva ku yampswa nakone ni txintxe vonela ledzri a ni li na dzrone ha vone. Nambitanu, xihlawuhlawu xi nga ha tlhela xi buya. Kutani ni tingawula ku vona madzrungula lawa ma khanelaka ku biha hi ntlawa wolowo kumbe ma-filme ni minongonoko leyi yi va poyilaka. Na swi tiva leswaku xihlawuhlawu xi nga ha ndzruluka mahlundzru ni livengo.”

Xana U Fanela Ku Yentxa Yini?

Dzrimuka leswaku leswi u swi twiki mayelanu ni vhanu va ntlawa wa kukazri a swi tlhamuxeli leswaku hinkwavu ka ntlawa wolowo va tsrhamisise xiswoswo.
Dzrimuka leswaku swi nga yentxeka u nga tivi wutsrhokotsrhoko hinkwabyu mayelanu ni vhanu va ntlawa wa kukazri.
Djuletela ku tiva mhaka ka lava nga ni ntiyiso.