Kombisa Lizrandzru

Xikazratu

Swi teka nkama akuva hi kota ku hlula xihlawuhlawu. Ku fana ni leswi mavabyi lama vangiwaka hi switsrongwatsrongwana ma tekaka nkama akuva ma khaluta, na xone xihlawuhlawu xi teka nkama akuva xi suka. Kutani, i yini leswi u nga swi yentxaka akuva u kota ku hlula xihlawuhlawu?

Leswi Bibele Dzri Swi Hlayaka

Mifoto: 1. Wanuna wa le Ásia a pfulelaka xipfalu wanuna wa mulandi. 2. Wanuna wa mulandi a nyikaka txana vatizrikulobye ku patsra ni wansati wa mu-Índia lwa kombisiwiki ku sunguleni.

“Yambalani lizrandzru, hikusa i xitsrimbo lexi hetisekiki xa wumun’we.”—BA-LE-KOLOSA 3:14, TRADUÇÃO DO NOVO MUNDO.

Xana hi dondzra yini? Ku yentxelana mintxhumu leyinene swi yentxa vhanu va va ni wumun’we. Loko u ya u kombisa lizrandzru ka vhanu, xihlawuhlawu xi ta ya xi nyamalala. Loko u tata mbilu yaku hi lizrandzru, mahlundzru ni livengo a swi nge ti kuma mbangu ka yone.

Xana U Fanela Ku Yentxa Yini?

Mifoto: 1. Wansati wa mu-Caucasiana lwa kuliki hi ntanga a pfuniwaka hi wansati wa mu-Índia akuva a khwela xikada ni ntsrhwalu wakwe. 2. Wansati lweyi a kuliki hi ntanga a hananaka mabiskoito wanuna wa le Ásia lwa nga muvundzramani wakwe.

Loko u ni vonela ledzri bihiki mayelanu ni vhanu va ntlawa wa kukazri, pimisa hi mintxhumu leyi u nga yi yentxaka akuva u va kombisa lizrandzru. Hi xikombiso, u nga ha dzringisa ku yentxa mintxhumu leyi landzrelaka:

Loko u ya u yentxela vhanu mintxhumu yitsrongo leyi kombisaka lizrandzru, xihlawuhlawu xi ta ya xi pumbeka

Ku va pfulela xipfalu kumbe ku va nyika xitsrhamu loko mi li ka swa ku famba ha swone.
Ku sungula mabulu navu nambi loko va nga khaneli ha hombe lidzrimi dzraku.
Ku tama u zrula loko va yentxa ntxhumu lowu u kalaka u nga wu twisisi ha hombe.
Ku va yingiseta hi wunyaminyami loko va khanela hi swikazratu swavu.

Leswi Yentxekeliki Van’wana: Nazaré (Guiné-Bissau)

“A ni ni xihlawuhlawu hi vhanu va matiko mambeni. A ni yingela leswaku vanyingi vavu a va kanganyisa mfumu akuva va kota ku yamukela mali kumbe ku pfuniwa ni leswaku van’wana ka vone a va li swigevengu. Hi mhaka ya leswo, a ni nga va zrandzri. Kambe a ni nga pimisi leswaku a ni ni xihlawuhlawu, hikusa vhanu vanyingi a va va vona hi ndlela leyi fanaka.

“Hi ku famba ka nkama, ni xiye leswaku a ni ni xihlawuhlawu. Swilayu swa Bibele swi ni pfune akuva ni ya ni kombisa lizrandzru ka vhanu volavo. Swoswi a na ha va nyenyi. A matsrhan’wini ya leswo, na va losa ni tlhela ni bulisana na vone. Ni dzringisa ku tiva ku yampswa mun’wana ni mun’wana wavu. Swoswi ni ni vonela ledzrinene hi vhanu va matiko mambeni, nakone ni titwa ha hombe loko ni li na vone.”