Tibeki A Mbangwini Wa Vambeni

Xikazratu

Loko hi tsrhamela ku pimisa hi ku hambana loku hi nga na kone ni vambeni, leswo swi nga hi yentxa hi pimisa leswaku loko va yentxa mintxhumu hi ndlela leyi hambaniki ni yezru vo phazama. Kutani leswo swi nga hi yentxa hi pimisa leswaku hine hi tlakukile ku va tlula. Loko hi ni vonela ledzro dzra xihlawuhlawu swi ta kazrata ku tibeka a mbangwini wa vambeni.

Leswi Bibele Dzri Swi Hlayaka

‘Tsrhavani kun’we ni lava tsrhavaka, n’wi dzrila kun’we ni lava dzrilaka.’—BA-LE-ROMA 12:15.

Xana hi dondzra yini? Ndzrimana leyo yi hi dondzrisa leswaku hi fanela ku tibeka a mbangwini wa vambeni. Ku tibeka a mbangwini wa vambeni swi tlhamuxela ku twisisa matitwela yavu.

Ku Tibeka A Mbangwini Wa Vambeni Swi Nga Hi Pfuna Hi Ndlela Yini?

Loko hi tibeka a mbangwini wa vambeni hi ta gungula leswaku hinkwezru ha fana. Hi ta gungula leswaku va yentxa mintxhumu ni ku titwa hi ndlela leyi na hine hi titwaka ha yone. Ku tibeka a mbangwini wa vambeni swi ta hi pfuna ku va hi twisisa leswaku hinkwezru hi vhanu van’we swi nge na mhaka leswaku hi huma kwini kumbe hi kulisiwe hi ndlela yini. Loko hi yanakanyisisa hi ndlela leyi hinkwezru hi fanaka ha yone, hi ta tsrhika ku yavanyisa vambeni.

Ku tibeka mbangwini wa vambeni swi ta hi pfuna ku bekela xitxhavu vambeni. Anne-Marie, wa le Senegal, a a talisa ku dzrela vhanu va mintlawa leyi a yi tekeliwa hansi. A tlhamuxela ndlela leyi ku tibeka a mbangwini wa vambeni swi mu pfuniki ha yone. A li: “Loko ni yime ni vona swikazratu leswi va kumanaka na swone, ni sungule ku tivutisa leswi: ‘A ni ta titwisa kuyini loko a ni li mbangwini wa vone?’ Hi kola ka swoswo, ni sungule ku vona leswaku a ni nga li wa lisima ku tlula vhanu lavayani. Mine a ni nga yentxanga ntxhumu akuva ni va ka xiyimu lexi vone va xi vonaka xi yampswa ku tlula xavu.” Ntiyiso wa mhaka hi leswaku loko hi tikazratela ku twisisa swikazratu leswi vambeni va langutanaka na swone, swi ta hi nabyalela ku tibeka a mbangwini wavu ku tlula ku va solasola.

Xana U Fanela Ku Yentxa Yini?

Loko u ni vonela ledzri hoxekiki hi ntlawa wa kukazri wa vhanu dzringisa ku vona ntxhumu wa kukazri lowu mi fanaka ha wone. Hi xikombiso, dzringisa ku pimisa hi matitwela yavu

Ku tibeka a mbangwini wa vambeni swi ta hi yentxa hi twisisa leswaku hinkwezru hi va lixaka dzrin’we

loko va da kun’we ni ndangu wavu
loko va kazralile hi leswi va tizriki ngopfu
loko va hungata kun’we ni vanghanu
loko va yingiseta wunanga lebyi va byi zrandzraka

Swoswi ke, dzringisa ku tibeka a mbangwini wa vhanu volavo. Tivutise:

‘Xana a ni ta yentxa yini loko mhunu a ni yentxa ni titwa hi ndlela leyi nga pfuniki ntxhumu?’
‘Xana a ni ta titwisa kuyini loko van’wana va ni yavanyisa na va nga ni tivi ku yampswa?’
‘Loko a ni li wa ntlawa wolowo a ni ta djula ku khomiwa hi ndlela yini?’

Vavanuna volavo va van’we, wa mu-Caucasiano ni wa mu-Sikh, va kombana mifoto ya mintxhumu leyi va yi zrandzraka, ya ku fana ni mindangu yavu, mintlangu leyi va hungataka ha yone ni mintizro yavu.

Leswi Yentxekeliki Vambeni: Robert ( Singapura)

“Khale a ni pimisa leswaku vhanu lava fiki tindleve a va tolovelekanga, a va tivi ntxhumu ni leswaku va hatla va kwata. A ni va tingawula hi ku helela. Kambe leswi a ni nga hluphi mhunu, a ni pimisa leswaku a ni na xihlawuhlawu.

“Ku tibeka a mbangwini wa vhanu lava fiki tindleve swi ni pfune ku hlula xihlawuhlawu lexi a ni li na xone. A ni pimisa leswaku vhanu lava fiki tindleve a va tivi hikusa loko ni khanela a vo yima va ni langusa. Ni pimise leswi: A ni ta titwisa kuyini loko a ni li ka xiyimu xa ku fana ni xavu? Na mine a ni ta mu lavisa na ni nga yingelanga ntxhumu. Nambi loko a no va ni mutxhini wa ku pfuna ku yingela, a wuso byanga a byi ta kombisa leswaku a ni twisisanga ntxhumu nakasi hi ntiyiso wa kone, xikazratu xikulu ku mine a a ta va ku yingela.

“Loko ni sungule ku twisisa lava fiki tindleve ni ku tibeka a mbangwini wavu, xihlawuhlawu lexi a ni li na xone xi sungule ku hela.”