Ha Yini Swi Li Swa Lisima Ku Tiva Leswaku Muvumbi A Kone?

Ha yini swi li swa lisima ku tiva nhlamulo ya xivutiso lexi? Loko wumboni lebyi u byi dondzriki byi ku kholwisile leswaku Xikwembu Nkulukumba a kone, swi nga ha yentxeka u djula ku kambisisa wumboni byin’wana lebyi kombisaka leswaku yene i mutsrali wa Bibele. Nakone loko u dumba leswi Bibele dzri swi hlayaka swi nga ku pfuna hi tindlela leti landzrelaka.

A wutomi byaku byi ta nyonxisa swinene

A BIBELE DZRI LI: “[Xikwembu Nkulukumba] a yentxa mintxhumu leyinene, hi ku mi nisela timpfula hi le tilweni, a yentxa leswaku masimu yenu ma bindzrula ngopfu hi nkama wa kone, a mi nyika swakuda swa ku va mi da mi xuzra a tlhela a tata timbilu tenu hi ku nyonxa.”—Mintizro 14:17.

LESWI NDZRIMANA LEYI YI TLHAMUXELAKA SWONE: Mintxhumu hinkwayu leyinene, leyi nga matilweni ni lani misaveni i swihiwa leswi pfaka hi ka Muvumbi. U ta ya u kombisa ku tlangela ka tinyiko leti loko u tiva leswaku Muvumbi awa zron’weka ha wene.

U ta kuma swilayu leswinene

A BIBELE DZRI LI:‘U ta twisisa a vunene ni ku lulama, ni ku longoloka ka matsrhamela hinkwawu lawa manene.’—Amaproverbia 2:9, BX.

LESWI NDZRIMANA LEYI YI TLHAMUXELAKA SWONE: Xikwembu Nkulukumba i muvumbi waku, xileswo, awa swi tiva leswi u swi djulaka akuva u nyonxa. Loko u dondzra Bibele u ta tiva mintxhumu yinyingi leyi taka ku pfuna a wuton’wini byaku.

U ta kuma tinhlamulo ta swivutiso leswi u nga na swone

A BIBELE DZRI LI: ‘U ta kuma ku tiva Xikwembu Nkulukumba.’—Amaproverbia 2:5, BX.

LESWI NDZRIMANA LEYI YI TLHAMUXELAKA SWONE: Ku tiva leswaku ku ni Muvumbi swi ta ku pfuna ku kuma tinhlamulo ta swivutiso swa lisima, swa ku fana ni leswi: Hi hanyela yini? Ha yini vhanu va xaniseka? Ku yentxeka yini ha hine loko hi fa? U nga kuma tinhlamulo ta swivutiso leswi a Bibeleni.

U ta va ni ku lavisela hi wumundzruku

A BIBELE DZRI LI: ‘Hikuva ndzri tiva swipimiso leswi ndzri swi pimisaka ha n’wine, ku hlaya Yehovha, a swipimiso swa ku zrula, swi nge swa khombo, ku n’wi nyika ku lavisela ku heleni kwenu.’—Yeremiya 29:11.

LESWI NDZRIMANA LEYI YI TLHAMUXELAKA SWONE: Xikwembu Nkulukumba a dumbisa ku helisa wubihi, ku xaniseka nambi ku li lifu. Loko u va ni dumbo ledzro u ta va ni xixixi xa ku lavisana ni swikazratu swa siku ni siku.

Mabindzru Lawa Van’wana Va Ma Kumiki Hi Ku Pfumela Leswaku Ku Ni Muvumbi

Cyndi wa le Estados Unidos, a li: “Ni hlamalisiwa ngopfu hi ku vona tindlela ta ku siyanasiyana leti Xikwembu Nkulukumba a ni pfunaka ha tone a wuton’wini byanga. A hi pfuna ku tiva leswi nga swa lisima a wuton’wini, swa ku fana ni ndlela leyi hi nga hanyisanaka ha yone ha hombe ni van’wana, ni leswi hi nga swi yentxaka akuva hi va vanghanu vake.”

Elise wa le França, a li: “Ku pfumela leswaku ku ni muvumbi swi yentxa wutomi byanga byi va ni ntlhamuxelo byi tlhela byi nyonxisa. Leswi ku nga ni mintxhumu yinyingi ya ku xonga leyi ni nga yi dondzraka ha yene, hi ntumbuluku ni zritu dzrake, minkama hinkwayu ni tsrhama na ni ni xa ku xi yentxa.”

Peter wa le Holanda, a li: “Ku hanya hi leswi Muvumbi wezru a hi dondzrisaka hi ku tizrisa Bibele swi ni pfuna ku va mhunu lweyi a nyonxiki ngopfu, kuva ni nga tsrhameli ku solasola van’wana kambe ni zron’weka ni ku tlhela ni nyonxa hi leswi ni nga na swone. A Bibele dzri tlhela dzri ni pfuna ku va papayi lwenene.”

Liz wa le Estónia, a li: “Khale a no hanyela ku da, ku yetlela ni ku tikazratela kuva ni nga xweli ntizrweni, wutomi byanga a byi nga nyonxisi. Swoswi ni vona wutomi swanga nyiko ya ku hlamalisa, leyi hi fanelaka ku yi londzrovota ni ku tlhela hi yi nyika lisima.”

Kasi Adrien wa le França, a li: “Mine ni mhunu wa ku tsrhama hi ku vilela. Kambe ku tiva leswaku wubihi, ku kala wululami ni ku xaniseka swi ta helisiwa swi ni pfuna ku lavisana ni ku vilela kwanga.”